Perseus u Andromeda

Il-ġirien jgħajtuli Andy tal-istatwi tal-ġebel. Ir-raġel tiegħi, Perseus, delettant tal-istatwi u mlieli d-dar kollha.

Mhux minn dejjem kienu jsejħuli Andy, tafux. Aqta’ x’fettlilhom isemmuni ommi u missieri? Andromeda! Jaqq! Imma kif qatt ma daħlilhom f’rashom li meta dħalt l-iskola u kienu jgħajtuli ismi fir-rassenja kulħadd kien se jinfaqa’ jidħaq? Forsi ġieli rajtu xi pittura tiegħi bi ftit li xejn ilbies fuqi, marbuta b’katina mal-blat bil-baħar iħabbat. Tagħtux kasha dik. Jien kelli ftit tad-drapp fuqi.

Imma aħjar nintroduċi lili nnifsi u nibdielkom mill-bidu, għax inkella ma tifhmu xejn. Mela, twelidt l-Etjopja, bint Ċefews u Kassjopea, li kienu r-re u r-reġina tal-post. Għall-ewwel missieri stkerrahni ftit. “Għal din, dan l-għaġeb kollu?” qal lil ommi malli rani għadni nitwieled. U xi stenna? Li jara xi prinċipessa bil-kuruna fuq rasha kollha riħa ta’ terra?

Ommi ħadet għaliha bil-kbir. Għandu jkun l-irġejjen minn dejjem kienu jieħdu għalihom.

“Int stenna ftit,” qaltlu, “ħa taraha tikber u tisbieħ! Għad tkun l-għira tal-allat dit-tifla.”

U tant ħaslitni fil-ħalib tal-ħmir u kienet tidlikli xagħri bl-ifjen xema’ tan-naħal li xi ftit tal-ġmiel ħallew fuqi. Meta tfarfart ftit kont nisma’ lil ommi tiftaħar bija kuljum. Saħansitra bdiet tgħid li kont isbaħ min-Nerejdi, ulied Nerews u Doris. Dawn in-Nerejdi kienu n-ninfi tal-baħar. Qatt ma kont iltqajt magħhom imma kont nismagħhom jistagħġbu bi ġmielhom. M’għandniex xi ngħidu, jien intefaħt xi ftit imma mbagħad ommi bdiet tgħaġġibha u bdiet tgħid li kont isbaħ mill-mara ta’ Posejdon, l-alla tal-baħar.

Jekk ommi kienet tieħu għaliha mix-xejn, dan Posejdon ma kienx inqas minnha. Tgħidx x’maltempata qajjem. Il-mewġ kbir ħabbat mal-palazz tagħna. Għalxejn mar missieri jgħidlu li ommi lsienha twil u li kelma ma żżommhiex u li tgħaġġibhom. Dan Posejdon ma riedx jaf. U aktar ma tkarrablu missieri aktar baqa’ jieħu għalih. Bħala kastig bagħat dragun fl-ibħra tal-Etjopja biex jiekol il-popolazzjoni kollha. Missieri kienet se ttih rasu. Kien iqatta’ ljieli jippassiġġa fil-palazz biex jara kif kien se joħroġ minn dal-biċċa inkwiet. Fl-aħħar qatagħha li jmur ikellem lil Żews, alla ieħor ftit imqareb. Żews kien messu b’wirt is-smewwiet u kellu ħafna poter. Kien jgħammar fuq il-Muntanja Olimpus. Lil ommi niftakarha tgħid li tneħħilu l-arja li kellu, Żews kellu qalbu f’idu u kien iħenn għal min jitolbu ħniena. Jista’ jkun li missieri sema’ minnha għax mar għandu għal konsulta. Iżda meta daħal lura l-palazz, missieri kellu geddum sal-art.

Żews qallu li biex jeħles lill-poplu minn taħt idejn id-dragun kellu joffri lili bħala sagrifiċċju. Imsarni niżlu f’saqajja. Kont diġà qed nara lili nnifsi barbikju, mixwija fuq xi gradilja. Hekk kont smajt fil-lezzjonijiet tal-preistorja, li joffru t-tfajliet bħala sagrifiċċju billi jaħarquhom. Kieku stajt ħrabt xi mkien ’il bogħod iżda kont mgħassa l-ħin kollu. L-għada filgħodu ommi u missieri ħaduni sa ħdejn il-baħar. Ma qalux kelma fit-triq u qalbi ħebritni li kienet se tmissni xorti ħażina. Minnufih ħarġu n-Nerejdi mill-baħar li qabduni u żammewni biex jorbtuni mal-blat b’biċċa katina. Semmejtilkom ix-xbihat tiegħi fil-pittura. L-artist li ġabu biex ipittirni fettillu jpitter ix-xbieha tiegħi bla ħwejjeġ, biex mingħalih ibigħ il-pittura bi prezz għoli. Xagħri twil u msebbel pittirhuli ssettjat qisni għadni kif ħierġa mingħand il-parrukkier tal-palazz. Għamilni b’ġilda bajda silġ mingħajr imqar girfa. Kif għedtilkom diġà, dik mhix jien! Bit-taqbid li tqabadt ingrift kollni u benġilt ġismi kollu. Xagħri tħabbel u sar qisu kobba suf tan-nagħaġ imħabbla. Ilbiesi qattajtu kollu. Mhux bilfors! Daqskemm bdejt nagħti bis-sieq u nissara! Imma mhux tassew li ħallewni għarwiena! Dak il-pittur għamel kollox għall-flus. Veru hawn min m’għandux kuxjenza!

