Fuq il-Fruntiera

Dun Rafel, il-kappillan tar-raħal, kien għadu kif spiċċa l-quddiesa tas-sitta u nofs ta’ filgħaxija. Neħħa l-abiti sagri, bieshom u poġġiehom fuq il-bank għoli u twil tas-sagristija. Wara, mexa lejn l-uffiċċju tiegħu. Deher għajjien mejjet, ikaxkar riġlejh ma’ kull pass, qishom f’salt bdew jidhru fuqu s-sebgħin sena tiegħu. Is-soltu jmur id-dar dak il-ħin, sinjal li kien baqagħlu xi xogħol urġenti fl-uffiċċju.

Beda jfittex ċertifikat ta’ xi parrina tal-magħmudija, li kien inħeba xi mkien mal-eluf ta’ karti li jkollu jiġru fuq l-iskrivanija. Kellu suspett li dan iċ-ċertifikat ma jeżistix. Mhux dejjem tista’ temmen kulma jgħidulek il-parruċċani. Beda Pater, Ave u Glorja lil Sant’Antnin, forsi ma tafx kif jirnexxilu jsibu. Imma kellu jitlaq minn idejh għax sema’ xi għajjat fil-knisja, meta suppost dak il-ħin is-sagristan ikun qed jagħlaq kullimkien. Iva, bilħaqq, ftakar li kien il-Ħamis u li kellhom imorru xi żgħażagħ għall-prova tad-daqq għall-adorazzjoni tal-Ġimgħa. Imma xorta ma jispjegax dak l-istorbju kollu. Telaq minn idejh.

Hemm, sabhom qishom żewġ armati lesti biex jaqbżu u jattakkaw lil xulxin. Ma kienu ħadd ħlief grupp ta’ tfajliet bil-kitarri u grupp ġuvintur bil-vjolini, xi tnax-il ruħ b’kollox. Għax inqalgħet kwistjoni bejniethom: il-bniet riedu jgħidu li l-għada jmisshom huma għax hekk kien qalilhom is-sagristan, waqt li s-subien sostnew li l-kappillan kien qabbad lilhom. Biex tagħqad, il-kapijiet tal-gruppi kienu kuġini, kuġini li l-familji tagħhom ma jħarsux lejn xulxin, u dan il-kappillan kien jafu sew.

Dak kien jonqsu l-povru Dun Rafel! L-ewwel reazzjoni tiegħu kienet li jitfa’ ’l kulħadd ’il barra u jsakkar il-knisja u l-għada ma ssirx l-adorazzjoni. Fl-istess ħin il-kuxjenza tiegħu bdiet tniggżu. Ma setax jagħmel hekk. B’daqshekk ma kien se jsolvi l-ebda problema.

Sejjaħ liż-żewġ kapijiet tal-gruppi biex jidħlu miegħu fl-uffiċċju waqt li, b’ton ftit aħrax, fakkar lill-oħrajn li huma jinsabu l-knisja; mela kellhom juru ftit rispett u jżommu l-ordni.

Daħlu warajh. Offrielhom siġġu u poġġew bilqiegħda quddiemu, imbagħad għalaq il-bieb tal-uffiċċju biex iħalluhom bi kwiethom. Qabel ma fetaħ fommu, il-kappillan beda jitlob f’qalbu biex il-Mulej jilluminah kif se jħoll dik il-kobba mħabbla ta’ quddiemu. Sadattant baqa’ jħares fiss lejn it-tnejn li huma. Imbagħad beda,

“Int, Liliana, fuq liema suġġett ser tfassal l-adorazzjoni ta’ għada?”

“Fuq l-imħabba lejn il-proxxmu, Sur Kappillan…”

“U intom, Ġorġ?”

“Kumbinazzjoni kważi l-istess, imma aktar dwar il-maħfra.”

