Il-Prinċep Żrinġ

Darba waħda kien hemm sultan li kellu tifla waħda. Din kienet tfajla mill-isbaħ u kienet il-mimmi t’għajnejn missierha. Il-prinċipessa kienet tħobb tmur fil-foresta u toqgħod tilgħab bil-ballun żgħir tad-deheb li kellha. Fil-jiem sħan tas-sajf kienet toqgħod maġenb funtana sabiħa. L-hena tagħha tgħolli l-ballun fil-għoli u terġa’ taqbdu.

Jum wieħed is-sbejħa prinċipessa kienet qed tilgħab u għolliet il-ballun fil-għoli ħafna. Ġara li l-ballun spiċċa fil-funtana u baqa’ nieżel fil-qiegħ, billi l-funtana kienet kbira u fonda.

Il-prinċipessa tgħidx kemm kienet imdejqa. Bdiet tibki kemm tiflaħ maġenb il-funtana sakemm f’daqqa waħda qalet, “Biex nerġa’ nikseb il-ballun lura, lesta li nagħti l-ġojjelli, il-flus u kulma għandi.”

Fil-pront instema’ leħen ġej minn ġol-funtana. “Għaliex qiegħda tibki, sbejħa prinċipessa?” Il-prinċipessa ħarset madwarha u kulma rat kien żrinġ kbir fuq xifer il-funtana.

“Qiegħda nibki għax waqagħli l-ballun fil-funtana u niżel fil-qiegħ,” qalet il-prinċipessa.

“U lili x’tagħtini jekk inġiblek il-ballun lura?” staqsieha ż-żrinġ.

“Nagħtik kulma tixtieq,” wieġbet il-prinċipessa.

“Xejn ma rrid mingħandek ħlief li toħodni l-palazz miegħek u tħallini niekol mill-platt tiegħek, nixrob mit-tazza tiegħek u norqod fis-sodda tiegħek,” kompla ż-żrinġ.

“Nagħtik il-kelma tiegħi,” qaltlu l-prinċipessa, “basta ġġibli l-ballun tad-deheb lura.”

Iż-żrinġ minnufih għodos fil-funtana u f’tebqa t’għajn reġa’ tela’ fil-wiċċ bil-ballun f’ħalqu. Il-prinċipessa tant ferħet li ħatfet il-ballun u telqet tiġri lura lejn il-palazz, mingħajr lanqas biss irringrazzjatu.

Dakinhar filgħaxija, waqt li l-prinċipessa kienet qiegħda tiekol ma’ missierha, instemgħet taħbita mal-bieb tal-palazz. Minn wara l-bieb instema’ leħen jgħid, “Ja prinċipessa, daħħalni ġewwa, ftakar fil-wegħda li wegħedtni b’tant ħlewwa.”

Il-prinċipessa marret tiftaħ il-bieb u malli rat iż-żrinġ saret bajda karti. Għalqet il-bieb u marret lura bilqiegħda. Qatt ma stenniet li ż-żrinġ kien se jsegwiha sal-kastell. Ir-re staqsa lill-prinċipessa min ħabbat il-bieb u hi qaltlu bl-istorja kollha taż-żrinġ u l-ballun tad-deheb.

“Jekk tajt il-kelma tiegħek, trid iżżommha dejjem,” qal ir-re lil bintu.

Il-prinċipessa fetħet il-bieb u ż-żrinġ daħal ġewwa u tela’ fuq il-mejda tal-ikel. “Ħallini niekol mill-platt tiegħek,” qal iż-żrinġ lill-prinċipessa. U kontra qalbha, il-prinċipessa ħallietu jiekol.

“Għandi l-għatx. Newwilli t-tazza tad-deheb tiegħek ħa nixrob minnha,” qal iż-żrinġ.

Il-prinċipessa ħallietu jixrob mit-tazza tagħha għalkemm ma setgħetx iżżomm id-dmugħ nieżel minn għajnejha.

Wara l-ikel iż-żrinġ kien għajjien. “Ħudni fil-kamra tiegħek, ħalli norqod fuq l-istess sodda tiegħek kif wegħedtni.”

Imbikkma kif kienet, il-prinċipessa ħadet iż-żrinġ magħha iżda ma xtaqitx li tħallih jorqod ħdejha. Fil-pront ftakret fil-kliem ta’ missierha, “Jekk tajt il-kelma tiegħek, trid iżżommha dejjem.”

U b’hekk ħalliet liż-żrinġ jorqod fis-sodda tagħha, għalkemm kontra x-xewqa tagħha.

Iżda malli sebaħ jum ġdid, il-prinċipessa ma setgħetx temmen lil għajnejha. Malli fetħet għajnejha sabet prinċep mill-isbaħ iħares lejha b’għajnejn mill-isbaħ li bħalhom qatt ma kienet rat. Il-prinċep qalilha li kien hemm saħħara kattiva li kienet bidlitu fi żrinġ u ħallietu fejn il-funtana. Biex jerġa’ jsir prinċep kellu jsib prinċipessa li tħallih jiekol mill-platt tagħha, jixrob mit-tazza tagħha, u jorqod fuq l-istess sodda tagħha.

“Inti ksirt is-seħer tas-saħħara l-kattiva. Jiena ma nixtieq xejn aktar f’ħajti milli nibqa’ ngħix miegħek u niżżewġu. B’hekk insiru re u reġina u jkollna r-renju tagħna.”

Il-prinċipessa kienet kuntenta ħafna li kien se jkollha prinċep daqshekk sabiħ, li jkun iħobbha u jirrispettaha. Kien għalhekk li l-prinċipessa aċċettat ix-xewqa tal-prinċep bil-ferħ.

Il-prinċep u l-prinċipessa niżlu isfel biex ikellmu lir-re. Dan kien kuntent ħafna li bintu kienet se tiżżewweġ lill-prinċep u ddeċieda li jagħmel festa kbira għall-okkażjoni.

Xi jiem wara, il-prinċep bagħat għall-qaddej tiegħu biex jiġi għalih u għall-prinċipessa u joħodhom fir-renju ta’ missieru.

Fi żmien qasir, waslet karrozzella tad-deheb misjuqa mill-qaddej u ż-żwiemel. Il-qaddej kien ferħan se jtir meta ra lill-prinċep. Kien ilu ħafna ma jarah u kien iddispjaċieh ħafna meta ma kienx jaf x’kien sar minnu.

Il-prinċep u l-prinċipessa telgħu fuq il-karrozzella u l-qaddej ħadhom fir-renju tal-prinċep. Hemmhekk il-prinċep u l-prinċipessa żżewġu u għexu kuntenti għall-bqija ta’ ħajjithom.