Tapit Oranġjo

Belinda kellha tapit oranġjo fil-kamra tagħha, fejn is-sodda. Kien it-tapit favorit tagħha. Kull filgħodu kienet tniżżel saqajha fuqu u tagħmel dik il-kwarta bilqiegħda f’tarf is-sodda, tiċċassa lejh. Tapit kollu ċrieki, waħda ġol-oħra. Oranġjo skur, oranġjo ċar, oranġjo aktar ċar...

Kien kwadru u artab ħafna. Min jaf kemm-il darba qabel tidħol torqod Belinda kienet tintefa’ fuqu, daharha mas-sodda, komda komda, tikteb, taqra, tħażżeż, jew inkella tpinġi, għax Belinda kienet tħobb tpinġi ħafna wkoll.

L-għaxqa tagħha b’xi kaxxa kuluri sbieħ taż-żejt jew tal-ilma, pinzell jew tnejn ta’ daqsijiet differenti ġo vażett bl-ilma u erħilha tpinġi fuq karti bojod, mifruxin fuq xebgħa gazzetti biex ma ċċappasx. Daqqa tpinġi siġar u fjuri, daqqa xi xmara bl-ilma nieżel minn qalb xi muntanja, u daqqa xi dar qisha tal-ħelu mdawra bil-ħaxix f’xi nofs foresta. Meta tlesti kienet tifrex it-tpinġijiet tagħha quddiem il-bieb tal-gallarija li kellha fil-kamra u hi tintefa’ fuq it-tapit tħares lejhom.

Belinda, li kellha disa’ snin, kienet tifla kwieta u l-immaġinazzjoni kienet tiġri biha. ‘Meta mmur iċ-Ċina,’ kienet taħseb, ‘nimxi fuq dak il-ħajt twil li ma jispiċċa qatt.’ Jew inkella, ‘Meta nikber żgur nitla’ dawk il-muntanji kbar bojod u għoljin li hemm l-Iżvizzera.’ Dejjem thewden. Moħħha jiġri biha. Qatt ma kienet siefret, imma kienet tħobb taqra fuq pajjiżi oħra kbar imdawra bil-ħaxix, siġar jew muntanji. Għalkemm kellha oħtha iżgħar minnha, Belinda ma tantx kienet tħobb tilgħab magħha. Aktar moħħha biex tpinġi jew taqra.

Ommha kienet tiġri warajha biex tgħinha fix-xogħol tad-dar, u ta’ sikwit kienet tinstema’ tgħajtilha, “Belinda, inti fil-kamra qiegħda? Belinda, weġibni. Mhux aħjar tiġi tgħinni ftit?” jew, “Belinda! Imma fejn hi dik it-tifla? Dejjem rasha fil-kotba. Dejjem fis-sħab, jaħasra!”

Darba minnhom oħtha ċ-ċkejkna Amanda, li kellha biss sena u xi ftit xhur, għamlet lejl tnewwaħ. Lejl li fih Belinda ma raqditx minuta. Filgħodu kompliet bil-kantaliena u ommha ppruvat minn kollox biex Amanda toqgħod kwieta. Imma kien kollu għalxejn u fl-aħħar qalet, “Ara, Belinda, ruħi, aqbad lil oħtok u ħudha dawra fil-ġnien, għax naħseb din is-sħana qed tkiddha wisq. Sadanittant nilħaq nagħmel xi tindif u nipprepara l-ikel, għax għadni m’għamilt xejn dalgħodu.”

U Belinda, bejn għax kienet tħobb tmur sal-ġnien u bejn għax kienet se tiffranka koċċ faċendi, mill-ewwel aċċettat. “Owkej, ma, ġejja, ta!”

Ommha libbset lil Amanda, poġġietha fil-pushchair u qaflitha sewwa. Belinda tefgħet ktieb ġol-basket ta’ wara daharha u ħarġet fil-parapett. Ġibdet il-grada warajha u bdiet timbotta l-pushchair u titkellem m’oħtha, “Ejja ħi, Amanda, ħa nieħdok dawra sal-ġnien. Ara issa oqgħod kwieta, tafx!”

