Ir-Raħal tan-Nani 19: Melħu u l-Qabda Bla Ħsieb

Melħu kellu ġurnata xogħol iebsa quddiemu. Illum kien se jnaddaf is-salini li kellu ’l ġewwa mis-sies il-kbir tat-tafal.

Dawn kien sabhom b’kumbinazzjoni meta darba fettillu jibqa’ dieħel ’il ġewwa mix-xtajta. Ried jara jsibx xi post tajjeb biex jaqbad iżjed ħut. Ħdejn ix-xtajta l-baħar max-xatt ma kienx fond ħafna allura ma kienx jaqbad xi ħut kbir.

Ħaseb bejnu u bejn ruħu li kieku jidħol iżjed ’il ġewwa mal-baħar, forsi jsib xi blata li minn fuqha jkun jista’ jistad ftit fil-fond. Dam ifittex u daħal ’il ġewwa mhux ħażin, meta lemaħ biċċa blata kbira mimlija ħofor baxxi u li kienet tibqa’ ħierġa fil-baħar mhux ħażin. Malli ra l-ħofor fil-blat ġieh f’moħħu x’jista’ jagħmel bihom.

Kienu perfetti biex jagħmilhom salini naturali. Kien inaddafhom fir-rebbiegħa u mal-ewwel maltempata kienu jerġgħu jimtlew ilma baħar. Imbagħad fis-sajf bix-xemx qalila l-ilma jinxef u jibqa’ biss il-melħ. Imbagħad kien jiġbru. B’hekk in-nani kien ikollhom biżżejjed melħ għall-bżonnijiet tagħhom. Kienu jużawh mal-ikel, biex imellħu l-ħut u l-laħam, għall-ġbejniet, għas-salmura biex jagħmlu l-kappar, u l-bqija.

B’din is-sejba tal-blata l-kbira, Melħu kien laqat żewġ għasafar b’ġebla waħda. Kien sab is-salini u fl-istess ħin kellu post perfett biex jistad fil-fond. Kien jitfa’ xibka fil-baħar u kien jaqbad ħut mhux ħażin. Malli wasal fil-post tefa’ x-xibka fil-baħar biex forsi sakemm inaddaf is-salini jinqabad xi ftit ħut. Beda jnaddaf is-salini mill-ġebel u l-ħmieġ li kien itella’ l-baħar jew li kien jaqa’ mis-sies.

Għamel l-isbaħ nofstanhar għaddej. Waqaf jitrejjaq b’biċċa ħobż biż-żejt, kunserva, ġbejniet tal-bżar u ful aħdar, u wara li mela żaqqu mar ikompli ħalli jlesti l-aħħar ftit li kien baqagħlu. Iċċekkja kienx inqabad xi ħaġa fix-xibka imma ma kien jidher xejn. Għamel ftit ħin ieħor jaħdem u kif lesta, mar jagħti titwila x-xibka.

Meta ttawwal fil-baħar ra xi ħaġa sewda kbira fix-xibka. Reġa’ ttawwal ħalli jara jekk kinitx xi alka jew ħaxix ieħor tal-baħar li nqabad fix-xibka. Possibbli nqabdet xi ħuta daqshekk kbira? Niżel bilqiegħda b’saqajh fl-ilma ħalli jkun jista’ jħoll ix-xibka li kienet marbuta mal-blat. Ħallha u beda jiġbidha bil-mod il-mod ħalli ma jbeżżax il-ħuta u tibda titħabat.

Xħin ix-xibka waslet mal-blata, induna li veru kien hemm xi ħaġa kbira fiha! Qam bilwieqfa biex ikun jista’ jagħmel is-saħħa u jiġbed aħjar. Imma malli beda jiġbed, dak li kien hemm fiha m’għoġbux ix-xogħol u beda jitħabat tgħidx kemm! Melħu beda jiġbed b’saħħtu kollha imma f’daqqa waħda ħass ix-xibka tiġbdu u li kieku ma kellux siequ mwaħħla sew ma’ blata żgur li kien jispiċċa fil-baħar!

Qabad il-ħabel tax-xibka u dawru sew ma’ blata kbira biex ma jispiċċax il-baħar u reġa’ beda jiġbed. U tgħidx x’qatgħa ħa malli x-xibka telgħet f’wiċċ l-ilma! Flok ħuta kien hemm fekruna daqsiex li qatt ma kien ra bħalha! Dik minn fejn ġiet, x’waħda din? Ġieli kien ra fkieren żgħar imma dil-fekruna kienet enormi!

“Naħseb li daħlet tbid fir-ramel tax-xtajta,” beda jgħid bejnu u bejn ruħu. “Issa kif se nagħmel biex noħroġha minn ġox-xibka?”

Reġa’ qagħad bilqiegħda b’saqajh fl-ilma biex jipprova jiftaħ ix-xibka forsi toħroġ bil-kwiet. Imma malli l-fekruna rat saqajh fl-ilma fetħet ħalq daqsiex u li kieku mhux għax kien ħafif u tella’ saqajh jiġri kienet tikollu xi waħda minnhom! X’biża’! Jirtogħod niżel kokka fuq il-blat u beda jiftaħ ix-xibka u sa fl-aħħar seta’ jiġbidha minn taħtha!

Malli sabet ruħha mingħajr xkiel ħarbet tferfer saqajha ’l hemm. Melħu ħa r-ruħ xħin raha titlaq imma fl-istess ħin baqa’ mbellah iħares lejn dik il-ġgant ta’ fekruna li min jaf kemm kellha żmien! Xħin ma kinitx tidher iktar, reġa’ tefa’ x-xibka l-baħar, qabad l-affarijiet u telaq lejn l-Għar il-Kbir, lest biex jirrakkonta xi ġralu. Imma żgur li ħadd ma kien se jemmnu dwar il-kobor ta’ dik il-fekruna!