It-Tpinġija Kurjuża ta' Jerome

Omm Jerome kienet ta’ sikwit tieħu lil binha għand in-nanna Marta. Min-naħa tiegħu Jerome tgħidx kemm kien jifraħ li seta’ jqatta’ ftit ħin man-nanna tiegħu. In-nanna kienet tkellem lil Jerome bi ħlewwa kbira, iġġiblu xi ħaġa x’jixrob u wara tħallih jedha jilgħab fil-kamra arjuża li kellha kif tidħol id-dar.
Drabi oħra Jerome kien joqgħod ipinġi fuq it-tavolina bil-kuluri li n-nanna kienet tpoġġilu quddiemu. Għax Jerome, għall-għaxar snin li kellu, kien jaf ipinġi daqs wieħed kbir.

Darba waħda, lejn nofs ix-xahar ta’ Mejju, Jerome qal lil nanntu, “Illum irrid inpinġi xi ħaġa fuqek iżda nurihielek meta tkun lesta.”
“Kollox sew, Jerome. Mela m’hemmx għalfejn niġi nittawwal ħa nara xi tkun qed tagħmel.”
“Le, tiġix,” qalilha b’leħen sod in-neputi.

In-nanna Marta ħallietu jpinġi u xi kultant kienet tittawwallu mill-bogħod u titbissem.
Meta lesta, Jerome qam minn postu u mar juri lil nanntu dak li kien għadu kif pinġa.
In-nanna dehret xi ftit imħassba. “Imma din hija tifla qiegħda tegħreq u raġel qabeż biex isalvaha.”
“Iva, nanna, dik it-tifla hija int meta kont għadek żgħira.”

In-nanna Marta tassew li darba kienet se tegħreq u qabeż raġel għaliha, ġibidha lejn ix-xatt u salvaha.
In-nanna bdiet tidher mistagħġba ħafna. Hija qatt ma qalet lil ħadd b’din l-istorja tagħha, lanqas lil omm Jerome li kienet tiġi bintha.

“Iżda jien qatt ma semmejtlek dak li ġrali meta kont għadni tifla żgħira.”
“Le, qatt, nanna.”
“Mela allura kif pinġejtni qiegħda negħreq u xi ħadd qabeż għalija u salvani?”
“Ma nafx, nanna, iżda hekk ħassejt li għandi nagħmel.”
“Iva, tassew, għażiż tiegħi Jerome, li darba kont se negħreq u salvawni, iżda ma nistax nifhem kif, bla ma qallek ħadd, ġiek f’rasek li tpinġi hekk.”

Meta marret omm Jerome biex tieħu lura lil binha, in-nanna rrakkontatilha fuq dak li pinġa Jerome.
Omm Jerome wkoll dehret imħassba ħafna u kkonfermat li qatt qabel ma kienet semgħet dik il-ġrajja tan-nanna.

Meta Jerome reġa’ mar għand in-nanna, ix-xwejħa staqsietu, “Tiftakar jekk xi ħadd qallekx xi darba li meta jiena kont żgħira kont se negħreq?”
“Le, ħadd ma qalli xejn.”
“Mela kif pinġejtni b’dak il-mod?” baqgħet tinsisti n-nanna biex forsi taqbad xi tarf.
“Ma nafx, nanna, tassew li ma nafx.”
In-nanna baqgħet ma setgħetx issolvi l-misteru tat-tpinġija ta’ Jerome.

Il-ġimgħa ta’ wara Jerome reġa’ kien għand in-nanna Marta. B’wiċċu ferħan dar fuq nanntu u qalilha, “Nanna, qiegħed niftakar xi ħaġa.”
“Għidli, ruħi qalbi.”
“Għax ftit qabel il-vaganzi tal-Għid is-Surmast tal-iskola ġabilna wieħed anzjan biex ikellimna fuq l-esperjenzi tiegħu tal-imgħoddi. Dan kien jidher iżjed anzjan minnek.”

“Iva, Jerome, kompli.”
“Dakinhar, dak l-anzjan qabel spiċċa qalilna biex kull fejn inkunu noqogħdu attenti ħalli ma tiġrilniex xi diżgrazzja. Imbagħad qalilna kif kien salva tifla li kienet se tegħreq.”
In-nanna issa bdiet tieħu interess ikbar. “U x’qalilkom iżjed, allura?”