Għall-ewwel in-Nerejdi qagħdu għassa miegħi, imma tant werżaqt li kellhom jerġgħu jaqbżu fl-ilma biex ma jisimgħunix. Kienet esperjenza tassew tal-biża’. Hekk kif beda riesaq il-lejl bdejt nara rjus ta’ skeletri jixegħlu madwari. Min jaf kif se jmexmixni d-dragun, ħsibt. U aktar bkejt u werżaqt. Naħseb kien dan it-twerżiq tiegħi li ġibed l-attenzjoni ta’ ġuvnott kemxejn stramb. Fuq rasi rajt figura li għall-ewwel ħsibtha għasfur rari. Mhux għax kelli moħħ l-għasafar dak il-ħin, imma kif beda jtir, hekk, qisu fis-sakra dan l-għasfur malajr ġibidli l-attenzjoni. Hekk kif beda riesaq lejja indunajt li kien daqsxejn ta’ ġuvni sbejjaħ liebes sandli bil-ġwienaħ, b’xabla ftit mgħawġa u basket wara dahru. Ma nafx x’fettillu jiġi s’hawn għax ma kienx żmien sabiħ għat-turiżmu.

Il-ġuvni waqa’ b’tisbita quddiemi. Bilfors li kien xaħħam biex tawh il-liċenzja ta’ pilota għax mid-dehra ma kienx jaf itir sew. Iddarrast xħin smajt id-daqqa li ħa mal-blat iebes imma l-ġuvni qam u tfarfar ftit qisu mhux hu. Resaq lejja u tani daqqa t’għajn naqra twila.

“X’int tħares?” għajjatt xi ftit imfantsa. “Qatt ma rajt tfajla marbuta mal-blat b’katina? Ejja, fittex aqlagħni minn hawn!”

Il-ġuvni nħasad. Ma kienx għaddieli minn rasi li seta’ ma kienx jaf jitkellem bil-lingwa tiegħi. Imma b’għaġeb kbir tiegħi beda jkellimni.

“X’jismek, tfajla sabiħa?” staqsieni kollu ħlewwa. Dak il-ħin ħassejt saqajja jsiruli ġeli. Marritli r-rabja kollha u weħilli lsieni. Dan xi alla bagħtu, ħsibt.

Ma domtx ma ġejt f’tiegħi xħin il-baħar beda jqum u mostru ikrah beda jgħolli rasu mal-mewġ. Iġġammjajt fil-post. Id-dragun kien sarlu ħin l-ikel.

Il-ġuvni xejn ma beża’.

“Dawwar ħarstek in-naħa l-oħra,” ikkmandani b’vuċi awtorevoli. Obdejtu bħal mitlufa. Smajt id-dragun jagħmel ħsejjes qisu serp ġgantesk. Ħassejt il-fjamma tixwi ħierġa minn ħalqu. Bżajt għaż-żagħżugħ qalbieni. Min jaf kienx se jieklu? U jekk jibqa’ bil-ġuħ, jien kont se nispiċċa deżerta.

Wara ftit, kollox siket. Għalaqt għajnejja. Ħsibt li se nsib l-għadam tal-ġuvni ħdejn saqajja. Dawwart ħarsti bil-mod, kollni mbeżżgħa. Fuq il-blat ħdejja, minflok għadam, nara biċċiet mid-dragun tal-ġebel. Ma stajtx nifhem. Id-dragun kien sar statwa tal-ġebel li nkisret f’mitt biċċa. Rasu kienet ħdejn saqajja, b’ħalq daqs dinja miftuħ lest biex jaħtaf bukkun ta’ bniedem. Il-ġuvni kien qed ipoġġi ras mimlija sriep ġol-basket. Imbagħad ġie jiġri ħdejja, ħafif u b’daqqa waħda tax-xabla qatagħli l-ktajjen. Intfajt fuqu ngħannqu u nibki. Imbagħad inġbidt lura għax stħajt ftit, imma hu ma kienx jidher li ddejjaq.

Ħadni d-dar għand il-ġenituri. Sirt naf li kien jismu Perseus, iben Żews. Ġol-basket kellu ras il-Medusa. Medusa kienet xebba sabiħa ħafna fi żmienha, imma naħseb kienet ftit minfuħa biha nnifisha għax bdiet tinnamra ma’ Posejdon, dak l-għaref li bagħat id-dragun fl-ibħra tagħna. Bħala kastig, martu bidlitha f’mostru b’ħafna sriep ħerġin minn rasha. Kull min kien iħares lejha kien jinbidel u jsir tal-ġebel.

Il-qalbieni Perseus kien irnexxielu jaħsdilha rasha, mingħajr ma ħares lejha. Kien jilħaqlu ħafna għaliex ma ħarisx dirett lejha imma lejn ir-rifless tagħha fit-tarka tiegħu. Xejjer ix-xabla u b’daqqa waħda qaċċat ras il-Medusa l-vera. B’hekk kien qatlu lid-dragun. Kien urieh ras il-Medusa. Id-dragun dlonk sar tal-ġebel u jien kont ħielsa. Bqajt inħares lejh issummata nisma’ din l-istorja. Dal-ġuvni saħħarni mal-ewwel darba li rajtu.

Bilkemm ridt nemmen xortija meta lil Perseus smajtu jgħid lil missieri li ried jiżżewwiġni. Kellu d-dinja bija u allaħares min ikollu x’jgħid miegħi għax Persi tiegħi kien jurih ras il-Medusa u dlonk isir tal-ġebel. Morna noqogħdu f’Tinis u kellna seba’ subien u tifla. Dawn it-tfal ma nistax insib tarfhom. Moħħhom biex jilbsu s-sandli ta’ missierhom u jtiru minn biċċa għamara għal oħra. Id-dar tagħna mimlija statwi tal-ġebel, li tistgħu tobsru kif ġew għandna.