Raħal tan-Nani 24: Bomblu u l-Flixkun Inbid

Kienet waslet il-festa fir-raħal tan-nani. Kulħadd kien għaddej jipprepara għaċ-ċelebrazzjoni kbira li kellha ssir dak il-lejl. In-nani kienu se jinġabru fid-dar il-kbira fejn kienu jiltaqgħu s-soltu. Fin-nofs tal-kamra kien hemm fejn iqabbdu n-nar, kemm biex isaħħnu l-ikel u kemm biex ikollhom is-sħana billi kienet qiegħda tagħmel wisq kesħa.

It-tfal kellhom eċitament żul minn hemm għax minbarra d-daqq, iż-żfin u l-ikel, f’din il-lejla kienu jaqilgħu xi rigal ukoll. Bomblu kien fis-seba’ sema, għax kien se jkollu ikel kemm irid u ħadd ma kien se joqgħod jgħajru li qiegħed jitħanżer għax dakinhar kulħadd kien jiekol iżjed mis-soltu.

Kien wasal filgħaxija u Bomblu kien qiegħed iħuf ’l hawn u ’l hemm jara x’kienu sajru. Bl-irwejjaħ li kienu ħerġin minn kull dar kienet se taqagħlu żaqqu bil-ġuħ. Wara li ttawwal f’xi sebat idjar u ra li kien hemm in-nani biżlin ilestu l-affarijiet, ittawwal fl-aħħar dar fit-triq fejn ma kien jidher ħadd.

Reġa’ ttawwal sew biex ikun ċert li ma kien hemm ħadd, imbagħad ħabbat il-bieb għal li jista’ jkun, imma ħadd ma wieġbu. Fetaħ il-bieb bil-mod u daħal. Beda jħares madwaru u xħin ra li tassew ma kien hemm ħadd, daħal fil-kċina għax minnha kienet ġejja riħa tfuħ taqsamlek qalbek! U bir-raġun, għax kien hemm turtiera qassatat u pastizzi tal-irkotta u tal-piżelli.

Ħataf tnejn u ressaqhom ftit biex ma jindunawx li kien hemm in-neqsin. Wara li kielhom qabdu l-għatx. Ħares madwaru imma kulma ra kien flixkun inbid abjad. U iva, billi jieħu belgħa nbid ma kien se jiġri xejn! “Aħħ, kemm hu tajjeb u ħelu! Ħa nieħu belgħa oħra.” U minn belgħa spiċċa xorob mhux ħażin!

F’daqqa waħda sema’ lil xi ħadd riesaq lejn id-dar. Ħares madwaru u ra bieb ieħor. Fetħu u sab ruħu f’kamra tas-sodda. Sema’ tnejn jitkellmu u jgħidu li kien sar il-ħin li tibda l-festa u li aħjar jieħdu l-ikel u x-xorb. Bl-għaġla lanqas indunaw li l-flixkun inbid kien fih in-nieqes!

Sadanittant, Bomblu beda jħoss rasu ddur bih. Ħares lejn is-sodda u ħaseb li aħjar jistrieħ ftit fuqha! “Żgur se nimrad x’waħda din!” Intefa’ fuq is-sodda u wara ftit beda jonħor!

Il-festa bdiet u kulħadd kien qiegħed jiekol u jieħu pjaċir. Għall-ewwel ħadd ma nduna li Bomblu ma kienx hemm. Bajtru beda jfittxu għax ma seta’ jarah imkien! Imma mbagħad wieħed min-nani qal li kien rah xi ftit qabel dieħel fid-dar li tinsab fit-tarf tat-triq. Bajtru telaq ħdejn id-dar, fetaħ il-bieb u daħal. Beda jgħajjatlu imma ħadd ma wieġeb. Mela fejn kien mar? F’daqqa waħda sema’ ħoss ġej minn wara bieb magħluq. Bexxaq il-bieb u hemm ra lil Bomblu mitfugħ fuq is-sodda jonħor kemm jiflaħ!

Bajtru beda jipprova jqajmu imma Bomblu beda jgerger u jgħidlu jħallih bi kwietu. Xħin ra li ma rnexxilux iqajmu, Bajtru telaq ifittex lil omm Bomblu ħalli tiġi tara xi ġralu. Ommu ġiet u bdiet iċċaqilqu, imma kif resqet viċin bdiet ixxomm riħa ta’ nbid taqsam.

“Bomblu, jaqaw xrobt l-inbid? Qum ħa mmorru d-dar tagħna.” Kif qaltlu hekk, bl-għajnuna ta’ Bajtru rnexxielha tqajmu fuq saqajh. Imma malli prova jimxi beda jixxengel ’l hawn u ’l hemm. “Int fis-sakra! Mela kemm xrobt inbid, x’waħda din!”

Telqu bih lejn id-dar u ħallewh rieqed. L-għada filgħodu Bomblu qam b’uġigħ ta’ ras kbir li ma felaħx jiftaħ għajnejh. Xħin daħlet ommu qalilha b’dak li kien għamel il-ġurnata ta’ qabel u meta ratu mbikkem ma tantx għajtet miegħu.

“Tlift festa, daħħakt lil Bajtru bija u għandi rasi se tinqasam! Żgur ma nerġax inħalli lil moħħi jikkmandani!” qalilha ddispjaċut Bomblu.