L-Avventura f’Ħal Xuxa 3: Il-Festa tal-Għeneb ta’ Kurun il-Qanfud

Wasal żmien il-briju u l-ferħ f’Ħal Xuxa, li jġib miegħu jum il-festa tal-għeneb. Din il-festa tant kienet imfittxija mix-Xuxani li kienu jibdew jitkellmu b’entużjażmu dwarha minn ġimgħat qabel.

Il-festa tal-għeneb tiġi organizzata kull sena minn Ġanni u martu Nena fir-razzett tagħhom f’tarf ir-raħal. Biex ngħidu kollox, din il-festa kellha bidu kemxejn partikolari għaliex kienet frott il-ħbiberija speċjali li Ġanni l-bidwi għandu mas-sindku ta’ Ħal Xuxa, is-Sur Enrico Pandolfino Parascandolo.

Ġanni l-bidwi hu magħruf mar-raħal kollu bħala bniedem kwiet u maqtugħ għalih, b’ħajtu marbuta ma’ dak kollu li kien iseħħ fir-razzett. Għalhekk il-ħbiberija tiegħu mas-Sur Pandolfino Parascandolo ssorprendiet lil kulħadd għaliex jekk kont tarahom flimkien kienu qishom il-lejl u n-nhar.

Imma bħalma jgħidu, jidher li l-ħbiberija hi bħall-imħabba… għamja u ma tħarisx lejn uċuħ. Mal-ewwel xirja ħaxix li s-Sur Pandolfino Parascandolo għamel mingħand Ġanni l-bidwi, saru qishom ħobża u sikkina. Il-ħbiberija tagħhom baqgħet tikber u aktar ma jgħaddi ż-żmien aktar bdiet trabbi għeruq sodi.

Nistħajjilkom tistaqsuni, imma dawn it-tnejn fuq xiex kienu jitkellmu? Tabilħaqq li dawn kienu jaqbduha fuq kull suġġett taħt il-kappa tax-xemx. Wieħed mill-aktar suġġetti għal qalbhom kien l-għasir tal-għeneb għall-inbid. Ġanni l-għaxqa tiegħu jagħsar l-għeneb li jkabbar fl-għelieqi. Is-Sur Pandolfino Parascandolo minn dejjem iħobb il-qatra u malli daq l-inbid tal-bidwi baqa’ msaħħar bit-togħma tiegħu.

Iż-żewġt iħbieb kienu jiltaqgħu minn żmien għal ieħor fid-djar ta’ xulxin biex jgħidu kelmtejn u jixorbu tazza nbid flimkien. Waqt waħda minn dawn il-laqgħat, is-Sur Pandolfino Parascandolo ħareġ bl-idea li jorganizzaw festa tal-għeneb fir-razzett ta’ Ġanni. Din kellha tinkludi l-bejgħ tal-għeneb u l-inbid li jipproduċi Ġanni l-bidwi.

Għall-bidu Ġanni ma tantx kien imħajjar minħabba x-xogħol kollu li kienet tinvolvi. Ngħiduha kif inhi, li torganizza festa għal raħal sħiħ ma kinitx ċajta! Is-Sur Pandolfino Parascandolo waħħalha f’moħħu li jikkonvinċih… u hekk għamel!

Wara s-suċċess tal-ewwel festa tal-għeneb, iż-żewġt iħbieb qatt ma ħarsu lura. Illum hemm attività sħiħa fir-razzett bi preparazzjoni għall-ħames festa tal-għeneb. Ġanni u martu Nena flimkien ma’ xi ħbieb tagħhom qed jieħdu ħsieb l-armar u t-tiżjin minn fejn ibigħu l-prodotti tagħhom.

Is-Sur Pandolfino Parascandolo ried li din id-darba l-festa tal-għeneb tkun verament speċjali. Hu tkellem ma’ xi nies mill-każin tal-għaqda tal-logħob tan-nar ta’ Ħal Xuxa biex jagħmlu spettaklu ta’ murtali u nar tal-art waqt il-festa. Is-sindku għażel ukoll li jistieden banda minn barra r-raħal biex tferraħ lil kulħadd bil-marċi brijużi. Kollox kellu jiġi organizzat b’pompa kbira!

L-idea tal-murtali u l-banda ma tantx niżlet għasel mal-annimali tar-razzett għaliex ma kinux iħobbu l-istorbju, speċjalment waqt ħin l-irqad. L-uniku annimal li għorok idejh malli sema’ bl-aħbar kien Kurun il-qanfud.

Għandkom tkunu tafu li dan l-imbierek Kurun iħobb inaqqar mill-għeneb ta’ Ġanni kull meta jkollu ċans jaħrab sal-għelieqi tad-dwieli. Kull sena hu jistenna bil-ħerqa li tasal il-festa biex jiekol ikla għeneb tajba!

Iktar ma jum il-festa tal-għeneb beda jersaq qrib, iktar l-entużjażmu ta’ Kurun beda jiżdied. U xi ngħidu meta wasal il-jum tant mistenni? Żgur li ħadd mir-raħal ma kien daqshekk ferħan daqsu. Kurun qam b’enerġija liema bħalha bi preparazzjoni għall-ikla li kien se jiekol aktar tard.

Għall-ħabta tas-sitta ta’ filgħaxija Ġanni l-bidwi u martu bdew jilqgħu l-ewwel nies li ġew għall-festa. In-nies ta’ Ħal Xuxa jiddandnu mhux ħażin f’din l-okkażjoni. Min jixtri libsa ġdida, min jimla wiċċu kollu żebgħa qisu maskarun tal-karnival, u hemm min ikun qisu armatura tal-ġojjelli bid-dehbijiet li jkollu fuqu.

