(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ġanluka u Maruska 02: Libsa Roża

Brenda, il-ħabiba ta’ Maruska, kienet waslet biex tagħlaq sninha u l-ġenituri tagħha kienu ser jagħmlulha festin żgħir. Brenda stiednet lil sħabha kollha tal-klassi biex jattendu l-festin t’għeluq sninha. Maruska tgħidx kemm ferħet b’din l-istedina u marret id-dar se ttir bil-ferħ.

Paġna 1

Maruska xtaqet tilbes l-aħjar ilbies li kellha għal din l-okkażjoni. Riedet tilbes il-libsa li libset għat-tieġ tat-tifla tal-ġara, imma meta ppruvatha ġietha qasira wisq. Maruska kienet twalet biċċa sew minn sitt xhur ’l hawn!

Paġna 2

Għalhekk is-Sibt filgħodu l-mamà ħadet lil bintha Maruska tixtri libsa ġdida għall-festin ta’ Brenda. Wara li damu mhux ħażin deħlin u ħerġin fil-ħwienet tal-ħwejjeġ bla ma jixtru xejn, Maruska lemħet libsa f’vetrina ta’ ħanut partikolari. It-tifla mill-ewwel ħadet grazzja ma’ din il-libsa roża u bdiet timmaġina lilha nfisha xi prinċipessa.

Paġna 3

Imma b’xorti ħażina meta Maruska ppruvat il-libsa ma qagħditilhiex pulita għax ġietha daqsxejn wiesgħa. Sidt il-ħanut qaltilha li iżgħar ma kellhiex u għalxejn urietha lbiesi oħra, għax lil Maruska m’għoġbitha l-ebda waħda minnhom.

Paġna 4

Ħwienet oħra xi jduru ma kienx fadal, u Maruska dendlet il-geddum għax ħasbet li kienet ser tibqa’ bla libsa. Il-mamà qaltilha li l-libsa setgħu jixtruha xorta waħda, imbagħad tieħu ħsieb tirranġahielha hi. Kemm ferħet Maruska u li kien għaliha, il-mamà kienet tirranġahielha malli waslu d-dar. Il-mamà wegħditha li sas-Sibt ta’ wara, dakinhar tal-festin, tilħaq iddejjaqhielha.

Paġna 5

Matul il-ġimgħa l-mamà kienet imħabbta ħafna u ma sabitx ċans tirranġa l-libsa ta’ Maruska, iżda żguratha li sas-Sibt il-libsa tkun lesta. Maruska ma fdathiex lill-mamà, għalhekk bla ma qaltilha xejn ħadet il-libsa r-roża għand in-nanna Minka biex iddejjaqhielha hi.

Paġna 6

Is-Sibt filgħodu l-mamà qamet ftit kmieni biex qabel tilħaq tqum Maruska tkun irranġatilha l-libsa u b’hekk issibha lesta. Wara l-kolazzjon Maruska ħarġet il-libsa r-roża mill-gwardarobba biex tilbisha, iżda din ma daħlitilhiex għax kienet dejqa wisq! Maruska malajr fehmet x’kien ġara u ddispjaċieha ħafna li ma fdatx lill-mamà.

Paġna 7

Tmiem