Il-Ġurdien u z-Zija Tara

Kulħadd fi Triq il-Kbira kien jaf kemm kienet tibża’ mill-ġrieden iz-zija Tara. Mhux biss, imma ħafna drabi kienu jidħlu għaliha l-għassa tal-pulizija, il-kunsill lokali u s-segretarjat għall-anzjani, meta kienu jisimgħu dak l-għajjat u t-twerżiq kollu.

Għodwa waħda, malli kont miexi lura mill-iskola nsib pandemonju sħiħ f’din it-triq. Ħafna nies kienu barra, min b’xi siġġu, min b’xi sellum u min jirraġuna u jiftaħ idejh biex jagħti l-aħjar parir. Fil-pront nisma’ s-sirena tat-trakk tas-sezzjoni tat-tifi tan-nar tal-pulizija. Kulħadd warrab u b’għaġeb kbir tiegħi l-vettura waqfet eżatt quddiem id-dar taz-zija Tara.

Bqajt issummat fejn kont. Bilfors li kienet ġrat xi ħaġa gravi liz-zija. Ippruvajt nidħol bejn il-folla imma Ġanni tal-laħam malajr żammni minn idejja.

“Oqgħod hawn, ġuvnott, ħallihom jaqdu dmirhom sew,” qalli b’dak il-leħen oħxon. Għalxejn għajjatt li dik kienet id-dar taz-zija. Leħni ftit li xejn instema’ f’dik il-konfużjoni. Dawk tat-tifi tan-nar tgħidx kemm kienu ħfief u f’kemm ili ngħid tellgħu s-slielem għal ġol-gallarija taz-zija. Wara ftit naraw iz-zija mdendla ma’ wieħed minnhom nieżla bil-mod il-mod mas-sellum. Kienet issakkret fil-gallarija għax ġewwa daħlilha ġurdien u b’xejn ma’ setgħat tinżel. Il-ġirien twajbin mill-ewwel newlulha siġġu biex tistrieħ wara battikata bħal dik. Xi ħadd newlilha tazza te.

Wara l-bieb magħluq tad-dar tagħha beda jinstema’ ħafna tisbit u daqqiet. In-nies baqgħu jistennew. Wara ftit infetaħ il-bieb u ħareġ wieħed minn dawk tat-tifi tan-nar bi ħwejġu nofshom żmattati u wiċċu għarqan xraba.

“Qbadnieh!” għajjat, filwaqt li l-folla miġbura ċapċpet u ferħet. Mhux għax ma ddispjaċinix għaz-zija Tara bil-kedda li kienet ħadet, imma ma stajtx ma nitħassarx lil dak il-povru ġurdien tal-imramma jirtogħod ġon-nassa. Stħajjiltu ljun imbeżża’ maqbud ġo gaġġa fi triqtu lejn l-arena ta’ Ruma.

Kien wara dakinhar li l-mamà ddeċidiet li titkellem ftit fit-tul maz-zija Tara dwar din il-problema. Jien u oħti Selina ma konniex se nitilfuha xi ħaġa bħal din. L-ewwel nett għax għand iz-zija dejjem kien ikun hemm il-forn imqabbad b’xi kejk jinħema u t-tieni għaliex dejjem semgħat l-opinjoni tagħna wkoll.

“Ara ftit, zi,” bditilha l-mamà, “żgħira ħafna m’għadekx u dawn il-keded m’għandekx xi tridhom.”

“Naf, jaħasra,” karbet iz-zija Tara, “imma jien meta nara ġurdien itini ferħ ta’ ġenn. Minn xejn ma nibża’, lanqas mid-dlam, imma jekk nidħol hawn ġew u nsib ġurdien ikun se jtini ħass ħażin!”

“Jien ma nibżax, zi, mill-ġrieden,” qbiżt jien fil-pront, “dejjem tista’ ċċempel lili jekk jidħollok xi wieħed.” Jekk jirnexxili naqbdilha l-ġurdien iz-zija Tara żgur kienet se tkun rikonoxxenti miegħi. Kont diġà qed nara platt kollu ħlewwiet milli kienet taf taħmi hi!

“U mela int se tkun id-dar dejjem,” qatgħatli ħsiebi Selina. “Int filgħodu tkun l-iskola. Iz-zija mhux se toqgħod tistenna sakemm tiġi lura d-dar int biex teħles mill-ġurdien.”