Iktar ma beda jgħaddi l-ħin, iktar bdiet tiżdied il-folla. Kien hemm mumenti fejn Ġanni u Nena lanqas setgħu jlaħħqu mat-talba tan-nies għall-għeneb u l-inbid.

Is-Sur Pandolfino Parascandolo pprova jagħmel ħiltu biex ikompli max-Xuxani kif seta’. Malli sar il-ħin għall-ispettaklu tan-nar, kulħadd inġabar fid-daħla tar-razzett biex ma jitlef xejn minnu. Kulħadd ħa pjaċir u tpaxxa bl-ispettaklu mill-aqwa li ġie organizzat.

F’dan il-mument Kurun iddeċieda li jidħol fl-azzjoni. Waqt li kulħadd kien medhi jħares ’il fuq lejn il-murtali ta’ kull lewn u daqs, inkiss inkiss minn mas-saqajn, beda għaddej qanfud ċkejken. Dan, b’ħeffa liema bħalha, mar fejn kien qed jinbiegħ l-għeneb u qabeż f’wieħed mill-kannestri.

Malli sab ruħu fil-kannestru, Kurun tmattar waħda sew u, b’kalma kbira, beda jiekol l-għeneb waħda wara l-oħra.

Wara ikla kif imiss, il-qanfud imqareb ħassu verament sodisfatt għaliex laħaq il-mira tiegħu għal dak il-jum. Hu kien ferħan se jtir, tant li meta beda jisma’ d-daqq tal-banda riesqa qrib għamel il-kuraġġ u ħareġ jiżfen flimkien mal-bqija tax-Xuxani.

Wara l-ewwel żifna, Kurun żifen it-tieni, it-tielet u r-raba’ waħda. Meravilja tal-meravilji ħadd mix-Xuxani ma nduna biċ-ċkejken qanfud jaqbeż u joqmos mas-saqajn.

Xħin wasal għall-ħames żifna, Kurun beda jħossu jaqta’ nifsu, għalhekk ħaseb li aħjar iwarrab mal-ġenb u jistrieħ ftit taħt mejda fil-qrib. Wiċċu sar aħmar nar u għarqan xraba. Waqt li straħ ma’ sieq il-mejda, ħareġ maktur u beda jimsaħ l-għaraq.

Ħabta u sabta, f’dan il-mument, qamet frattarija sħiħa. Vuċi femminili nstemgħet tgħajjat fil-qrib u ħasdet lil kulħadd.

“Ajjut! Ajjut! Għandi ġurdien ma’ saqajja,” bdiet tgħajjat mara b’leħen għoli, li kienet bilqiegħda mal-istess mejda fejn kien qed jistrieħ il-qanfud.

F’leħħa ta’ berqa, Kurun irrealizza bl-iżball li għamel bil-bluha tiegħu. Minflok serraħ ma’ sieq il-mejda, spiċċa mitluq ma’ sieq din il-mara. Ngħiduha kif inhi, bejn sieq il-mejda u sieq il-mara ma tantx kien hemm differenza kbira, iżda dan ġab liċ-ċkejken qanfud f’inkwiet kbir.

Sturdut kif kien, Kurun ipprova jikkalma s-sitwazzjoni kif seta’ billi resaq lejn il-mara u kellimha.

“Sinjura, jien m’iniex ġurdien imma qanfud,” beda jipprova jispjegalha.

Il-mara ma tantx dehret li riedet taf b’dak li kien qed jgħidilha Kurun għaliex malli beda jersaq lejha, aktar bdiet twerżaq b’kemm kellha saħħa. Leħinha kien jikkompara tajjeb ma’ dak tal-aqwa sopran!

L-għajjat tagħha ġibed l-attenzjoni tan-nies fil-qrib, li riedu jkunu jafu għalfejn din il-bniedma kienet qed tagħmel dak il-plejtu kollu. Kien hawnhekk li, f’salt wieħed bla mistenni, Kurun beda jara xita ta’ oġġetti ġejjin għal wiċċu.

Fil-paniku li nqala’ kulħadd beda jagħmel dak li seta’ biex jeħles mill-‘ġurdien’ mhux mistieden li tfaċċa waqt il-festa tal-għeneb. Uħud mill-irġiel qalgħu ż-żarbuna minn sieqhom u bdew iwaddbuhielu. Xi nisa qabdu l-affarijiet li kellhom fil-basktijiet u fuq l-imwejjed u bdew igaraw dak li ġie għal idejhom. Raġel twil u mibni qabad biċċa injama u beda jiġri warajh b’kemm kellu saħħa.

Malli ra dan kollu, Kurun irrealizza li l-festa għalih kienet spiċċat. Waqt li evita kif seta’ l-affarijiet li kienu ġejjin għal wiċċu, lebbet b’ġirja waħda lejn l-għelieqi. Minkejja li siegħa wara l-inċident ix-Xuxani kienu nsew kollox, Kurun kien għadu qed jistejqer mill-ħasda li kellu fuqu. Minn dakinhar, il-qanfud għamel wegħda miegħu nnifsu li daqshekk kien se jiekol għeneb sakemm idum ħaj. Għall-bidu sħabu l-annimali ma tantx emmnuh għaliex jafu kemm kien wikkiel.

Huma malajr bidlu l-fehma tagħhom meta raw li fil-festi tal-għeneb li saru wara qajla kienu jaraw lil Kurun jixref rasu ’l barra minn daru. Deher biċ-ċar li l-lezzjoni kien tgħallimha!