(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Il-Kartiera tal-Fizzjal

Fl-aħħar snin tas-seklu l-ieħor fizzjal Ingliż, li kien stazzjonat hawn Malta, għadda minn ġrajja tassew misterjuża. F’din il-gżira ftit li xejn tista’ tostor u l-kurżitajiet malajr jinfirxu mal-erbat irjieħ. Bosta nanniet irrakkontawha lit-tfal u għaddewha lill-ġenerazzjonijiet għal ħafna snin.

Forsi kien il-mod tagħhom kif jgħaddu l-istejjer u jista’ jkun li kien hemm min kien jgħawweġ xi ftit biex iżomm l-attenzjoni tas-semmiegħa. Iżda dan il-fatt kien ġie anke rrappurtat f’The Daily Chronicle ta’ pajjiżna fil-bidu ta’ dan is-seklu. L-awtur ma kien ħadd ħlief il-fizzjal innifsu, li donnu ma sabx paċi qabel ma ra l-ġrajja miktuba iswed fuq l-abjad.

Lejla waħda, il-fizzjal Ingliż kien fi triqtu lejn Ħal Balzan. Ftit kien hawn dawl fit-toroq dak iż-żmien. Kien għall-ħabta ta’ nofsillejl. Jista’ jkun li kien għadu kemm ġej minn xi festin li kienu jħobbu jagħmlu l-fizzjali Ingliżi stazzjonati hawn Malta. Meta kien għaddej mill-inħawi tal-Blata l-Bajda lemaħ żewġ tfajliet Maltin mexjin mal-ġenb tat-triq. Fiż-żmien li seħħet din il-ġrajja, biex tfajla tkun barra billejl kien fatt straordinarju. Ma kontx tara tfajliet jiġġerrew barra, sakemm ma jkollhomx bżonn xi għajnuna. Il-fizzjal, ta’ ġentlom li kien, waqaf jistaqsihom jekk kellhomx bżonn xi ħaġa. Għall-ewwel ma kellmuhx iżda wara ftit waħda mit-tfajliet talbitu biex iwassalhom id-dar tagħhom, il-Belt.

Paġna 1

Kienu żewġ tfajliet edukati u ta’ ftit kliem. Il-fizzjal ħaseb li aħjar jakkumpanjahom sal-bieb. Kont toqtol u tidfen f’dak il-lejl u ried iserraħ rasu li jaslu qawwijin u sħaħ sal-bieb. Mexa magħhom sa Triq San Kristofru, fejn qalulu li kienu joqogħdu ż-żewġ tfajliet. Ftit li xejn kont tagħraf il-bieb tad-dar minn bibien oħra imma l-fizzjal innota l-ħabbata tar-ram imqabbża ’l barra f’forma ta’ ras ta’ ħuta. Dawn id-dettalji f’pajjiżna kienu jolqtuh wisq. It-tfajliet stednuh jidħol għandhom biex jieħu xi ħaġa x'jixrob magħhom u forsi jitkellmu ftit. Bejn li ma xtaqtx jiksirhom u bejn bħal qabditu kurżità jidħol f’did-dar kbira fil-Belt, il-fizzjal aċċetta. Tellgħuh fis-salott u għamlulu kikkra kafè. Il-fizzjal ħa gost bil-kumpanija tagħhom. Ftit kien kellem tfajliet Maltin kemm kien ilu hawn. Iżda ma xtaqx idewwimhom u ried imur lejn daru għax kien sar wisq ħin. Sellem lit-tfajliet u telaq fi triqtu lejn Ħal Balzan.

