Walt Disney

Walter Elias Disney, magħruf aħjar bħala Walt Disney, twieled f’Chicago fil-5 ta’ Diċembru 1901. Huwa kien ir-raba’ minn ħames aħwa; Herbert, Raymond, Roy u Ruth.

Walt Disney beda jinteressa ruħu fit-tpinġija sa minn età żgħira. Darba waħda l-ġar tiegħu, li kien tabib irtirat, ħallsu biex ipenġilu ritratt taż-żiemel tiegħu.

Meta kellu 18-il sena, huwa beda jaħdem bħala illustratur, u wara ftit snin mar jgħix Kalifornja fejn flimkien ma’ ħuh Roy waqqaf id-Disney Brothers Studio. U dan kien il-bidu ta’ karriera twila fid-dinja tal-cartoons! L-ewwel suċċess fil-cartoons li kellu Walt Disney kien b’Mickey Mouse fl-1928. Walt Disney uża wkoll il-vuċi tiegħu stess għal dan il-karattru.

Kont taf li l-isem tal-karattru Mickey Mouse ġie mogħti minn mart Walt Disney? Hu kien se jagħtih l-isem Mortimer Mouse iżda martu Lily ħasbet li Mickey kien jixraqlu iżjed.

Walt Disney deherlu li kellu joħloq ukoll xi ħaġa ġdida, u għalhekk beda jaħdem fuq cartoons li jkunu twal daqs film normali, jiġifieri aktar minn 40 minuta. L-ewwel cartoons ta’ dan it-tip kien Snow White and the Seven Dwarfs, li wkoll kien suċċess kbir.

Fil-cartoons Snow White and the Seven Dwarfs tpinġew ’il fuq minn żewġ miljun skeċċ minn 750 artist differenti, iżda fil-cartoons intużaw madwar 250,000 tpinġija.

Iżda ftit wara bdiet it-Tieni Gwerra Dinjija fl-Ewropa, u għalhekk in-negozju tiegħu beda sejjer lura. Meta ħareġ il-cartoons Dumbo, fl-1941, daħlu fil-gwerra wkoll l-Istati Uniti u għalhekk Walt Disney kellu jara x’jagħmel.

Walt Disney malajr adatta għaċ-ċirkostanzi u beda jaħdem fuq filmati għall-militar li jispjegaw b’mod faċli kif jaħdem ċertu makkinarju.

Wara l-gwerra Walt Disney ra kif għamel biex ikabbar in-negozju tiegħu u ma jibqax jiddependi biss fuq il-bejgħ tal-cartoons. Fl-1955 huwa fetaħ Disneyland, park b’tema fantastika li għadu popolari sal-lum il-ġurnata.

Wara kompla jimraħ f’oqsma oħra biex b’hekk il-kumpanija ma tkunx tiddependi fuq il-cartoons biss. Għalhekk Walt Disney beda jaħdem fuq aktar parks, programmi televiżivi u films.

Park ieħor popolari huwa Disneyland ta’ Pariġi, li jinsab f’Chessy, fi Franza. Dan huwa l-iktar park magħruf mal-Ewropej. Il-park fetaħ għall-ewwel darba fit-12 t’April, 1992. F’25 sena mill-ftuħ tiegħu żaruh madwar 320 miljun ruħ u, għaldaqstant, huwa l-iżjed park fl-Ewropa li laqa’ nies fih. Kull sena dan il-park iżuruh ’il fuq minn 14-il miljun persuna.

Il-park jiftaħ kuljum, mit-Tnejn sal-Ħadd, tul is-sena kollha. Disneyland ta’ Pariġi huwa t-tieni park li fetaħ barra mill-Istati Uniti. Fih insibu wkoll lukandi, korsa tal-golf, ristoranti, ħwienet tal-ġugarelli u diversi postijiet ta’ divertiment għall-familja kollha. Disneyland huwa popolari ħafna, speċjalment mat-tfal, għax hemm jiltaqgħu mal-karattri kollha ta’ Walt Disney u jidħlu f’dinja tal-ħolm.

Disney rebaħ ħafna premjijiet għax-xogħlijiet li pproduċa, fosthom 22 Academy Award u Emmy Award wieħed. Għalkemm Walt Disney miet fl-1966 ta’ 65 sena, l-imperu li bena matul ħajtu għadu jagħti l-frott sal-lum il-ġurnata.

Il-film animat Frozen huwa wieħed mis-suċċessi kbar ta’ Walt Disney. Fih insibu l-karattru ta’ Elsa, tfajla b’poter speċjali. Olaf huwa karattru ieħor li jispikka f’dan il-film. Frozen huwa l-ewwel film animat iddireġut minn mara.

Fl-2016 ħareġ il-film animat bl-isem ta’ Moana. Dan għamel suċċess kbir. Moana, tifla simpatika u grazzjuża, irnexxielha tisraq il-qlub tat-tfal u anke tal-ġenituri tagħhom.

Il-karattru ta' Maui (lemin) ġie ispirat min-nannu tal-attur Dwayne Johnson, magħruf aħjar bħala The Rock, li wkoll huwa l-leħen ta' dan il-karattru.

Aladdin huwa cartoons ieħor li ħareġ fl-1992, iżda fl-2019 il-kumpanija Walt Disney reġgħu ħadmu dan il-cartoons, din id-darba f’għamla ta’ film maħdum min-nies. F’dan il-film jispikkaw ħafna l-ilbiesi kkuluriti, il-mużika u ż-żfin tradizzjonali tal-Arabja.

Tant huma popolari dawn il-karattri li ta’ kull sena, fil-jiem tal-Karnival, ħafna tfal jilbsu kostum ta’ xi wieħed minnhom. Apparti minn hekk, jinbiegħu ħafna ġugarelli u aċċessorji ta’ kull tip ta’ dawn il-karattri.