Ir-Raħal tan-Nani 21: Leħju u Xagħar Deffusu

Leħju kien barbier prim imma kien ukoll il-buffu tar-raħal tan-nani. Kien bniedem ferrieħi, moħħu biex idaħħak. Kien ukoll magħruf għaċ-ċajt goff u miskin int jekk tiġi taħt idejh! Fuq daqshekk kienu jibżgħu ftit minnu għax kien iħobb iwaqqa’ n-nies għaċ-ċajt.

Ġieli xi nanu ħa għalih bl-ikrah wara xi ċajta goffa minn tiegħu u għalkemm hu kien jagħmel iċ-ċajt bil-ħsieb li jdaħħak u mhux li joffendi lil dak li jkun. Kultant, tant kienu jieħdu għalihom li ġieli ma kellmuhx għal żmien twil!

Kien qiegħed joqrob il-bidu tar-rebbiegħa u fil-lejl li tispiċċa x-xitwa u tibda r-rebbiegħa, in-nani kienu jiċċelebraw bil-kbir. Ikel, xorb, daqq, għana, żfin u briju, u kulħadd jiżżejjen mill-aħjar li jista’.

Deffusu kien tefa’ għajnejh fuq nana gustuża u għal dik il-festa ried li jkun fl-aħjar tiegħu. Kellu ħwejjeġ ġodda li kien biħsiebu jżanżan u anke qorq ġdid fjamant. Beda jaħseb biex jirranġa xagħru u l-leħja biex ikollu kollox kif imiss. Ried jiddandan quddiem dik it-tfajla grazzjuża forsi ma tafx kif jogħġobha!

Fil-jum tal-festa Deffusu mar għand Leħju biex idurlu dawra xagħru u l-leħja. Leħju kien sema’ li Deffusu kien qed jitħajjar għal tfajla ħelwa u fettillu jwaqqgħu ftit għaċ-ċajt magħha. Malli daħal għand Leħju, Deffusu qallu biex jirranġalu xagħru sew għax kien twal mhux ħażin. Ried iqassru ħalli jidher iżgħar u l-leħja wkoll riedha ftit iqsar.

Leħju qallu li kien se jagħmillu qatgħa xagħar li qatt ma raw bħalha f’dak ir-raħal. Deffusu ħa pjaċir għax xtaq li hu jkun l-aħjar u ma jkun hemm ħadd iktar bħalu. Leħju qallu li l-mera kienet inkisritlu l-ġurnata ta’ qabel u llum ma kellux oħra. Deffusu qallu li ma jimpurtax u kien se jħalli f’idejh. Leħju hekk ried jisma’ ħalli jaqtagħhulu kif ried hu bla ma jinduna biċ-ċajta goffa li kien se jagħmillu!

Beda mil-leħja biex iħalli x-xagħar għall-aħħar u billi jkun sar il-ħin biex tibda l-festa Deffusu ma jkollux ċans joqgħod jittawwal ġo xi mera. Wara li lesta mil-leħja beda jaqtagħlu xagħru. Beda mill-ġnub u qatagħhulu qasir mhux ħażin. Xħin ġie biex jaqta’ fuq, fin-nofs ħallihulu twil.

Kif lestieh Deffusu kien qisu żiemel bin-nofs ta’ rasu bix-xagħar twil u fil-ġenb kważi xejn! Beda jmiss rasu biex jipprova jara kif ġie imma bla mera ma setax jara. Leħju beda jgħidlu li tassew xeraqlu. Fil-fatt Deffusu kien jidher stramb għall-aħħar. Kien qisu mostru! Ras ta’ żiemel u bodbod bid-daqna fl-istess ħin! Leħju qallu li kien sar il-ħin u jekk irid imur il-festa kien jaqbillu jħaffef.

Deffusu telaq jgħaġġel ħalli jfittex jilbes u jitlaq lejn ix-xtajta. Telaq jiġri u sab ir-raħal kollu diġà qiegħed hemm. Min isajjar, min ipaċpaċ, min ilesti l-istrumenti tal-mużika, u t-tfal jiġru ’l hawn u ’l hemm. Malli wasal, ratu tifla li waqfet mill-ġiri u baqgħet iċċassata tħares lejh. Deffusu waqaf ħalli jagħti ċans lin-nani l-oħra jindunaw bih ħalli jistagħġbu bil-ġmiel ta’ xagħar li kellu! Imma t-tifla bdiet turi b’subgħajha lil Deffusu u tgħajjat, “Mostru! Mostru!”

F’daqqa waħda Deffusu sab ruħu b’kulħadd iħares ċass lejh! Kien qisu xi annimal tal-imgħoddi, bejn żiemel, bodbod u bniedem! It-tfal kollha bdew iwerżqu u jibku u marru jiġru ħdejn ommhom filwaqt li l-kbar bdew iħarsu lejn xulxin ma jafux x’se jaqbdu jagħmlu. F’daqqa waħda Deffusu mexa fid-dawl u qalilhom, “Mela m’għaraftunix? Jien Deffusu!”

Kulħadd infaqa’ jidħak kemm jiflaħ. Meta ra hekk mar jiġri ħdejn barmil mimli bl-ilma u kif ra r-rifless tiegħu kien għoddu ħassu ħażin bil-qatgħa! Ma riedx jemmen lil għajnejh. F’daqqa waħda nduna li dak il-kattiv ta’ Leħju daħak bih u waqqgħu għaċ-ċajt waħda sew. Kważi jibki bil-mistħija telaq lura lejn id-dar, qabad imqass u qata’ xagħru kollu. Kellu jilbes beritta sakemm reġa’ kibirlu. Lil Leħju ma riedx ikellmu iżjed għax telliflu tfajla li kien ħa grazzja magħha.