L-għada filgħodu l-fizzjal baqa’ jaħseb fiż-żewġ tfajliet, x’kienu qed jagħmlu barra dawk il-ħinijiet u kif kienu joqogħdu waħedhom f’dar qisha ħabs. Xtaq joħroġ biex imur jixtri iżda xħin fittex il-kartiera tal-flus induna li kien ħallieha warajh. Kienet kartiera tal-ġilda u għal dak iż-żmien kienet tqum sold ġmielu. Dakinhar filgħodu meta kien il-Union Club ta’ Tas-Sliema ordna lil wieħed mill-impjegati biex imur iġiblu lura l-kartiera. Spjegalu d-dar fejn kienet fi triq San Kristofru u ma naqasx li jsemmilu l-ħabbata tar-ram biex ikun jista’ jagħraf il-bieb. L-impjegat ġie lura u skuża ruħu kemm-il darba mal-fizzjal. Spjegalu li kien sab id-dar u li kienet tidher li ħadd ma kien joqgħod fiha. Dam iħabbat ħafna iżda ħadd ma fetaħlu.

Paġna 2

Il-fizzjal qatagħha li jmur hu stess. Il-kartiera kienet ta’ valur u ma xtaqx iħalli ħafna biex jerġa’ jirkupraha. Dwar dawk iż-żewġ tfajliet ma kien jaf xejn. Mexa Triq San Kristofru u fela d-djar u l-bibien sakemm sab il-bieb tad-dar taż-żewġ tfajliet. Il-bieb tad-dar tassew kien jidher imkagħbar u li kien ilu ma jieħu lagħqa żebgħa, li kompla kkonfermalu li dawn iż-żewġ tfajliet kienu joqogħdu waħedhom f’din id-dar. Ċempel darba, darbtejn. Ċempel it-tielet darba iżda ħadd ma ġie jiftaħ. Beda jħabbat fuq il-bieb… Min setgħu kienu t-tfajliet?

Dak il-ħin għaddiet waħda mill-ġirien u b’Ingliż imfarrak qaltlu li kien kollu ta’ xejn li kien qed iħabbat, għax ħadd ma kien joqgħod f’dik id-dar. Il-fizzjal ma riedx jemmen. Ma kienx jaf x’jaqbad jaħseb. Setgħu riedu jisirquh dawk iż-żewġ tfajliet, daħku bih u riedu joħdulu xi ħaġa ta’ valur. Ħabat tajjeb li ma damx ma telaq mingħandhom. Ma kienx baqagħlu triq oħra ħlief li jmur jagħmel rapport l-għassa u jgħidilhom li kien ħalla l-kartiera tal-flus f’din id-dar.

Wara ftit il-fizzjal ġie lura akkumpanjat minn spettur u pulizjott, li bdew iħabbtu fuq il-bieb. Inġabru ftit nies madwarhom u kollha bdew jgħidulhom li għalxejn kienu qed iħabbtu għax dik id-dar kienet ilha snin magħluqa u imbarrata. Il-fizzjal ħares ’il fuq u t-twieqi kienu tassew imbarrati bl-injam. Fuq l-insistenza tal-fizzjal li qalilhom li kien inkwetat dwar iż-żewġ tfajliet li kien wassal billejl, il-pulizija faqgħu l-bieb.

Paġna 3

Hekk kif tefgħu l-bieb ġewwa, it-tlett irġiel daħlu f’daħna trab. Id-dar kellha riħa ta’ għeluq u kien jidher biċ-ċar li kienet ilha ma tinfetaħ. Il-ħitan kienu mneżżgħa miż-żebgħa u t-trab kien fuq l-għamara kollha. Il-fizzjal ried jitla’ fuq, fis-salott. Baqa’ jħaqqaqha magħhom li jista’ jkun li billejl ma nnotax kemm kienet mitluqa d-dar iżda li kien ċert li t-tfajliet laqgħuh fis-salott. Telgħu miegħu u b’għaġeb kbir tagħhom fuq tavolina mimlija trab u għanqbut raw il-kartiera tal-ġilda.

Ħadd ma jaf kemm kien dam hawn Malta l-fizzjal jew kemm kien dam ħaj. Iżda dil-ġrajja żgur ma ndifnitx miegħu. Għalkemm ġrat madwar mitt sena ilu u ġiet irrapportata fil-gazzetta The Daily Chronicle, din l-istorja misterjuża tawha l-ħajja niesna stess billi għaddewha lill-ġenerazzjonijiet li ġew warajhom bis-sengħa tar-rakkont tagħhom.

Paġna 4

Tmiem