“Mela le!” għajtet iz-zija, filwaqt li rewħet wiċċha bil-maktur. “Kieku mejta joħorġuni minn hawn!”

“Ara, ejjew ħalli nirraġunaw ftit,” qabżet tgħid il-mamà. “Mela int tkun waħdek u jekk jidħollok ġurdien trid l-għajnuna mill-ewwel għax tibża’…”

Waqfet ftit biex tara kif se tkompli. Ma kinitx xi ħaġa faċli. U jekk iz-zija kienet tibża’ ħafna mill-ġrieden, il-mamà mhux inqas minnha. Ma xtaqitx toffri biex tmur taqbdu hi.

“Zi, min jaf li kieku tipprova taqbdu int?” ħasdet lil kulħadd Selina f’daqqa waħda. “Taf int, mhux qed ngħidlek li se taqbad ġurdien qisek m’intix int. Imma l-Miss darba qaltilna li jekk nibżgħu minn xi ħaġa għandna naffaċċjawha.”

“Iva, zi, bħall-matematika ta’ Selina,” qtajtilha kliemha jien, imma meta rajt lil oħti tagħmilli sinjal b’difrejha għall-ponta malajr komplejt, “dik kienet tibża’ mill-matematika imma issa ara kemm saret brava!”

“Imma jien kif se naffaċċjah ġurdien?” bdiet tokrob iz-zija filwaqt li qamet tara l-kejk sarx. Hija u miexja bdiet tħares madwarha ma jmurx joħroġ xi wieħed tal-mustaċċi twal.

“Faċli, zi,” reġgħet Selina, “int m’hemmx għalfejn tiġi wiċċ imb wiċċ miegħu. Kulma trid tlestilu nassa b’xi ġobna ġo fiha. Hu jidħol għall-ġobna u jinqabad. Imbagħad tista’ ċċempel lil ħija biex ineħħihulek hu, tajjeb?” żiedet filwaqt li ħarset lejja bi nkejja.

U filwaqt li z-zija u l-mamà qagħdu jaraw kif se jinqasam il-kejk biex ma jitfarrakx, jien u oħti bdejna nħejju pjan ta’ attakk f’każ ta’ xi invażjoni minn ġurdien.

“Ara, zi,” għedtilha jien, filwaqt li wrejtha l-bieb tal-ġnien, “l-aħjar li tagħmel in-nases f’dawn il-postijiet għax minn hawn x’aktarx li jidħol ġurdien.”

Selina kienet diġà mmarkat b’biċċa ġibs ikkulurita rokna fil-kċina. “Tinsiex li hawn se jiġi għax ixomm ħafna affarijiet tajbin, eh!”

Tant domna nimmarkaw u nieklu li sakemm immarkajna l-postijiet kollha, il-kejk laħaq spiċċa.

Xi ġimgħa wara kont sejjer lura d-dar mill-iskola. Kien ili xi ftit ma nħabbat għand iz-zija. Iddeċidejt li nittawlilha ftit. Xejn xejn forsi ndabbar xi ħaġa tajba. Iz-zija fetħitli kollha daħqana.

“Idħol, ibqa’ dieħel,” bdiet timbuttani ’l ġewwa , “ejja ħa tara min hawn!”

Għal ftit bdejt nitħasseb. Id-dar kienet mimlija nases fil-postijiet fejn għednielha biex tpoġġihom. Kollha kienu vojta ħlief għall-biċċiet tal-ġobon imqattgħin irqaq. Imxejt lejn il-kċina fejn kienet ġejja riħa taqsam ta’ ħlewwiet u benna. Iz-zija malajr ħaditli l-basket u mbuttatni fuq siġġu mal-mejda. Ma kont għadni rajt ’il ħadd. Is-soltu z-zija tagħmilli kantaliena ta’ mistoqsijiet dwar kif mort l-iskola, jekk lgħabtx ma’ sħabi, jekk qgħadtx bravu. Imma xejn minn dan. Iz-zija tant kienet ferħana li donnha nsiet li kont għadni ġej mill-iskola.

“Ħalli naqtagħlek biċċa minn dan is-suflè,” qaltli, filwaqt li żiditli biċċa mal-kumplament tal-pastini li kelli fuq il-plattina, “lil Rudolf tgħidx kemm għoġbu!”

