Ir-Raħal tan-Nani 20: Bomblu, Bajtru u l-Ħmara l-Griża

Sebaħ jum sabiħ tar-rebbiegħa u Bomblu u Bajtru kienu qegħdin jiddiskutu x’se jaqbdu jagħmlu dakinhar. Bajtru ma kellux aptit imur xi mkien ’il bogħod u beda jgħid lil Bomblu biex joqogħdu xi mkien għall-frisk jgħidu kelma. Imma Bomblu kien daħallu ħsieb f’moħħu. Xtaq li jmorru fil-wied ħdejn l-għadira u jaraw jaqbdux xi żewġ ħutiet tal-ilma ħelu.

Għall-ewwel Bajtru ma tantx għoġbu l-ħsieb imma wara li Bomblu qagħad jiffittah ftit, ftiehmu li jmorru. Ħadu żewġ bramel ħalli jkollhom fejn ipoġġu l-ħut li jaqbdu u żewġ koppijiet biex jaqbdu l-ħut bihom. Telqu għan-niżla lejn ix-xtajta. Is-sema kien ikħal nir u kollox kien ileqq qisu xi ġgant kien ħasel kullimkien.

Waslu ħdejn ix-xtajta u ħadu t-triq lejn il-wied. Kien hemm għadira kbira fejn kien jinġabar l-ilma tax-xita. Kien fiha żrinġijiet, ħut tal-ilma ħelu, għasafar u insetti jpespsu u jżanżnu ’l hawn u ’l hemm. Bdew iduru mal-għadira ħalli jaraw minn fejn ikun l-aħjar jaqbdu xi ħuta. Ħut kien hemm mhux ħażin imma mhux lakemm taqbadhom!

Wara li damu jitħabtu mhux ħażin u ma nafx kemm-il darba kienu se jispiċċaw fl-għadira, qabdu erba’ ħutiet kull wieħed! Għamluhom fil-bramel u qagħdu ftit bilqiegħda jistrieħu wara dik il-battikata li kienu ħadu. Wara ftit xebgħu bilqiegħda, tefgħu l-ħut lura fl-għadira u ddeċidew li jmorru jimxu mal-ġenb tal-wied u jaraw hemmx kappar għax omm Bajtru qaltlu biex jara jekk hemmx ħalli xi ġurnata tinżel taqtgħu.

Wara li mxew mhux ħażin, semgħu ħsejjes ta’ xi annimal ġej minn wara ħajt mimli bil-bajtar tax-xewk. Imxew ftit ieħor biex isibu daħla għal ġol-għalqa u fl-aħħar sabu passaġġ bejn iz-zkuk tal-bajtar.

Bdew jissemmgħu ħalli jaraw il-ħoss mnejn kien ġej u wara ftit raw ħmara żgħira griża b’saqajha maqbudin ġo ħaxix li jixxeblek, qiegħda tipprova tinqala’. Miskina, iktar ma bdiet tipprova tinqala’, saqajha ta’ wara iktar bdew jitgeżwru ġol-pjanta.

Bajtru u Bomblu bdew iħarsu lejn xulxin. X’se jagħmlu? Tgħid tħallihom jgħinuha? Bdew jersqu lejha bil-mod biex ma jbeżżgħuhiex. Il-ħmara għall-ewwel bdiet titħabat, imma wara ftit bħal indunat li kienu se jgħinuha. Bomblu beda jersaq lejha u jkellimha u wara beda jmellsilha rasha. Hi wara ftit bdiet tieħu pjaċir għax kienet ħmara kwieta u kienet tidher ftit xiħa.

Bajtru sadanittant beda jaqla’ l-ħaxix minn ma’ saqajha. Ftit ftit irnexxielu jaqlagħha u l-ħmara meta sabet ruħha ħielsa ferfret tnejn saqajha ta’ wara u għal daqsxejn ma laqtitux! Bajtru warrab lura u Bomblu taptpilha tnejn fuq rasha u telqu ’l hemm.

Kemm kienet ħelwa dik il-ħmara! Dnub telquha hemm! Bdew mexjin lura lejn id-dar u wara ftit semgħu ħoss warajhom. Il-ħmara l-griża kienet miexja warajhom! Ippruvaw ikeċċuha biex tmur minn fejn ġiet imma kollu ta’ xejn. Meta bdew joqorbu lejn id-dar kien hemm nanu li ra lil Bomblu u Bajtru ġejjin bil-ħmara l-griża miexja warajhom. Telaq jiġri jgħajjat kemm jiflaħ li Bomblu u Bajtru kienu ġabu ħmara magħhom.

Kulħadd ħareġ jara x’kien qiegħed jiġri u veru li kien qal it-tifel! Ħmara żgħira griża kienet miexja wara Bomblu u Bajtru! Patatu, missier Bajtru, ukoll ħareġ jara x’ġara. Beda jistaqsi lil ibnu x’kienet qiegħda tagħmel dik il-ħmara hemm u minn fejn kienu ħaduha. Bajtru beda jgħidlu li ma kienu ħaduha minn imkien, hi kienet imxiet warajhom! U qallu l-istorja kollha.

Meta mar qrib il-ħmara Patatu ntebaħ li tassew kienet tidher xiħa u li probabbli xi ħadd kien telaqha barra. Beda jkellimha u hi marret titgeddes miegħu. Kienet tassew ħmara fidila, kwieta u ta’ min iħobbha! Patatu ddeċieda li jżommha u jgħid lil Bajtru jieħu ħsiebha. Bajtru ma tantx ħa gost li żdiedlu x-xogħol imma l-ħmara l-griża tassew kienet ħelwa. Patatu beda jeħodha miegħu fl-għelieqi u kien jgħabbiha b’xi ħaġa ħafifa, taparsi qiegħda taħdem u tgħinu fix-xogħol. Patatu kultant kien itella’ t-tfal iż-żgħar fuq daharha u jeħodhom dawra żgħira. Il-Ħmara l-Griża kienet sabet xortiha għax kienet sabet min jieħu ħsiebha u min iħobbha!