Daqqa t'Id

Il-familja tagħna hi magħmula minn erba' membri. Hemm jiena, ħija l-kbir, ommi u missieri. Jiena l-hena tiegħi immidd idejja fid-dar, iżda mhux dejjem iħalluni nagħmel dan. Minħabba fihom ikolli nagħmel il-geddum. Meta ma jkunux iriduni ħdejhom, malajr jibagħtuni nilgħab bil-ġugarelli. Jaħsbu li jien nieħu gost nilgħab il-ħin kollu.

Lanqas ħallewni nagħti daqqa t’id. Mhux hekk jgħidu l-kbar, “Ejja agħti daqqa t’id!” meta jkunu jriduk tgħin? Jien sirt nitkellem bħalhom ukoll imma lili ħadd ma jagħti kasi. Inħossni kbira biżżejjed biex naħdem fid-dar jien ukoll. Ma rawx kemm irċevejt kartolini meta għalaqt erba’ snin? Hemm għadhom imdendlin fil-kamra tiegħi.

Kos, kultant ma nifhimhomx ’il dawn il-kbar, taf. Kif tista’ tgħinhom jekk tagħti daqqa t’id? Meta jtini daqqa t’id Kurt tgħidx kemm iweġġagħni għax idejh goffi u ħoxnin dak. Jien ma nħallihx b’xejn lanqas. U meta weħilli l-ikel u tani daqqa t’id fuq dahri l-papà, ġejt wiċċi fil-platt u tgħidx kemm daħku bija!

Xi minn daqqiet il-mamà nismagħha tgħid, “Ġbartuhom il-pupi? Dalwaqt niġi nagħti daqqa t’għajn,” u jien tgħidx kemm nibda ngħatti għajnejja. Ajma ħej! Xi ġlieda bl-għajnejn ikun jonqos hawn ġew. Mhux biżżejjed ikun hawn ġenn! Jien mill-ewwel nobdiha u mmur niġbor dawk il-pupi mill-art. Mhux bħal ħija!

Mid-dehra dawn il-kbar kollha ġellidin. Darba waħda l-papà smajtu jitkellem fuq it-telefown u beda jgħid, “Inti għaddi s’hawn. Kulma trid daqqa ta’ pinna…” Imbagħad jien mort nistaqsihom jekk iridux daqqa t’id u kulħadd bagħatni ’l hemm. Għalkemm għadni żgħira, jien xorta waħda nifhem u kapaċi nagħmel dak kollu li jqabbduni. Ma nafx għaliex ma jħallunix ngħinhom għax dak li s-soltu tqabbadni nagħmel il-mamà dejjem għamiltu sew.

Dan l-aħħar iddeċidew li jiżbgħu s-salott u meta mort biex ngħinhom il-papà bagħatni ’l hemm, iżda lil ħija ħallieh jgħinhom. Hekk mhux sewwa! Jien ukoll nixtieq ngħinhom jiżbgħu s-salott. Veru li għandi jdejja żgħar u ma tantx jesgħu affarijiet, imma jien nieħu gost inkun hemm ukoll. Dejjem nista’ nagħti daqqa t’id ċkejkna. Mhux hekk?

Stenna ftit, forsi mhux daqqa t’id iridu wara kollox… imma daqqa ta’ sieq! Iva, hekk se nagħmel, se ninżel ħdejhom u nibda nagħtihom daqqa ta’ sieq kollha kemm huma!

Kos, il-lingwa Maltija! Kemm għandha frażijiet differenti bil-kelma daqqa... daqqa t’id, daqqa t’għajn, daqqa ta’ pinna, daqqa ta’ sieq... Qatt ma bsart li jista’ jkollhom dawn it-tifsiriet differenti!