Ir-Raħal tan-Nani 17: Frawlina, is-Serduk u l-Flieles

Xogħol Frawlina kien li tieħu ħsieb it-tiġieġ, lil dak iż-żatat ta’ serduk, li kien jibda jidden u jqajjem lil kulħadd ma’ sbieħ il-jum, u lill-ħbieb tagħha l-fniek. Kienet tmur tagħlifhom għal xi nofsinhar biex fl-istess ħin tiġbor il-bajd li jkunu biedu.

Minħabba dak is-selvaġġ ta’ serduk, Frawlina kellha battikata kuljum. Allaħares ma kienx Griżu, il-fenek ħabib tagħha, li malli jara lis-serduk ġej jagħmel għaliha kien jitlaq jiġri warajh ħalli jgerrxu ’l hemm u jħalli lil Frawlina tagħmel xogħolha bil-kwiet.

L-ewwel ma tagħmel kienet titfa’ l-ikel ġo ħawt fil-ġenb u sakemm is-serduk u t-tiġieġ ikunu aljenati jnaqqru, tmur tiġbor il-bajd.

Kienet iddur l-irkejjen kollha fejn is-soltu kienu jbidu, imma xorta kienet toqgħod attenta li ma tirfisx xi bajda li xi baħnana ta’ tiġieġa tkun biedet fin-nofs! Mhux l-ewwel darba li tkun għoddha rifsitha meta tinduna li hemm bajda taħt it-tiben ta’ mal-art.

Wara li tiġbor il-bajd, kellha xkupa magħmula mill-ħaxix niexef u kienet tagħti kinsa u tiġbor it-tiben maħmuġ. Imbagħad kienet terġa’ titfa’ tiben ġdid. Wara li tagħlef il-fniek kienet toqgħod ħdejn Griżu u joqogħdu jgħidu kelma ma’ xulxin.

Fix-xitwa kienet tkun għal qalbha wisq għax l-Imnaqqxa, tiġieġa ħamra mnaqqxa bl-abjad, kienet toqgħod qroqqa. Kellha rokna li kienet tagħmel il-bejta fiha kull xitwa. Kienet tibda tbid il-bajd u toqgħod issaħħnu u allaħares tipprova teħodhulha minn taħtha għax tqattgħek b’munqarha!

Frawlina kienet tinduna li se toqgħod qroqqa għax waqt li t-tiġieġ iqaqu hi kienet tibda tagħmel ħoss mhux tas-soltu! Kienet toqgħod għassa ħalli kif tmur tiekol tara kemm għandha bajd taħtha.

Frawlina kienet tieħu gost toqgħod ma’ Griżu jisimgħu l-qroqqa tqarqar u jarawha ddawwar il-bajd ta’ taħtha b’saqajha ħalli jisħnu kollha xorta waħda.

Meta jgħaddu xi għoxrin ġurnata jasal iż-żmien biex il-flieles ifaqqsu. U trid tara lil Frawlina dieħla u ħierġa ħdejn l-Imnaqqxa ħalli tara faqqasx xi fellus! Malli l-qroqqa tqum tiekol Frawlina tmur inkiss inkiss u tittawwal il-bajd. Kemm tifraħ meta tibda tara munqar żgħir itaqqab il-bajda u wara ftit tibda ħierġa rasu. F’kemm ilni ngħidlek ikisser il-qoxra tal-bajda u joħroġ jixxengel qisu fis-sakra, ħa jaqa’ u ma jaqax, lanqas jaf jimxi miskin!

Meta jfaqqsu kollha kienet tieħu kaxxa daqsxejn kbira tal-injam, tagħmlilhom ftit tiben fil-qiegħ u taqbad il-bejta bil-flieles b’kollox u tpoġġihom fiha, għax inkella wara xi jumejn jibdew jiġru ’l hemm u ’l hawn u dak is-selvaġġ ta’ serduk ma jrid xejn biex jgħaffiġhom! Il-kaxxa tal-flieles kienet teħodha fil-kċina ħalli l-flieles ikollhom is-sħana. Kienet tagħtihom ikel apposta għalihom u ftit ilma fi platt baxx ħalli ma jegħrqux.

Kienet tgħaddi s-sigħat ħdejhom tismagħhom ipespsu, tarahom inaqqru l-ikel u jiġru wara xulxin. Kienu jikbru kuljum u minn sofor, qishom ballun rix, ibiddlu l-kulur. Min joħroġ abjad, min aħmar, min imnaqqax u min jixbah lil dak il-mingħul ta’ serduk.