Vanni l-Għasfur li Waqaf Jgħanni

Fil-kċina tan-nannu Pawlu kont issib gaġġa u fiha kien hemm kanarin. Kellu ħames snin u kien ta’ kulur safrani. Tgħidx kemm kien jgħanni! Kien jibda minn meta titla’ x-xemx sa ma jidlam. In-nannu Pawlu tgħidx kemm kien iħobbu u kien semmieh Vanni. Minn xħin iqum kien joqgħod ikellmu. Kien jaqralu mill-gazzetta, kien jagħtih jiekol skalora kuljum u jibdillu l-ilma kull filgħodu u filgħaxija. Il-gaġġa kien iżommha nadifa tazza u kull min jiġi jżur lin-nannu kien jitgħaxxaq bil-għana li kien jgħanni biha dan Vanni. Tant saru ħbieb li n-nannu Pawlu kien jiftaħlu l-bieba tal-gaġġa u dan kien jiġi fuq spallejh u jgerrimlu widnejh.

In-nannu tgħidx kemm kien jieħu gost miegħu. Iżda darba minnhom dan Vanni ma fetaħx ħalqu aktar. Għall-ewwel in-nannu Pawlu ma inkwetax għaliex ħaseb li forsi Vanni kien ftit ma jiflaħx. Iżda meta Vanni baqa’ ma jgħannix għal xi ħmistax-il ġurnata n-nannu beda jinkwieta. “X’seta’ ġaralu?” beda jistaqsi lilu nnifsu. “Veru li qisu mgerrex u naqqas mill-ikel imma xorta qiegħed jiekol u xorta qiegħed jixrob.”

In-nannu mar jistaqsi lil sħabu li kienu jrabbu l-kanarini wkoll u wieħed imdaħħal ħafna fiż-żmien qallu, “Pawl, jekk ma tistax issib tarf oqgħodlu għassa billejl li ma jmurx hemm xi ħaġa qiegħda tbeżżgħu.”

In-nannu Pawlu mar id-dar u issa beda jinkwieta. “Minn xiex qiegħed jibża’ tgħid?” Allura ħasibha sabiex kif jidlam joqgħod għassa. U hekk għamel. Bħas-soltu, filgħaxija kiel u beda jipprepara l-affarijiet kif kien jagħmel dejjem qabel imur jorqod.

Iżda llum tefa d-dawl tal-kċina u flok mar jorqod fil-kamra tas-sodda poġġa bilqiegħda fuq il-pultruna li kellu, b’torċ maġenbu. U qagħad jistenna fis-skiet u d-dlam.

In-nannu Pawlu kien imdorri jgħix fil-kwiet għaliex kien jgħix waħdu. Minn ġot-tieqa tal-kċina beda jidħol ftit dawl mill-bozza li kien hemm fit-triq. Wara xi ftit ħin, għajnejh kienu qagħdu għad-dlam u għalhekk seta’ jara u jagħraf il-mejda, is-siġġijiet u l-bank tal-kċina. Kollox kien kwiet u Vanni kien rieqed. Iżda wara xi siegħa n-nannu sema’ ħoss ġej mill-gaġġa u Vanni beda jiċċaqlaq, itir ġol-gaġġa u jaħbat mal-ħadid. “X’seta’ ġara?” staqsa lilu nnifsu n-nannu Pawlu. Xegħel it-torċ u mmirah lejn il-gaġġa u hemm tiela’ ma’ sieq il-gaġġa kien hemm imdendel serp iswed twil xi metru u nofs.

In-nannu Pawlu nħasad u anke s-serp, għaliex kif ra dak id-dawl jiddi f’għajnejh niżel malajr u tkaxkar għal wara l-kabord tal-kċina.

“Mela dak kien!” qal in-nannu Pawlu. Qabad il-gaġġa u ħa lil Vanni miegħu fil-kamra tas-sodda, għalaq il-bieb warajh u qal lil Vanni, “Issa tista’ tistrieħ, ħabib tiegħi, għada neħilsu minnu.” U hekk ġara, għaliex kif qam in-nannu Pawlu ċempel fejn jieħdu ħsieb l-annimali, u wara ftit ġew biex jaqbdu s-serp. Qalulu li kien jidher li dan is-serp kien għand xi ħadd u ħarab, iżda qalulu wkoll li s-serp kien wieħed velenuż u seta’ gidem lin-nannu u qatlu. Għalhekk ħaduh magħhom sabiex jieħdu ħsiebu huma, f’post aktar sigur.

Vanni qisu nduna li s-serp m’għadux hemmhekk u li l-periklu spiċċa għaliex reġa’ beda jgħanni. Tgħidx kemm ħa gost in-nannu Pawlu, iżda l-aktar għaliex ftakar f’dak li kien għallmu missieru meta kien jgħidlu, “Ibni, ieqaf u osserva. Iskot u isma’.” U dan kien ifisser biex jagħti kas ta’ x’inhu jiġri madwaru, u fejn jara li xi ħaġa ma baqgħetx l-istess, dan għandu jieħu ħsieb jara x’ġara biex jirranġaha. Iżda f’dan il-każ ma kienx kliem jew storbju, iżda silenzju. Is-skiet huwa wkoll kliem!