Jien tbissimtilha. Kont għadni ma nista’ nifhem xejn. Ma nagħmlux mod li issa z-zija qed tħoss moħħha wara dik il-battikata tal-ġurdien tal-ġimgħa ta’ qabel. Liz-zija ħallejtha ttaqtaq fuq il-gosti gastronomiċi ta’ Rudolf, imma fl-aħħar ma stajtx nissaporti iżjed.

“Imma dan Rudolf min hu, zi?” staqsejtha kollni kurżità.

“Iii, għadek ma indunajtx?” wieġbet iz-zija Tara, filwaqt li ġġebbdet għal fuq il-mejda. “Hemm qiegħed ħdejn saqajk. Rajtu lin-neputi? Bħalek, iħobbu s-suflè. Ħa biċċa lewża oħra, Rudolf, sabiħ. Ara kemm hu bravu.”

Lanqas ridt nemmen lil għajnejja. Ġriżmejja nixfu u għal ftit ma xraqtx . Ħdejn saqajja kien hemm nitfa ta’ ġurdien jimla żaqqu u jogħrok il-mustaċċi.

“Għax jien ukoll ma spjegajtlekx,” bdiet tidħaq iz-zija Tara. “Mela, ilbieraħ kmieni kmieni nisma’ xi tħaxwix fil-kċina. Bżajt ftit, taf, għax kont naf x’inhu ġej għalija. Imma mbagħad qgħadt naħseb fuq li qaltli Selina u rabbejt kuraġġ ta’ sur.”

Jien kont għadni ma nistax nibla’ sew imma bżajt inwaqqafha liz-zija.

“Bdejt narma n-nases bil-ġobon ma’ kullimkien. Imma dak il-ħalliel lanqas biss ħares lejhom, baqa’ hemm, taħt il-bank tal-kċina. Tgħidx kemm irtogħdu saqajja hekk kif ersaqt biex inkompli dak is-suflè. Bdejt inħarislu minn taħt il-għajn u taf li baqa’ hemm iċċassat lejja? Għamilt tabirruħi li m’iniex qed nagħti kasu u komplejt inħawwad. Imbagħad, bħal donni ġieni ħsieb. Għedt mhux forsi ma jħobbux il-ġobon, hux, jew għandu l-kolesterol? Tfajt biċċa mis-suflè fl-art għat-taparsi waqgħatli. Taf li ġie għaliha? Tfajt biċċa oħra u reġa’ ġie. Biex ngħidlek bdejt niggustah.”

Din qatt ma kont smajtha. Ġurdien iħobb is-suflè u ma jħobbx il-ġobon. Kif se mmur id-dar u ngħidilhom? Ara Selina x’passata se tgħaddi bija. Hekk kif kont mitluf fi ħsibijieti lmaħt liz-zija titkellem mal-ġurdien, qisha qed titkellem ma’ xi kelb żgħir taċ-Chihuahua. Ġieli kont nismagħha titkellem waħidha imma issa għandha ’l Rudolf iżommilha kumpanija.

“Issa fejn se żżommu, zi?” staqsejtha meta fl-aħħar sibt ilsieni.

“Rudolf għandu l-gaġġa tiegħu,” weġbitni, filwaqt li wrietni gaġġa tal-fniek tal-Indi kollha ġugarelli. “Taf kemm sar bravu? Jien inħallihielu miftuħa, jidħol u joħroġ xħin irid.”

“Naħseb li minn hawn mhux se jitlaqlek, zi,” komplejt jien. “Mid-dehra, il-ħelu tiegħek għoġbu wisq!”

Liz-zija kont tellajtha l-ġenna b’dal-kliem u lestietli borża se tixpakka bil-ħelu li kienet ħmiet biex noħodha miegħi d-dar.

“Qis li tgħaddi tarana meta trid, taf,” qaltli xħin wasslitni fil-bieb. Ma stajtx ma nifraħx għaz-zija Tara. Wara daż-żmien kollu waħidha rajtha ferħana wisq. Issa għandha ’l Rudolf ma’ min tgerger fuq kemm damet il-laqgħa tal-anzjani, kemm damet tixtri jew kemm kont inkissrilha xtieli bil-ballun.