Dun Rafel tah li jfaqqa’ daħka għar-ridikolaġni tas-sitwazzjoni, imma kkontrolla ruħu u żamm il-bixra severa fuq wiċċu. “Tajjeb wisq, temi sbieħ li jgħaqqdu lill-parruċċani fl-imħabba… hekk suppost, hux veru?” Ma wieġeb ħadd, u għalhekk kompla, “Nammirakom għall-kuraġġ li għandkom biex titkellmu dwar dan, meta qisu bejnietkom… intom it-tnejn… Liliana u Ġorġ… ma tantx temmnu fl-imħabba u fil-maħfra għax milli qed nara, kważi lesti biex taqbdu f’xulxin. Uliedi, ma tantx huwa eżempju tajjeb dan. Ma jimpurtax… naraw kif ser insolvu din is-sitwazzjoni u min minnkom se jċedi biex għada l-adorazzjoni tkun f’idejn l-ieħor.”

Skiet taqtgħu b’sikkina. Il-kappillan ma dejqu xejn dan is-skiet. Baqa’ jitlob f’qalbu li b’xi mod jaslu għal ftehim. Għaqqad idejh ma’ xulxin, poġġiehom fuq l-iskrivanija f’poża ta’ talb u sadattant baxxa rasu.

Fl-aħħar, it-tfajla baxxiet rasha, ħarġet il-maktur mill-but u ressqitu lejn wiċċha. It-tfajjel qaħqaħ tnejn u ċċaqlaq ftit, qisu f’salt beda jħoss il-labar taħtu.

“Jien lesta ħalli nċedi…” lissnet minn taħt l-ilsien Liliana, “Ġorġ, ħudu ħsieb intom…”

“Le, le, ma tarax… anzi jien kont se nċedi,” ħatafha l-ġuvnott b’leħen ftit ogħla minn tagħha.

Il-kappillan ħa nifs twil u kważi tbissem, “Mela, issa ser tkun kwistjoni dwar min se jċedi… bdejna naslu xi mkien!” Iż-żgħażagħ bdew jitbissmu għal dak il-kumment ta’ Dun Rafel li kompla, “Ara, għax ma nagħmlux hekk—agħmluha flimkien, tkun idea oriġinali, xi ħaġa ġdida għall-parroċċa. Xi tgħidu?”

Iż-żgħażagħ dehru li nħasdu b’din id-deċiżjoni, iżda wara ftit ħarsu lejn xulxin.

“X’taħseb int, Liliana?” staqsa b’leħen ħelu Ġorġ, “U jekk trid ibdew intom.”

“Le, ibdew intom, Ġorġ…” Hawn ħatafhom Dun Rafel, “Iva anke dwar min jibda se tikkustinjaw! Għada jibdew is-subien u darb’oħra jibdew il-bniet. Tajjeb hekk?”

“Jiġifieri li dejjem se nkomplu hekk, bniet u subien flimkien?” temtmet Liliana, kważi għadha mhix qed temmen, “Għax aħna konna naħsbu li inti ma tantx togħġbok biċċa xogħol bħal din…”

“Binti, taf x’ma jogħġobnix lili? Il-ġlied bejn il-familji u l-għajjat fil-knisja…” Il-kappillan qam bilwieqfa u ż-żgħażagħ qamu wkoll bi tbissima fuq wiċċhom. Is-saċerdot ħares lejn l-arloġġ. “Ara x’nagħmlu, fittxu ddeċiedu x’se ddoqqu u t-talb li se tgħidu, imma ddumux wisq aktar minn nofs siegħa għax sar wisq ħin, jiġifieri m’hemmx provi ta’ daqq illejla. Għada l-Mulej ikollu jaċċetta l-innijiet u d-daqq bla prova… żgur li ma jiddejjaqx jisma’ stunar basta ma jarax aktar ġlied fil-knisja… u bejn il-familji!”

“Grazzi ħafna, Sur Kappillan…” lissnu kważi flimkien iż-żgħażagħ bi tbissima tixgħel fuq wiċċhom. Kienu ilhom jixtiequ li jgħaqqdu liż-żewġ gruppi imma l-kappillan dejjem irrifjuta.

Fl-aħħar kien qatagħha li aħjar jgħaqqad il-gruppi flimkien milli jibqgħu jheddu lil xulxin fuq il-fruntiera.