“Qalilna li dik it-tifla bdiet tielgħa u nieżla mal-mewġ għax sabet ruħha fejn ma kienx jilħqilha, u bdiet tgħajjat u twerżaq. U dak l-anzjan, li dak iż-żmien kien diġà raġel, qabeż għaliha u salvaha. Imbagħad, nann, niftakar li l-anzjan qalilna li dik it-tifla, jekk għadha ħajja, illum aktarx li hija nanna.”
In-nanna, bejn serja u bejn imbissma, qalet lil Jerome, “Imma dan ma jfissirx li billi l-anzjan semmielkom il-kelma ‘nanna’ bilfors li kont jien.”
“Issa ma nafx,” spiċċa jgħidilha Jerome.

Għaddew ftit ġranet oħra u Jerome reġa’ kien għand in-nanna. Kien jidher ferħan se jtir.
“Nanna, għandi iżjed xi ngħidlek fuq dak l-anzjan li ġie jkellimna l-iskola.”
“Mela għadek m’għedtlix kollox?” staqsietu bil-ħerqa.

“Għax imbagħad ftakart li s-Surmast qalilna biex niktbu komponiment żgħir fuq xi ħaġa minn dak li qalilna l-anzjan. Jien kont ktibt xi noti żgħar fuq l-istorja ta’ dik it-tifla li kienet se tegħreq, iżda l-komponiment bqajt ma ktibtux.”
“Mela, allura, ma ktibt xejn?”
“Le, nanna, f’pitazz żgħir sibt in-noti li kont ktibt u ġibthom miegħi.”
“Mela għandek xi ħaġa,” reġgħet in-nanna kurjuża.
“Iva, ħalli nġib il-pitazz mill-basket.”

Jerome fetaħ il-pitazz żgħir tiegħu u beda jaqra bil-mod, “It-tifla li kienet tgħum ġabitha n-nanna magħha. In-nanna baqgħet fuq ix-xatt.”
“Jien ukoll kont man-nanna tiegħi ħdejn il-baħar meta kont se negħreq,” qabżet fil-pront in-nanna.
“Il-post kien Għajn Tuffieħa.”
“Eżatt fejn kont se negħreq jien,” reġgħet qalet in-nanna.

“It-tifla bdiet tgħajjat u tibla’ l-ilma.”
“Kompli, Jerome.”
“In-nanna tagħha bdiet tgħajjat biex isalvawha.”
“Kompli iżjed, Jerome.”
“Meta r-raġel tellagħha fuq ix-xatt, it-tifla bdiet tibki.”
“Daqshekk ktibt, allura?”
“Le, fadalli l-aħħar sentenza: It-tifla kellha m’għonqha ġiżirana b’kewkba blu mdendla magħha.”

“Mela dik it-tifla kont jien tassew,” reġgħet in-nanna. “Dik il-ġiżirana damet għandi ħafna u mbagħad tliftha…”
Wara ftit kompliet, “Jien kont ħadt qatgħa kbira u minn dakinhar qatt iktar ma nżilt fil-baħar. Għalhekk bqajt ma nafx ngħum. Bil-fixla li kelli, meta dak ir-raġel tellagħni fuq ix-xatt lanqas grazzi ma għedtlu, u fuq daqshekk bqajt iddispjaċuta sal-lum.”

Jerome kien attent jisma’ kull kelma li kienet qed tgħid in-nanna.
“Issa taf x’nagħmel,” kompliet ix-xwejħa, “inkellem lis-Surmast tal-iskola u nitolbu jagħtini l-isem u l-indirizz ta’ dak l-anzjan biex, għalkemm daqshekk tard, nirringrazzjah personalment għal dak kollu li għamel miegħi dakinhar li kont se negħreq. Hux hekk għandu jkun, Jerome?”

“Iva, iva, hekk għandu jkun.”
“U lilek ukoll, Jerome, nirringrazzjak ta’ dik it-tpinġija ħelwa tiegħek li bis-saħħa tagħha kelli nsib lil dak li kien salvani mill-għarqa.”
In-nanna Marta resqet iżjed qrib Jerome u għannqitu waħda kbira.