(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

L-Istaġuni - Poeżiji

Il-Baħar

Fis-sajf qalil tagħna
il-baħar sabiħ;
fil-jiem twal tas-sħana
ħallini ngħum fih.
Fix-xitwa jbeżżagħni,
inħossni nirtogħod;
qatt ħdejh ma tarani
għax minnu nżomm bogħod!
null
Paġna 1

Ir-Rebbiegħa

Il-lejl jiqsar qiegħed,
jitwal beda l-jum
u l-arja madwarna
qed tisħon kuljum.
Bdiet tnaqqas ix-xita
u jgħib beda l-ksieħ;
is-sema bla sħaba
sar ikħal sabiħ.
Is-siġar bdew jilbsu
il-weraq, l-inwar,
u l-ġnien bl-isbaħ fjuri
diġà għoddu far.
Fil-ġnien dehru l-friefet
u n-naħal beżlin;
nemliet żgħar mill-bejta
diġà bdew ħerġin.
Ġol-ilma fl-għadira
hemm ġa ż-żrinġijiet;
fis-siġar l-għasafar
bdew jagħmlu l-bejtiet.
F’daż-żmien in-natura
bil-ġmiel tlellex tkun
għaliex ir-rebbiegħa
hi l-isbaħ staġun.
null
Paġna 2

Xita Xita

Xita xita kemm tferraħni
hekk kif inti tibda ġejja;
l-inċirata ngħaġġel nilbes
u l-buz nitfa’ ġo riġlejja.
Il-barnuża nixħet f’rasi
u nkun lest għal festa kbira;
fit-triq noħroġ fl-ilma nċaflas,
nidħol ngħaffeġ f’kull għadira.
Xita xita fittex ejja
ħalli bik nagħmel xalata
basta jkolli l-buz f’riġlejja,
il-barnuża w l-inċirata.
null
Paġna 3
Tmiem