oBooksoCoinsNotificationsProfileOrganisations

(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Żewġ Qtates Żgħar

null
Judy kienet waslet biex tagħlaq tmien snin. Ħuha Brian kien sena iżgħar. Ma kinux tfal ħżiena imma xejn ma kienu jaqblu bejniethom. Kull meta jiltaqgħu flimkien għid li se tqum xi kwistjoni bejniethom fuq ħaġa jew oħra, u aktarx tinqala’ ġlieda li tispiċċa b’xi ċanfira ħarxa mingħand il-mamà jew il-papà.
Paġna 1
null
Fi żmien ġimgħa Judy kienet se tagħlaq sninha. Ommha kienet taf li t-tifla kienet ilha ħafna bix-xewqa li jkollha qattus. Għalhekk, marret għand il-pet shop biex tixtrilha wieħed bħala rigal.
Paġna 2
null
Tal-pet shop kellu żewġt ifrieħ aħwa, miżmumin ġo kaxxa kbira fuq it-tiben. Wieħed kien ġinġer u l-ieħor bebbuxi.
“Dawn Ġinġer u Buxi, Sinjura,” qal sid il-ħanut, “żewġ qtates aħwa. Liema jogħġbok?”
Paġna 3
null
Il-mamà għażlet lil Ġinġer u r-raġel ħarġu mill-kaxxa. Iżda fil-pront Buxi beda jnewwaħ għal ħuh u Ġinġer għamel id-dwejjaq.
“Qegħdin iħossu n-nuqqas ta’ xulxin, Sinjura,” qalilha tal-ħanut. “Iridu jibqgħu flimkien… Għax ma teħodhomx it-tnejn?”
Paġna 4
null
Imma l-mamà qattus wieħed riedet, u ħadet lil Ġinġer. Ħallset lil sid il-ħanut u telqet bil-qattus ċkejken ġo kaxxa tal-kartun. Fit-triq il-qattus beda jnewwaħ, u n-nies bdew iħarsu u jitbissmu.
Paġna 5
null
Meta l-omm waslet id-dar Judy ħadet sorpriża sabiħa u tgħidx kemm ferħet. Iżda mbagħad bdiet tinkwieta għaliex Ġinġer baqa’ jnewwaħ. U la ried jixrob il-ħalib li tatu Judy u lanqas jiekol il-ħuta mixwija li poġġietlu l-mamà fil-landa tal-ikel.
Paġna 6
null
“Dak qiegħed jimmissja lil ħuh, Judy,” qalet il-mamà. “Hekk qalli sid il-pet shop. U naħseb li sewwa qal għax anki l-qattus l-ieħor beda jnewwaħ meta fridniehom.”
“Mela għax ma nixtrux l-ieħor ukoll, mamà?” issuġġerixxa Brian. “Hekk ikollna qattus kull wieħed, u allura ma niġġildux.”
“Dażgur li ma tiġġildux, Brian,” ħatfitu l-mamà. “Dak xtrajtu għal Judy għax se tagħlaq sninha, imma int għad baqagħlek biex tagħlaq sninek. Lil Ġinġer tistgħu tieħdu ħsiebu t-tnejn li intom, avolja hu ta’ Judy. U jekk taqilgħu xi ġlieda minħabba fih naqbdu u nieħdu lura l-pet shop.”
Paġna 7
null
Għall-ħabta tal-ħamsa u nofs wasal il-papà mix-xogħol. F’idejh kellu kaxxa tal-kartun bit-toqob li minnhom beda ħiereġ leħen ta’ qattus żgħir inewwaħ. Il-papà fetaħ il-kaxxa u minnha ħareġ qattus ċkejken bebbuxi.
“Dan xtrajthulek għall-birthday, Judy, qal il-papà bi tbissima. “Naf li ilek ħafna tixtieq wieħed.”
Paġna 8
null
Ilkoll skantaw kif il-papà u l-mamà kien ġiehom l-istess ħsieb u ż-żewġ qtates aħwa spiċċaw it-tnejn għandhom! Ġinġer u Buxi ġrew għal fuq xulxin u nfexxew jilagħqu wiċċ xulxin. Kienu tant ferħanin li issa reġgħu ngħaqdu li l-papà u l-mamà ddeċidew li jżommuhom it-tnejn.
Paġna 9
null
“U tafu x’qed ninnota?” staqsa l-papà lit-tfal.
“Iva, jien naf,” qalet Judy ta’ tifla intelliġenti li hi. “Qed tinnota li Ġinġer u Buxi jħobbu lil xulxin iktar minni u minn Brian… Imma issa se nieħdu lezzjoni mingħandhom u aħna wkoll nibdew inħobbu aktar lil xulxin u ma niġġildux. Hux hekk, Brian?” U ġibdet lil ħuha lejha u ħaddnitu magħha.
Paġna 10
Tmiem
oBooksoCoinsNotificationsProfileOrganisations