Raħal tan-Nani 23: Rożetta u l-Kutra tas-Suf

Kienet qiegħda toqrob l-Ewwel tas-Sena u fir-raħal tan-nani kien hemm stennija kbira. Kulħadd kien qiegħed jaħseb u jipprepara xi ħaġa biex jagħtiha rigal lil ħbiebu u lil tal-familja. Rożetta kienet tgħallmet taħdem is-suf bil-labar u din is-sena kienet lestiet ġersi sabiħ lil oħtha Vjoletta u ieħor lil Ferfuxa, it-tifla ta’ Lanġasu l-iskarpan. Lin-nanna Ħarruba kienet ħadmitilha xall sabiħ u jsaħħan.

Issa kienet qiegħda taħdem kutra sabiħa għal fuq is-sodda ta’ Żebbuġu. Kienet qalet lin-nanna Ħarruba biex tagħmlilha kemm tista’ suf b’kuluri differenti għax il-kutra kienet se tagħmilha b’faxxi kkuluriti. Kienet diġà ħadmet tliet biċċiet twal twal li jgħattu l-wisa’ tas-sodda. Ħadmet biċċa bajda, biċċa griża u oħra sewda. Issa kienet kważi lestiet biċċa oranġjo. Dalwaqt kien se jkollha iktar minn nofs il-kutra lesta.

F’din il-ġurnata Rożetta kienet weħedha fil-kamra tagħha. Bdiet tieħu gost iċċekċek il-labar u tara x-xogħol tiela’ u l-biċċa kutra tikber. Kif kienet fil-kwiet, semgħet tektik mal-ħġieġa tat-tieqa. Kien il-ħabib tagħha Rossu l-Pitirross fil-ħoġor tat-tieqa jterter bil-bard. Marret tiġri, fetħet it-tieqa u Rossu daħal sparat għas-sħana li kien hemm fil-kamra.

“X’kesħa hemm barra! Hemm x’inti tagħmel, Rożetta?” qalilha Rossu.

“Qiegħda naħdem kutra biex nagħtiha lil Żebbuġu. Din ix-xitwa qed tagħmel kesħa xxoqq il-għadam u naħseb li jieħu gost biha. X’taħseb?”

“Imma dik mhix żgħira biex tgħattilu s-sodda! Mhix wiesgħa biżżejjed,” reġa’ Rossu jħares lejn il-biċċa li kienet qiegħda taħdem.

“U żgur li din żgħira! Imma din biċċa mill-kutra, ħa nurik l-oħrajn. Ma tistax taħdem kutra sħiħa, inkella kif se toqgħod fuq il-labar? Qiegħda naħdem strixxa strixxa u se nagħmilhom kuluri differenti. Ara kemm ġejja sabiħa!”

U kif qalet hekk ħarġet il-biċċiet l-oħra u firxithom fuq is-sodda tagħha. Strixxa bajda, ħdejha l-griża, imbagħad is-sewda u fl-aħħar poġġiet l-oranġjo li kienet qiegħda taħdem u li kienet kważi lesta. Rossu baqa’ jħares lejn il-kutra li kien fiha iżjed minn nofsha lesta.

“Hekk mod ieħor, kemm ġejja sabiħa, ħej! Kemm sirt taf taħdem! Kieku kelli sodda kont ngħidlek tagħmilli waħda!” qalilha bi tbissima.

F’daqqa waħda nstema’ xi biki u storbju ġej minn barra. Rożetta telqet kollox u ħarġet tara x’kien qiegħed jiġri. Sabet lil Ferfuxa, it-tifla mqarba ta’ Lanġasu, tibki mdawra minn xi tfal oħra.

“Xi ġralek, Ferfuxa?” qaltilha Rożetta.

“Għax il-qtates, l-Iswed u Fuxu, iġġieldu u Fuxu ħarab u issa ma nistax insibu,” qaltilha tolfoq.

“Imxi ħa ngħinek tfittxu. Toqgħodx tibki. Dak żgur mar jistaħba xi mkien,” qaltilha Rożetta. U telqu jfittxuh.

Fuxu ma kienx ’il bogħod! Kien mistoħbi wara kantuniera u kif rahom jitilqu telaq jiġri u daħal fl-ewwel bieb li sab miftuħ. Kienet il-kamra ta’ Rożetta. Daħal taħt is-sodda jistaħba u wara ftit ra ballun oranġjo ħdejh fl-art. Wara li qagħad iħares ftit lejh beda jilgħab bih. Qabad iġebbed fih u jdur mal-kamra. Xħin kien qed iħoss il-ballun jiġbed lura beda taparsi jirrabja u spiċċa jġebbed kemm jiflaħ. Is-suf inqala’ minn mal-labar u beda jinfetaq.

Xħin induna b’dan Rossu l-Pitirross tar għal fuq Fuxu u prova jigdmu biex jerħi l-ballun tas-suf, imma Fuxu aktar ifferoċja u, f’kemm ilni ngħid, ix-xogħol li Rożetta kienet ilha għaddejja bih xi ġimgħa sarilha suf!

Xħin ra li ma seta’ jagħmel xejn, Rossu tar ’il barra jfittex lil Rożetta. Ma damx ma sabha ma’ Ferfuxa, ifittxu lil Fuxu. Malli Rossu qalilha x’kien qiegħed jagħmel Fuxu, telqet tiġri b’Ferfuxa tiġri warajha. Xħin daħlet fil-kamra u rat dak id-diżastru kollu, infaqgħet tibki u togħxa. Ferfuxa qabdet lil Fuxu u telqet tiġri ’l barra tirrabja u tgħajjat miegħu kemm tiflaħ!

Rossu beda jipprova jfarraġ lil Rożetta u jgħidilha li ma kienx hemm x’tagħmel. Kellha tieħu paċenzja u terġa’ taħdimha. Wara li waqfet tibki bdiet tkebbeb is-suf. Meta kebbitu kollu reġgħet bdiet taħdem, forsi sal-Ewwel tas-Sena tkun lestietha.