Milù Fejn ser Norqdu?

Milù tħobb titgeddes wisq mal-mamà tagħha. Filgħaxija, qabel torqod, il-mamà dejjem tidħol ħdejha fis-sodda u taqralha storja sabiħa. Ġieli, lejn l-aħħar tal-istorja Milù tibda tittewweb u mhux darba jew tnejn li titlef l-aħħar biċċa tal-istorja, għax tispiċċa torqod. Biex ngħidu kollox, ġieli tkun il-mamà li tħalliha bil-kurżità għax tibda tongħos u xi drabi torqod u anke tibda tonħor. Meta jiġri hekk Milù ftit tinkedd. Bil-galbu kollu u bi ftit sforz tgħatti lill-mamà bil-gverta roża fjurita, tidħol bejn driegħha u torqod l-isbaħ raqda…

Imma dan l-aħħar kien qed iqum ftit ta’ paniku qalb ir-residenti tal-kamra ta’ Milù, speċjalment dawk li posthom kien fuq is-sodda. L-ors il-kbir kien qed igerger li mhux sewwa li hu kien dejjem l-ewwel wieħed li jkollu joħroġ mis-sodda biex jagħmel post għall-mamà. Dan kollu għax kien l-ikbar wieħed fost il-ġugarelli.

Rapunzel kienet tagħmel ġranet sħaħ tippettna xagħarha twil twil biex filgħaxija tispiċċa jkollha tħabblu kollu biex tipprova taqilgħu minn taħt is-saqajn twal u goffi tal-mamà. Il-prinċipessa Perla kienet qed tgħaddi ljieli sħaħ tibki lill-prinċep Karlu billi kienet titilfu taħt il-lożor u l-kutri.

It-tarbija li ssoff subagħha kienet kulma jmur iżżid fil-biki għax bil-ħarqa biss kienet qed tispiċċa tħoss ħafna bard u taqbadha wġigħ ta’ żaqq. Minn daqshekk, is-Sinjura Polly ma kellhiex ħafna xi tgerger għax ilbiesha kien fin u oħxon imma kienet tiddejjaq wisq meta ħwejjiġha jitkemmxu mqar ftit.

L-unika waħda li ma tantx kienet tgerger kienet is-Sinjorina Bi. Din tant hi rqiqa li b’xi mod dejjem kienet issib feles fejn toqgħod u torqod komda fih. Milù ġiet bejn ħaltejn. Kienet tħobbu wisq il-fsied tal-mamà, iżda ma xtaqitx li l-ħbieb tagħha jmorru jgħixu xi mkien ieħor iktar spazjuż u komdu. Riedet tara x’seta’ jsir u malajr!

Ġurnata minnhom il-mamà ta’ Milù kienet qed tiżbarazza taħt it-taraġ. Dan il-post kien dejjem mimli b’dak l-imsejjaħ imbarazz. Fost ħafna affarijiet oħra kien hemm xi kaxxi taż-żraben. Kien hemm kaxxi kbar u kaxxi żgħar, kaxxi baxxi u kaxxi għoljin, kaxxi b’lewn wieħed u oħrajn b’qawsalla ta’ lwien. Il-mamà ħarġithom ftit ftit ħdejn il-bieb ta’ barra biex mal-ewwel ċans li jkollha teħles minnhom. Iżda xi ħadd kellu ħsieb ieħor għalihom…

Wara ġurnata ta’ ħidma Milù kien irnexxielha tagħmel sodda għall-ħbieb tagħha kollha. Kulħadd kellu sodda tajba għad-daqs u l-għamla tiegħu. L-ors fl-aħħar seta’ jorqod paxxut. Rapunzel setgħet traqqad lil xagħarha ħdejha. Il-prinċipessa Perla setgħet tgħannaq lill-prinċep Karlu l-lejl kollu. It-tarbija li ssoff subagħha setgħet titkeffen fil-kutri sħan u rotob. Is-Sinjura Polly setgħet toqgħod dritta u stirata anki waqt l-irqad. Is-Sinjorina Bi flok kamra tas-sodda sabet dar sħiħa tistennieha u issa billejl, fil-kamra ta’ Milù, qed ikun hemm ħemda liema bħalha u Milù tista’ tisma’ lill-mamà ssefsfilha f’widintha, “Inħobbok, pupina żgħira tiegħi.”