Mirka u l-Kotba

Fil-qalba ta’ foresta kbira fil-Kanada kien hemm familja ta’ orsijiet intelliġenti daqs il-bnedmin. Kienu kważi jagħmlu kollox bħall-bnedmin, ħlief li jiġġieldu bejniethom. Mirka, waħda mill-orsijiet iż-żgħar, kienet tħobb taqra ħafna u kienet tippreferi toqgħod għad-dell taħt xi siġra taqra milli tilgħab ma’ sħabha.

Il-qari kien l-aktar passatemp favorit ta’ Mirka u tista’ tgħid li kull ċans li kien ikollha kienet dejjem taqbad ktieb f’idha u ma titilqux qabel taqrah minn qoxra sa qoxra. Il-qari kien jeħodha f’dinja oħra. Daqqa fi żmien l-imgħoddi, daqqa fil-fantażija u daqqa f’xi pajjiż imbiegħed. Xi minn daqqiet kienet taqra wkoll kotba dwar l-annimali, l-għasafar jew il-pjanti. U dejjem kienet titgħallem xi ħaġa ġdida! Imma l-aktar li kienet tħobb kienu l-kotba dwar il-bnedmin għax dawn kienu jaffaxxinawha!

Jum wieħed iddeċidiet li tmur tara ssibx xi ktieb interessanti mil-librerija, li kellhom fl-għar qrib fejn kienet tgħix. Mhux l-ewwel darba li kienet ħadet ktieb mill-ixkaffi ppakkjati tal-librerija tad-dar tagħha. Mirka bdiet tifli l-kotba wieħed wieħed. Kien hemm kotba żgħar, kotba kbar, kotba rqaq u kotba ħoxnin. Kotba bl-istampi u kotba antiki li kienu tal-bużnanniet tagħha. Mirka ma setgħetx tiddeċiedi liema ktieb minnhom kienet ser tagħżel. Tgħid ktieb tal-istorja jew ktieb dwar l-istilel? Tgħid ktieb tal-fantaxjenza?

Għajnejha bdew jingħalqu, u bla ma taf kif spiċċat mimduda fl-art. Għajnejha malajr marru biha u raqdet. Mela kif kienet rieqda semgħet lil xi ħadd isejħilha biex tqum.

“Qum, Mirka, qum u agħżel lili,” kien qed isejħilha ktieb kbir u antik lewn id-deheb. “Jiena nkabbarlek l-għarfien dwar l-istorja tal-Kanada u b’hekk tkun taf aktar dwar art twelidek.”

“Le, Mirka, le. Lili agħżel,” qabeż fil-pront ktieb irqiq safrani. “Jiena nżommok infurmata dwar l-ispazju u l-pjaneti, u b’hekk tkun taf kemm hu kbir l-univers.”

“Tagħtix kashom lil dawn,” iddeffes fin-nofs ktieb ċkejken u kemxejn oħxon. “Jekk taqbad lili ma titlaqnix minn idejk qabel tispiċċa taqrani, għax jien mimli avventura.”

“Ħaħa!” instema’ ktieb ieħor mill-ixkaffa ta’ fuq. “Int gideb biss fik, ara jien mimli kliem. Il-kliem kollu li jeżisti fija jinsab u bit-tifsira wkoll għax jien dizzjunarju.”

“Mirka, ruħi, aħjar taqra lili,” instemgħet tgħid vuċi rqiqa, “Jiena mimli poeżiji tal-aqwa poeti minn madwar id-dinja kollha, u jekk taqrani ma jiddispjaċikx żgur.”

“Tgħidu x’tgħidu jien l-aqwa ktieb,” ftaħar il-ktieb l-ikħal. “Jien nagħtik informazzjoni dwar kollox; xjenza, teknoloġija, annimali, pjanti... insomma fuq kollox, għax jien enċiklopedija.”

“Ħallik minn dawn!” werżaq ktieb ieħor. “Jien l-isbaħ wieħed fosthom, għax miegħi ma tieqaf tidħak qatt. Ħaħa!”

Il-ktieb taċ-ċajt tant tkellem jgħajjat li qajjem lil Mirka. L-orsa ħarset fil-pront lejn l-ixkaffi tal-kotba. Fl-għar kien hemm skiet taqtgħu b’sikkina u l-kotba kollha kienu f’posthom. Il-povra orsa ħassitha tassew imħawda b’dik il-ħolma stramba, u marret tiġri ħdejn ommha biex tirrakkontalha x’kienet għadha kemm ħolmot. Xtaqet tkun taf min minn dawk il-kotba kellu raġun.

Il-mamà tbissmet mhux ftit xħin semgħet il-ħolma stramba ta’ Mirka, u weġbitha, “Jaqbillek tisma’ minn kollha kemm huma. Kull ktieb fih x’titgħallem; sew tal-istorja, sew tal-avventura u sew l-oħrajn kollha. Biex tkun orsa brava jeħtieġlek taqra dwar kollox u mhux dejjem l-istess tipi ta’ kotba. B’hekk dejjem tkabbar l-għarfien tiegħek.”

Mirka tbissmet ukoll u qaltilha, “Sew qed tgħidli, mamà. Il-ktieb għandu jkun l-aqwa ħabib tiegħi, għax il-qari huwa ċ-ċavetta tat-tagħlim.”