Amanda, xħin ħasset il-frisk ħlejju ta’ filgħodu, faqqgħatilha biċċa ta’ tbissima ħelwa u kixfet iż-żewġ sinniet żgħar ta’ quddiem.

“Amanda, Amandina, tfewwaħ daqs peprina,” qabdet tkantalha Belinda waqt li mbuttat il-pushchair fid-direzzjoni tal-ġnien, li ma tantx kien ’il bogħod mid-dar. Xi nies iggustawhom u oħrajn waqfu jkellmuhom. Waslu l-ġnien, sabet bank taħt siġra u ntefgħet bilqiegħda. Għamlet xi siegħa tilgħab m’oħtha u bilkemm fetħitu l-ktieb. Ħin minnhom Amanda bdiet tbexxaq għajnejha ħelu ħelu sakemm raqdet.

Belinda ħatfet l-okkażjoni, fetħet il-ktieb u kompliet taqra fejn kienet ħalliet. Kien ktieb fuq tfal Eġizzjani li jżuru tempji sbieħ. Ktieb għat-tfal li kien imżewwaq bi tpinġijiet ta’ tempji u piramidi; piramidi kbar u kollha misteri.

Kien sar il-ħin u Belinda ħasbet li aħjar tmur id-dar, ħalli l-mamà tkun tista’ titma’ liċ-ċkejkna Amanda. Qamet, għalqet il-ktieb u rħitilha lura d-dar. Waslet u kif daħlet qalet lil ommha, “Hawn, ma, fl-aħħar raqdet Amanda. Tgħid nista’ nitla’ ftit fuq issa, jew għandek bżonn xi ħaġa?”

Ommha, li sadanittant laħqet lestiet ħafna xogħol tad-dar, tbissmitilha u qaltilha, “E, mela mur, qalbi! Grazzi talli ħadt ftit ħsieb lil Amanda dalgħodu. Mur kompli aqra jew lesti x-xogħol tal-iskola li baqagħlek.”

Kif semgħet hekk Belinda ġriet għal fuq, daħlet f’kamritha u ntefgħet fuq it-tapit oranġjo tagħha. Ix-xemx kienet qiegħda tisreġ minn wara l-ħġieġ tal-bieb tal-gallarija, u t-tapit kien miksi dawl. Belinda, b’xagħarha miġbud f’żewġ malji u liebsa xorz u flokk, ma ħassitx sħana. Intefgħet wiċċha ’l isfel fuq it-tapit, fetħet il-ktieb tal-Eġittu u bdiet taqra.

Qrat fuq il-faragħuni, fuq tempji kbar kollha kmamar ġo xulxin… meta ħin minnhom waqfet u qalet, “Kemm nixtieq li qiegħda l-Eġittu bħalissa!”

Għall-ewwel ma tatx kas, iżda mbagħad bħal donnha bdiet tħossha ddur u ddur. ‘Mammamija! X’inhu jiġri?’ qalet bejnha u bejn ruħha. Rat qisha dalma u għalqet għajnejha. ‘Naħseb għax għandi l-ġuħ,’ bdiet thewden.

Lanqas għaddew żewġ sekondi li ma bdietx tħoss riħ sħun ma’ wiċċha. Fetħet għajnejha u ċċassat! Ma kinitx fil-kamra. Ma kinitx fejn is-sodda tagħha. Kienet fil-beraħ, f’ħafna dawl fuq it-tapit oranġjo, li kien fuq ir-ramel!

‘Hawn fejn qiegħda?’ Kullimkien ramel isfar. Sħana qawwija. Baħħ, waħidha f’nofs bajja. Imma sekonda, hawn m’hawnx baħar. Belinda reġgħet għalqet għajnejha, għorkithom tnejn u reġgħet fetħithom. ‘Imma x’ġara? Jien fejn qiegħda hawn?’ Dal-ħsibijiet, u aktar, bdew għaddejjin ġo moħħ Belinda.

