Xewku u Peprina 4: Xewku, Peprina u l-Fniek Slavaġ

Kienet qed tagħmel xitwa qalila u Xewku u Peprina kienu qed iqattgħu ħafna żmien fid-dar tagħhom għas-sħana. Xewku kien xeba’ dejjem xita u bard u ma jista’ jittanta lil ħadd.

Sa fl-aħħar kienet ħarġet ġurnata mill-isbaħ! Xewku u Peprina ħarġu jiġru barra. Wara li xebgħu, marru ntasbu taħt il-ħarruba x-xiħa għad-dell. In-naħa tal-ġebel il-kbir kien hemm it-toqob li fihom kienu jgħixu l-fniek slavaġ. Xewku xtaq kieku jaqta’ l-kurżità fejn kienu jmorru l-fniek xħin jidħlu fit-toqob u kif kienu jgħixu.

Wara li għamlu xi siegħa għad-dell, Xewku ried jagħmel xi ħaġa. Qatagħha li jmur jagħti titwila mill-qrib lit-toqob. Mar ħdejn il-ġebel il-kbir u beda jfittex biex isib it-toqob li minnhom kien jara l-fniek ħerġin u deħlin. Sab xi tnejn li kienu jidhru kbar mhux ħażin. Tgħid jgħaddi minn ġo fihom?

Peprina, li kienet qiegħda tara x’inhu jagħmel, ratu jdeffes rasu fit-toqba tal-fniek u marret tiġri tara x’kien se jivvinta. Kif qalilha li kien se jidħol fit-toqba bdiet tgħajjat, “Mela qed tiġġennen! U jekk teħel x’se tagħmel? Jien mhux se nidħol ġo dawk it-toqob taħt l-art! U jekk xi fenek jew fenka jattakkawk talli dħalt fid-dar tagħhom? Dik il-kurżità li għandek għad tgħallik!”

Xewku bħal reġa’ beda jibdielu u mar lura d-dar ma’ Peprina. Imma l-kurżità ma ħallitux bi kwietu! L-għada filgħodu qam bil-ħsieb iberren f’moħħu fuq kif se jidħol fit-toqob tal-fniek mingħajr ma tinduna Peprina. Qalilha li kien se jmur idur ftit. Mar sat-tarf tal-wied u xħin kien ċert li Peprina ma kinitx qiegħda tarah, reġa’ lura u mar fejn il-ġebel il-kbir.

Mar ħdejn toqba, niżel għarkupptejh, għamel idejh mal-art u daħal jimxi fuq idejh u rkupptejh ħalli ma jaħbatx rasu mas-saqaf. Għall-ewwel kien hemm id-dawl dieħel mit-toqba, imma aktar ma beda dieħel ’il ġewwa iktar beda jara dlam. Wara ftit reġa’ beda jara d-dawl li kien dieħel minn toqba oħra mħaffra fis-saqaf.

Il-kuritur ma kienx ikompli dritt u kien hemm xi tliet passaġġi ħerġin minnu. Issa liema wieħed se jagħżel? Ħares madwaru u ra li wieħed minnhom kien jidher iktar wiesa’ mill-oħrajn. Ħa l-passaġġ il-wiesa’ u beda jitkaxkar ġo fih sa ma ra daħla wiesa’ fuq il-lemin tiegħu u, jekk kien qiegħed jara sew, kien hemm xi ħaġa tiċċaqlaq.

Resaq bil-mod u lemaħ qisu koċċ suf fir-rokna. Kien hemm iċ-ċaqliq ġos-suf u meta ħares sew ra li kienet bejta tal-fniek. Kien hemm iż-żrameġ qegħdin għas-sħana! Kemm kienu ħelwin jaħasra! Wara ftit, ġietu l-kurżità jara kemm kien hemm.

Resaq qrib, daħħal idejh u beda jaqbad wieħed u jpoġġih fil-ġenb, imma ż-żrameġ ħasbu li daħlet ommhom biex tagħtihom il-ħalib u tgħidx kemm bdew jaqbżu u jwerżqu! F’daqqa waħda sema’ ħoss u ħares imbeżża’ lejn fejn kien ġej dan il-ħoss.

Induna li l-fenka, omm iż-żrameġ, kienet semgħethom iwerżqu u kienet ġejja tara x’kien qed jiġri! Telaq l-aħħar żarmuġ li kellu f’idu fil-bejta u telaq jiġri lura mnejn kien daħal, imma meta wasal fejn it-tliet passaġġi nfixel u ma setax jiftakar liema wieħed kien daħal minnu!

Imwerwer li l-fenka se tiġi għalih, daħal ġol-ewwel wieħed li ra u beda jgħaġġel kemm jiflaħ. F’daqqa waħda s-saqaf tbaxxa u Xewku ħabat ħabta rasu mas-saqaf! Kellu jitbaxxa u jerġa’ jimxi fuq idejh u rkupptejh! Imwerwer, beda l-ħin kollu jħares warajh. Baqa’ miexi meta ġie ġo qisu għar żgħir. Mill-ewwel induna li ma kienx għadda minn hemm qabel.

Kien intilef u ma kienx jaf ’il fejn se jaqbad imur. F’daqqa waħda ra l-fenka ġejja tiġri rrabjata lejh! Fl-aħħar laħqitu u bdiet tigdmu fejn tilħaq! Xewku beda jwerżaq kemm jiflaħ! Fil-pront jisma’ min jgħajjatlu u ra dawl dieħel minn toqba quddiemu. Ħareġ sparat bil-fenka mqabbda mal-qalziet.

Peprina, li kienet viċin it-toqba, bdiet tkeċċiha, u din marret lura fit-toqba. Peprina kienet se tibda tgħajru kemm tiflaħ, imma kif ratu bil-pali ta’ jdejh u rkupptejh kollha migrufin, u gundalla daqsiex fuq moħħu, tħassritu u qaltlu biex imorru d-dar ħalli ddewwih. Xewku, li kien qiegħed jistenna ċamata, qal lil Peprina li ddispjaċieh ta’ dak li għamel. Peprina żammitlu jdejh u telqu lejn id-dar.