Xewku u Peprina 2: Xewku, Peprina u t-Tajra l-Kbira

Xewku u Peprina marru ħdejn il-wied biex jgħaddu siegħa żmien. Kienet ġurnata sabiħa. Ix-xemx kienet tisreġ u taħraq imma fid-dell kien għadu l-frisk. Daru dawra mal-wied, ma jafux x’se jaqbdu jagħmlu. Bdew iħarsu madwarhom u ftit ’il bogħod kien hemm siġra bil-friegħi jagħtu għal fuq nixxiegħa żgħira.

“Ara x’nagħmlu, nitilgħu fuq dik is-siġra u hemm dik il-fergħa ħoxna, noqogħdu bilqiegħda fuqha għad-dell u ndendlu saqajna għal fuq in-nixxiegħa. Noqogħdu għall-frisk u l-kwiet, u naraw hemmx ħut forsi darba oħra niġu nistadu,” qalilha Xewku.

Tħabtu daqsxejn biex telgħu fuq is-siġra imma malajr marru fuq il-fergħa li kienet tiġi fuq l-ilma u qagħdu jbandlu saqajhom. Wara ftit raw l-ilma jiċċaqlaq u xi ħut jaqbeż. Raw ukoll xi żrinġijiet jaqbżu minn fuq il-blat għal ġol-ilma.

F’daqqa waħda Peprina bdiet tisma’ ħoss u iktar ma beda jgħaddi l-ħin iktar bdiet tisimgħu jiżdied; qisu kienet ġejja xi ħaġa lejhom. Bdiet tħares madwarha ħalli tara x’seta’ kien. F’daqqa waħda tara tajra enormi, bajda u sewda, ġejja lejn is-siġra tagħhom! Xewku ma kien intebaħ b’xejn għax kien moħħu fiż-żrinġijiet.

Kif qorbot sew indunat li kienet ġejja biex toqgħod fuq is-siġra tagħhom. Qabdet lil Xewku minn spalltu, li bil-qatgħa għal daqsxejn ma waqax għal isfel, u qaltlu kollha mwerwra biex iħares quddiemu. Dan kif ra dik il-waħx ta’ tajra għal daqsxejn ma qabiżx fl-ilma!

Peprina qaltlu biex ifittxu jisparixxu ħalli ma tindunax bihom. Hekk għamlu u lanqas biss issograw jieħdu nifs. Rawha tidħol fis-siġra; fil-friegħi ta’ fuqhom, fejn issuspettaw li kellha xi bejta għax damet ftit hemm! Xewku u Peprina ma ċċaqalqux minn posthom, sakemm fl-aħħar semgħu ħoss kbir u reġgħu raw lit-tajra titlaq ’l hemm.

Wara li stennew ftit biex ikunu żguri li mhux se terġa’ tiġi lura, ħadu nifs qawwi u reġgħu bdew jidhru. Xewku wara ftit għaddielu l-biża’ u l-qatgħa li kien ħa, u qabditu l-kurżità biex jara x’ġiet tagħmel dik il-mostru ta’ tajra. Għalxejn Peprina qaltlu joqgħod attent li ma tmurx terġa’ tiġi!

Xewku qabad jixxabbat minn fergħa għal oħra ħalli jitla’ ’l fuq għal fejn kienet poġġiet it-tajra. Sab bejta kbira b’ żewġ bajdiet bojod kbar. Dawk il-bajd kien fihom ikla. X’għamel? Qabad waħda minnhom u għajjat lil Peprina biex titla’ ftit ’il fuq ħalli jnewlilha xi ħaġa.

Peprina telgħet kważi taħtu u Xewku qalilha biex tilqa’ l-bajda u toqgħod attenta li ma tkissirhiex. Peprina, imwerwra li ma tmurx tiġi dik it-tajra, bdiet tgħajru miġnun imma Xewku ma tax kasha u dendel il-bajda li kien poġġa fil-beritta biex ma tinkisirx. Peprina kellha tilqagħha u, wara, Xewku niżel taħtha u qalilha biex tnewwilhielu. Hekk ftit ftit niżżlu l-bajda mingħajr ma kissruha!

Huma telqu biha lejn id-dar tagħhom u għamlu froġa biha, fejn damu jieklu minnha tlett ijiem! Wara li spiċċatilhom, Xewku beda jaħseb biex jerġa’ jġib oħra. Qal lil Peprina biex jerġgħu jmorru, imma din ma riditx għax bdiet tibża’ li tiġi għalihom it-tajra! Xewku beda jeqred u jgħajjarha beżżiegħa. Sa fl-aħħar ma felħitux jeqred iżjed u qaltlu li se tmur miegħu.

Din id-darba Peprina qaltlu biex jieħu borża u jorbot ħabel magħha ħalli jdendilhielha għal isfel, biex hi ma toqgħodx titla’ fuq is-siġra. Xewku għoġbitu l-idea u hekk għamlu. Waslu ħdejn is-siġra u ttawlu ġol-friegħi ħalli jaraw jekk it-tajra kinitx fil-bejta. Ma kien jidher xejn u Xewku beda tiela’ mal-friegħi biex jasal fejn il-bejta.

Peprina kienet qiegħda taħt is-siġra tistenna biex tilqa’ l-borża bil-bajda ġo fiha. Xewku wasal ħdejn il-bejta u daħħal idejh, imma kif qabad il-bajda, par difrejn qabduh minn ħwejġu u refgħuh. Xewku ħares ’il fuq u jara par għajnejn feroċi tat-tajra jħarsu lejh u munqar daqsiex lest biex iqattgħu biċċiet!

Imwerwer, beda jitħabat u jwerżaq bil-biża’. F’daqqa waħda, Peprina rat lil Xewku jaqa’ b’tisbita kbira fl-ilma tan-nixxiegħa! Marret tiġri u rat lil Xewku f’wiċċ l-ilma jterter bil-bard bix-xokk qawwi li kellu fuqu! Peprina għenitu jitla’ u telqu lejn id-dar ħalli jneħħi l-ħwejjeġ imxarrbin minn fuqu. Peprina tgħidx kemm bdiet tgħidlu biex ma jivvintax kuntrarju iżjed! Xewku qalilha li kien se joqgħod kwiet, imma kemm taħsbu li dam bil-għaqal?