Koppja Pikuża

Ġużi u Helen kienu ilhom miżżewġin aktar minn tletin sena. L-unika tifla li kellhom, Sefora, kienet iżżewġet Ingliż u marret tgħix Londra. Kull min kien jafhom, ħlief kliem ta’ tifħir ma kienx ikollu xi jgħid dwar il-koppja. Kienu jkellmu lil kulħadd u fejn jistgħu dejjem kienu ta’ għajnuna għall-ġirien tagħhom. Mill-bieb ’il barra kollox kien jidher ward u żahar, imma f’darhom kienu jiġġieldu daqs kelb u qattus! Sa mill-ewwel sena taż-żwieġ tagħhom kienu jillatikaw u jimpikaw fuq ix-xejn u ma jċedux waħda lil xulxin. Ġużi kien jinsa malajr, imma Helen kienet iżżomm f’qalbha aktar fit-tul.

Meta mbagħad twelditilhom Sefora, u bdiet tifhem, kienu jagħmlu sforz kbir biex ma jiġġildux quddiemha. Imma xħin it-tifla ma tkunx id-dar, kien jiżbroffa vulkan bejniethom. U issa li reġgħu sfaw waħedhom, reġgħu għall-ħajja ta’ qabel, ħlief ġlied u gdiedem ma kienx ikollhom. Dan ma jfissirx li ma kienx ikollhom ġranet fejn ikunu ħbieb jew li ma kinux jinħabbu, għax ma kinux jgħaddu mingħajr xulxin. U jekk Helen tittardja fil-qadi ta’ kuljum, Ġużi erħilu jinkwieta li seta’ ġralha xi ħaġa. L-istess Helen, meta Ġużi jiddawwar wara x-xogħol timla rasha bil-ħsibijiet ta’ x’seta’ nqalagħlu, jew ma’ liema għawġ seta’ ltaqa’.

Mela jum fost l-oħrajn, Helen għamlet il-geddum għax Ġużi baqa’ jara t-televixin u dam biex mar jiekol. Helen, li tkun ilha ssajjar u tipprepara sa minn kmieni waranofsinhar, ħadet għaliha mhux ftit u ddeċidiet li ma tkellimx lil żewġha. Ġużi ftit li xejn inkwieta. ‘Ħabat tajjeb,’ ħaseb bejnu u bejn ruħu, ‘għax hemm dak id-dokumentarju noqgħod narah bil-kwiet, u mhux aktar nisma’ lilha tredden milli nisma’ x’qed jingħad fuq it-televixin.’

Qabel daħal fis-sodda biex jorqod, Ġużi fakkar lil Helen biex bħas-soltu tqajmu kmieni għax-xogħol. Għax jekk Ġużi kien jinqala’ għal kollox, biex iqum kmieni ma kienx. Helen kienet l-iżveljarin tiegħu. Ir-raġel ftit ta kas li Helen ma kinitx serrħitlu rasu bħas-soltu li kienet se tieħu ħsieb tqajmu. U kif Ġużi qatt ma basar li se jiġri, Helen ma qajmitux l-għada filgħodu u spiċċa daħal għax-xogħol tard.

Ir-raġel fetaħ qalbu ma’ Lino, sieħbu tax-xogħol, dwar l-attitudni ta’ martu, dik li meta jiġġieldu ddum xi ġimgħa ma tkellmux. Ġużi stqarr ma’ sieħbu li dil-ħaġa kienet turtah mhux ftit meta tieħu fit-tul, speċjalment meta jkun irid jgħidilha xi ħaġa importanti u ma jkunx jaf jekk fehmitux jew le.

Wara li ħaseb ftit fit-tul, Lino qal lil Ġużi, “Ġuż, int għax ma tagħmilx biċċa xogħol? Messek dak li tkun trid tgħid lil Helen, tiktibhulha fuq karta. B’hekk hi tkun tista’ taqra xi trid tgħidilha. Hija tara tkun trid mhux tisma’, le?”

Ġużi għoġbitu wisq din l-idea u tgħidx kemm dam itaptaplu fuq dahru lil Lino.

Lura d-dar, martu Helen kienet għadha bil-geddum u ma riditx tkellmu. Għalhekk Ġużi beda jiktbilha kull ħaġa li ried jgħidilha u jwaħħalha mal-friġġ fil-kċina. Kitbilha li kien tiela’ fuq il-bejt jagħlef il-ħamiem. Kitbilha li kien dieħel jinħasel. Kitbilha li kien sejjer sal-garaxx għax nesa l-gazzetta fil-karozza, u saħansitra kitbilha li kien sejjer jorqod. Ma nesiex ukoll jiktbilha biex l-għada filgħodu tqajmu kmieni ħalli jilħaq jasal għax-xogħol fil-ħin. Dak il-lejl Ġużi raqad moħħu mistrieħ li Helen kienet se tqajmu. Imma kemm tbaqbaq ir-raġel xħin stenbaħ u sab li kienu saru d-disgħa ta’ filgħodu! Niżel jiġri fil-kċina biex isib lil martu, imma ma kienet tidher imkien, aktarx li kienet ħarġet tixtri. Għajnejh waqgħu fuq il-bieba tal-friġġ. Miktuba b’ittri kbar kien hemm nota mingħand martu li kienet tgħid, ‘QUM GĦAX SAR IL-ĦIN.’

Ġużi aktar irrabja u lanqas jaf kif wasal għax-xogħol dakinhar. Lino tgħidx kemm daħak bil-qalb xħin sar jaf bl-istorja ta’ sieħbu. Sa mnalla li Ġużi jaf jieħu ċajta, għaliex kieku żgur li kien jiksirha minn ma’ Lino dakinhar.

L-istorja ma waqfitx hawn. Għax il-koppja ma damux ma reġgħu kellhom xi jgħidu u Helen reġgħet ma bdietx tkellem lil żewġha. Ġużi pprova ma jagħtix kas, imma meta l-biċċa twalet għal aktar minn ġimgħa, xtaq jagħmel xi ħaġa. Tant kien għadda żmien, li r-raġel kien nesa fuq xiex kellhom xi jgħidu. Wara ħafna ħsieb, Ġużi ġietu idea ta’ x’seta’ jagħmel biex martu terġa’ tibda tkellmu.

Dak il-lejl reġgħu raqdu ma jitkellmux u l-għada filgħodu Ġużi, li kien beda jqum bl-iżveljarin, qam kmieni u beda jqalleb fil-kxaxen tal-kamra tas-sodda. Ma kienx hemm kexxun li ma fetaħx. Wara, dar għall-kxaxen tal-kamra tal-ikel u xħin lesta beda jqalleb fil-kxaxen tal-kċina. Helen, li għall-ewwel bdiet tagħmel tabirruħha li mhix tagħti kas, ħassitha se tisplodi minn ġewwa. Aktar ma kienet tħobb kollox ordnat u f’postu, aktar żewġha kien qed jagħmlilha ħerba! Li kieku kienu qed jitkellmu tgħidx x’ċanfira kienet ittih!

Fl-aħħar, xħin ma felħitx tarah iqalleb aktar, staqsietu rrabjata, “X’qed tfittex? Qallibt kulm’hawn!”

Ġużi dak li kien qed jistenna, dar lejha u qalilha bi tbissima, “Il-vuċi tiegħek, qalbi. U fl-aħħar sibtha.” Helen tbissmet u reġgħu bdew jitkellmu bħal qabel, qisu qatt ma ġara xejn. Minn dakinhar Ġużi beda jaħsibha darbtejn qabel jagħmel jew jgħid xi ħaġa, biex b’hekk jevita l-argumenti ma’ martu Helen.