Ċinu 1: Is-Surmast il-Ġdid

Meta s-Sur Camilleri wasal fl-iskola l-ġdida tiegħu kienu saru s-siegħa neqsin kwart ta’ waranofsinhar. Malli ħareġ fil-bitħa ra lit-tfal jiġru u jilagħbu ferħanin, filwaqt li f’roqgħa f’nofs il-bitħa lemaħ lill-għalliema, li kienu qed jagħtu daqqa t’għajn sewwa lit-tfal sakemm jispiċċa l-brejk. Ħadd mill-għalliema iżda ma kien għadu ntebaħ bis-surmast il-ġdid tagħhom għax dawn kien mingħalihom li kellu jasal l-għada filgħodu.

Dak li nduna bih kien naqra ta’ ġurdien jismu Ċinu li, bħas-soltu, kien intasab f’toqba fil-ħajt medhi jħares u jitgħaxxaq bit-tfal. Min jaf kieku t-tfal, l-iktar il-bniet, kellhom jindunaw bih kemm kienu jwerżqu u jitilqu jiġru! U forsi anki xi għalliema wkoll!

‘Dan żgur is-surmast il-ġdid li smajthom jitkellmu fuqu,’ ħaseb Ċinu bejnu u bejn ruħu.

Sadanittant, is-Sur Camilleri kien qorob lejn l-għalliema u sellmilhom bil-ħlewwa u għarrafhom min kien. Kif semgħu hekk, l-għalliema sellmulu lura u ġabru t-tfal tal-klassi tagħhom f’ringieli kif jinġabru kull filgħodu għall-assembly.

Is-Surmast il-ġdid resaq fin-nofs, quddiem it-tfal, u ta erba’ tokki bil-qanpiena li ħasdu lil kulħadd u minnufih fil-bitħa waqa’ skiet perfett. It-tfal ħarsu lejn xulxin xi ftit mistagħġba. Kien hemm min xengel ftit rasu jew kemmex xufftejh, imma f’qalbhom kienu jħossuhom henjin. Is-Surmast ma damx ma fehem li dawk l-anġli żgħar kienu laqgħuh fosthom bil-qalb u kienu jixtiequ jsiru l-akbar ħbieb tiegħu.

‘Kemm jidher raġel minn tagħna,’ qal Ċinu filwaqt li xiref rasu ftit aktar ’il barra. Is-Surmast radd is-salib u qal it-talba ta’ wara l-ikel bil-ġabra kollha. Imbagħad qaħqaħ ftit griżmejh u beda jkellem lit-tfal.

“Tfal, naħseb li diġà ndunajtu min jien. Jien is-surmast il-ġdid tagħkom. Tassew inħossni ferħan li ninsab fostkom u nixtieq ferm li nkun l-akbar ħabib tagħkom. Intom kollha tridu tkunu ħbieb tiegħi, hux tassew?”

“Irridu!” instama’ jgħid leħen ta’ tifel. It-tfal l-oħra kollha ħarsu lejh.

‘Dejjem l-istess wieħed jaqbeż fin-nofs,’ gerger waħdu Ċinu.

Is-Surmast tbissem ukoll u wara li siket għal ftit, reġa’ beda jkellem lit-tfal.

“Nixtieq li dak it-tifel li weġibni jiġi ftit ħdejja ħalli nara sewwa min hu.”

Skiet! Dak it-tifel beża’ u ma tħajjarx jiċċaqlaq minn postu. Ma kienx jaf x’se jaqbad jagħmel. Imma billi s-Surmast reġa’ tenna l-ordni li kien ta, kellu joħroġ u jimxi bil-mod lejn is-Sur Camilleri.

Malli wasal ħdejh niżżel rasu ’l isfel u ħa nifs qawwi ’l ġewwa bħallikieku kien qed jibki.

“X’jismek?” staqsieh is-Surmast filwaqt li għannqu miegħu.

“Matthew,” wieġeb it-tifel minn taħt l-ilsien.

“Isem tassew sabiħ! Ara, Matthew, mela minn issa stess int, jien u dawn sħabek kollha se nagħtu kelma lil xulxin li nkunu dejjem ħbieb tal-qalb. L-għalliema jistgħu jidħlu magħna wkoll. Kulħadd ħbieb, u ta’ ħbieb li aħna, inwiegħdu li ngħinu dejjem lil xulxin. Intom it-tfal tgħinu lilna billi tobduna dejjem u f’kollox, l-iżjed billi tistudjaw u ġġibu ruħkom tajjeb. U aħna l-kbar ngħinukom billi ngħallmukom u nieħdu ħsiebkom. Tajjeb hekk?”

“Tajjeb,” reġa’ qal Matthew, u s-Sur Camilleri taptaplu ftit fuq rasu u bagħtu lura f’postu.

Ċinu, il-ġurdien iż-żgħir, donnu wkoll ried jgħid xi ħaġa. ‘Prosit ħej, x’erba’ kelmiet dawk! Tassew jaf xi jgħid dan is-Surmast!’

Is-Surmast sellem lit-tfal u dawn bdew deħlin fil-klassijiet tagħhom. U fi ftit ħin fil-bitħa kien baqa’ biss is-Sur Camilleri waħdu bil-qanpiena f’idu, iħares lejn il-ġnien. Imma kien hemm ukoll Ċinu, li kien ħareġ mit-toqba fil-ħajt biex jissendika ftit. Dan is-Surmast il-ġdid bilkemm kellu aptit jidħol ġewwa fl-uffiċċju. Il-bitħa kbira bid-dawl fietel tax-xemx tal-ħarifa kien fiha mitt gost. Ix-xtieli sbieħ u mimlija weraq u ward li kien hemm imħawla fl-irqajja’ tal-ħamrija kienu wkoll jisirqulek qalbek. Is-Sur Camilleri stħajlu qiegħed fil-ġenna tal-art. Kemm kienet ħelwa din l-iskola ġdida tiegħu! Min jaf kemm jiem ta’ ħidma mimlijin daħk u biki tat-tfal kellu jgħaddi hawnhekk fis-snin li ġejjin! U min jaf kemm tfal irid jara quddiemu sakemm jasallu l-waqt li jirtira mix-xogħol!

Mitluf fi ħsibijiet ta’ din ix-xorta, sa fl-aħħar is-Surmast tħarrek bil-qajla u daħal ferħan ’il ġewwa. Ċinu wkoll fehem li ma kellux għalfejn jibqa’ jitlajja iżjed fit-toqba fejn kien. Lebbet minnufih lil hemm biex ifittex isib lil ommu, it-twajba ġurdiena, ħalli joqgħod jirrakkontalha dak kollu li kien għadu kif ra u sema’, għax din tal-lum kienet għalih xi ħaġa mhux tas-soltu. Għall-inqas hekk kien jaħsibha Ċinu!