Simboli u Speċi Nazzjonali

Il-bandiera nazzjonali ta’ Malta hija bajda u ħamra.
Fuq l-abjad tal-bandiera nsibu l-George Cross, li ngħata fit-Tieni Gwerra Dinjija minħabba l-qlubija li l-Maltin urew matul l-attakki tat-Taljani u l-Ġermaniżi.
Skont il-leġġenda l-ilwien tal-bandiera bdew jintużaw wara l-miġja tal-Konti Ruġġieru.

Il-poeta nazzjonali huwa Dun Karm Psaila.
Dun Karm twieled u għex ġewwa Ħaż-Żebbuġ.
Kont taf li Dun Karm beda jikteb l-ewwel poeżiji tiegħu bit-Taljan?
L-ewwel poeżija tiegħu bil-Malti kitibha fl-1912. Din kien jisimha Quddiem Xbieha tal-Madonna.

L-Innu Malti huwa l-innu nazzjonali.
Dan l-innu huwa miktub f’forma ta’ talba lil Alla.
L-Innu Malti kkomponieh il-Maestro Robert Samut u kitbu Dun Karm Psaila.
Kont taf li l-Innu Malti ndaqq fil-pubbliku għall-ewwel darba fis-27 ta’ Diċembru fl-1922?

L-għasfur nazzjonali huwa l-merill.
Il-merill insibuh l-aktar f’xi xifer ta’ rdum qrib il-baħar.
Il-merill raġel huwa blu filwaqt li l-mara hija kannella skur.
Kont taf li l-merill iħobb joqgħod għal rasu u mhux fi qtajja’ ma’ merilli oħra?

Il-kelb nazzjonali huwa l-kelb tal-fenek.
Il-kelb tal-fenek hu kannella ħamrani kollu kemm hu iżda jeżistu klieb tal-fenek b’xi dabra bajda fuq ġisimhom.
Dan il-kelb huwa magħruf għall-istatura rqiqa, il-ħeffa, il-wiċċ tawwali u l-widnejn ippuntati tiegħu.
Kont taf li d-dilettanti tal-kaċċa tal-fniek jippreferu kelb kollu kannella? Dan sabiex il-fniek ma jarawhx meta d-dawl tal-qamar jirrifletti fuq l-abjad tal-kelb.

Il-ħuta nazzjonali hija l-bużaqq.
Il-kulur jikxef is-sess tal-ħuta billi r-raġel huwa kannella fl-aħdar b’żaqq bajdanija filwaqt li l-mara hija iktar ċara.
Din hija ħuta kemxejn żgħira, li tikber madwar 10 ċentimetri biss.
Fatt kurjuż dwar din il-ħuta huwa li din hija l-unika ħuta f’Malta li tgħix kemm f’ilma mielaħ kif ukoll f’ilma ħelu.

Il-qabru huwa ħlejqa oħra li ngħatat it-titlu ta’ speċi nazzjonali.
Dan il-krustaċju għandu kulur griż u aħdar b’xi postijiet bl-isfar u l-oranġjo.
Il-qabru nsibuh l-aktar fejn ikun hemm l-ilma ħelu iżda jgħix ukoll ħdejn l-għadajjar u n-nixxigħat, fl-inħawi tal-Baħrija u l-Imtaħleb f’Malta u l-Lunzjata f’Għawdex.
Il-qabru huwa pjuttost rari u n-numru tiegħu qiegħed dejjem jonqos minħabba t-tniġġis fl-ilma, nuqqas ta’ ilma fin-nixxigħat u l-qbid tiegħu mill-bniedem.

Il-pjanta nazzjonali hija Widnet il-Baħar.
Bħalma jixhed isimha, din il-pjanta tikber f’xifer l-irdumijiet. Minħabba l-valur kulturali tagħha din il-pjanta ġieli narawha wkoll f’xi ġonna pubbliċi jew f’xi roundabouts.
Il-fjura hija ta’ lewn vjola u tikber sa madwar 60 ċm.

Is-siġra nazzjonali hija s-siġra tal-għargħar.
Din is-siġra ġejja mir-razza taċ-ċipress u din tħaddar is-sena kollha.
F’Malta s-siġra tal-għargħar kienet saret rari ħafna imma issa, minħabba li tħawlu aktar, in-numru tagħha qed jiżdied.
Interessanti l-fatt li xi postijiet bħal Ħal Għargħur u San Ġwann tal-Għargħar ħadu isimhom minn din is-siġra, aktarx għax tul is-snin kienet tikber b’abbundanza fihom.