Monto Jitlef il-Qabża

F’bosk kbir fil-kontinent tal-Awstralja kienu jgħixu grupp ta’ kangarus. Kif kulħadd jaf, il-kangarù kapaċi jaqbeż qabża kbira ħafna, twila disa’ metri. Kull kangarù jibda jitgħallem jaqbeż hekk kif jibda, xi kultant, joħroġ mill-borża tal-omm. Iżda dan ma nistgħux ngħiduh għal Monto, kangarù kemxejn mistħi. Kien kollu ta’ xejn li kien jipprova jaqbeż għax ma kienx jirnexxilu!

Skont ommu, meta kien għadu ċkejken kien tgħallem jaqbeż, iżda jum wieħed qam u sab li ma kienx jista’ jaqbeż. Kien tilef il-qabża! Kemm kien jiddispjaċih xħin kien jara lil sħabu jaqbżu u jmorru min-naħa għall-oħra f’tebqa t’għajn. Kemm xtaq imur jaqbeż u jilgħab magħhom, minflok jimxi bil-mod qisu xi fekruna!

Kuljum mas-sebħ kien imur ifittex forsi jsib il-qabża li kien tilef, imma issa kien għoddu qata’ qalbu li xi darba għad isib dik l-imbierka qabża. Ma kienx hemm post li ma fittixx fih. L-ewwel ma fittex kien fil-madwar, forsi kienet waqgħetlu hemm, iżda ma sabhiex. Fittex ukoll wara kull siġra u blata li kien hemm fit-territorju tal-kangarus, imma hawn lanqas ma sabha.

Ma’ kull min kien jiltaqa’ kien jistaqsih jekk rax il-qabża tiegħu, iżda ħadd ma kien raha. Monto kien sar kangarù dejjem bil-geddum. La kien baqa’ jitbissem u jitkellem u lanqas kien baqa’ jilgħab, u beda wkoll iwarrab l-ikel li tħejjilu ommu. Il-ġenituri tiegħu bdew jinkwetaw ħafna u ppruvaw ifehmuh li, għalkemm ma kienx jaf jaqbeż, xorta waħda kienu jħobbuh. Ma kienx jimporta għalihom li kien differenti; huwa xorta kien it-tifel tagħhom.

Imma minkejja dan il-kliem sabiħ, Monto xorta waħda baqa’ mdejjaq. “Kemm nixtieq insib il-qabża li tlift!” kien itenni ta’ kuljum. “Kemm nixtieq inkun naf fejn tliftha ħa mmur għaliha,” kien jaħseb bejnu u bejn ruħu. Darba kien għaddielu l-ħsieb li jmur sa ħdejn ix-xmara forsi l-qabża tiegħu kienet marret hemm. Kien dam jumejn biex mar sa fejn ix-xmara u lura, iżda l-qabża baqa’ ma sabhiex.

Darba waħda bużnannuh Niko sejjaħlu ħdejh għax kellu xi jgħidlu. Monto ma tantx kellu aptitu, għax kien ċert li dan kien se jagħmillu xi prietka bħalma kienu jagħmlulu ta’ sikwit il-ġenituri tiegħu. Xeba’ jisma’ li hu xorta kien kangarù sabiħ u maħbub minkejja li ma kellux qabża. “Min jaf li kieku huma jitilfu l-qabża tagħhom, kif iħossuhom?” kien jistaqsi lilu nnifsu Monto.

Bil-lajma kollha Monto wasal fejn bużnannuh u b’rasu baxxuta qagħad jistenna x’kellu xi jgħidlu. Niko ma tilifx żmien u b’leħen sod qallu, “Monto, naħseb naf fejn tista’ ssibha l-qabża tiegħek!”

Monto għolla rasu fil-pront u b’għajnejh jixegħlu staqsa lil bużnannuh, “Tassew? Fejn, nann, ħa mmur issa stess?”

Il-bużnannu spjegalu fejn ried imur. Qallu li kellu jsib blata kbira ħafna, jitla’ fuqha u minn hemm fuq kellu jara l-qabża tiegħu. Ferħan se jtir Monto rringrazzjah u dak il-ħin stess telaq ’il fejn qallu. Qatt ma jiftakar li kien mexa daqshekk bil-għaġla. Wasal fejn il-blata u tela’ fuqha. Iżda li ma kienx qallu bużnannuh kien li l-blata kienet tiżloq ħafna. U kif Monto tela’ fuqha żżerżaq għal isfel min-naħa l-oħra tal-blata.

Il-povru Monto ġie eżatt f’nofs arbuxella tax-xewk! X’qabża ħa hekk kif ħass dak it-tingiż kollu mal-warrani! Kemm waħwaħ bl-uġigħ! Beda jaqbeż ’l hawn u ’l hinn! U xħin intebaħ li kien qed jaqbeż, Monto nesa l-uġigħ u beda jaqbeż bil-ferħ. Minn dakinhar Monto ma waqafx jaqbeż!