Riħ sħun beda jtajjar ir-ramel. Belinda qamet minn fuq it-tapit, farfritu, irrumblatu u bdiet tipprova timxi fuq ir-ramel safrani. Kif għamlet żewġ passi bdiet tisma’ xi għajjat. Rat ġemel. Le, tnejn resqin lejha. Kien hemm anki xi nies imgeżwrin b’qishom ċraret mixjin maġenb l-iġmla. Għajnejhom biss kienu jidhru.

“Ojj! X’inti tagħmel hawn?” għajjat wieħed minnhom. “Jaqaw intlift?”

Il-ġemel beda riesaq lejha, jiftaħ u jagħlaq ħalqu, jomgħod. Iż-żewġt irġiel, li dehru li kellhom naqra żmien mhux ħażin, ukoll resqu lejha.

Belinda, b’ħalqha miftuħ, baqgħet tħares lejhom.

“Jaqaw ma tafx titkellem?” reġa’ għajjat l-istess raġel.

Bilkemm setgħet tħares lejh. Ħarset ’l isfel lejn saqajha. Imma din x’kienet liebsa? Kienet liebsa sandli kannella. Kienet imdawra biċ-ċraret. Għolliet idha u anki fuq xagħarha kellha qisu maktur. Dan kif? Belinda lanqas felħet titkellem.

“Ara, ħi, ejja itla’ fuq il-ġemel ħalli neħduk ħdejn il-qassis il-kbir, ħalli jiddeċiedi hu x’nagħmlu bik.”

Fil-pront it-tieni raġel tella’ lil Belinda fuq dahar il-ġemel, rikeb huwa wkoll u komplew isuqu l-iġmla fuq ir-ramel.

Sadanittant Belinda bdiet tipprova żżomm sod, li ma tmurx taqa’. U kemm kellu riħa stramba u tinten dan il-ġemel!

F’tarf ta’ dan il-baħħ enormi, dehret piramida għolja f’forma ta’ trianglu bil-ponta fuq nett. Aktar ma bdew javviċinaw il-piramida, aktar bdiet tara nies oħra ħdejha. Bdiet tara tined kbar. Nies imgeżwrin u libsin ħafna drapp kulurit. Nisa kbar, oħrajn iżgħar, u anki tfal imdawrin ma’ qisha ħuġġieġa.

Kif waslu ħdejn it-tined iż-żewġ iġmla waqfu. L-irġiel niżlu u t-tieni wieħed għolla jdejh biex jgħin lil Belinda tinżel ukoll. Kif kienet għadha fuq il-ġemel bdiet tħares lejn il-piramida għolja, mibnija b’ġebel griż enormi. Aktar iġmla bdew resqin lejhom. Fuq ġemel minnhom rat raġel xiħ bit-turban iħares lejha.

F’daqqa waħda Belinda ħasset biża’ kbir u qabdet twerżaq, “Maa, maa! Ejja għalija, ma!” Pruvat tinżel, iżda ħej, saqajha sabu l-vojt u ħassitha nieżla għal isfel. Bumm! X’tisbita dik! “Ajma rasi! Aħħ!”

Belinda fetħet għajnejha. Kienet fil-kamra tagħha. X’ġara? Reġgħet ħarset lejn ħwejjiġha. Ma ratx ċraret imgeżwrin, imma xorz u flokk. U kienet bilqiegħda fuq it-tapit oranġjo u mhux fir-ramel. Qamet bilwieqfa. ‘Imma jien ħlomt?’ bdiet thewden Belinda. ‘Jew x’ġara eżatt? X’taħwida din! ‘Bilfors li ħlomt,’ bdiet thewden. Iżda minuta, dak fuq it-tapit… Dak x’inhu? Niżlet kokka u ħassitu b’idha. Kien kollu ramel...