Beritta għal Rasek

Hawn min idum sa ma fl-aħħar isib kappell jiġih. Dan nista’ ngħidu jien fiċ-ċert. Kemm kont ili fil-ħanut tal-kpiepel u l-brieret, għamilt xhur sħaħ imdendla bil-kartuna tal-prezz imwaħħla miegħi. Ma nafx x’fettlilha sidt il-ħanut tiftaħ bil-kpiepel. Daqskemm hawn min hu fonqla! Jekk kappell jiġihom tajjeb ikunu jriduh b’falda akbar jew b’kuluri aktar jgħajtu. Jinsew li hawn mhux qegħdin il-Messiku fejn li jintlibsu kpiepel b’falda daqs tinda hija ħaġa normali.

Bħala beritta għandi vantaġġ fuq sħabi l-kpiepel għax, ngħiduha kif inhi, kappell mhux se jintlibes daqsi. Nista’ nintlibes f’kull ħin tal-ġurnata, sajf u xitwa u għal kull okkażjoni. Lili kienu jippruvawni tista’ tgħid kull xorta ta’ nies, kemm dawk żgħar, dawk li mhumiex, kif ukoll dawk li jriduha ta’ żgħażagħ. Min itella’ l-pizz ’il fuq, min idawru la ġenba u min jitfgħu fin-naħa ta’ wara fuq għonqu. Tiskanta kif baqa’ nies ma jafux jilbsu sempliċi beritta. Aħseb u ara kemm jafu l-funzjoni tagħha.

Kienu jiġu bosta nies iduru u jiflu x-xogħol fil-ħanut. L-isem tad-ditta tal-brieret rinomati fis-suq, irrakkmat fil-ġenb, malajr jolqot l-għajn. Arahom iniżżluni minn posti u jippużaw quddiem il-mera biex jippruvawni. Imma ħafna drabi, meta kienu jiġu biex jixtruni u jħarsu lejn dik il-kartuna bil-prezz jixgħel aħdar, kont narahom iqarrsu wiċċhom u jerġgħu jpoġġuni f’posti. B’hekk kont sirt naf li jien m’iniex xi beritta komuni. Ġieli ħsibt li aħjar indum ftit ma ninxtara milli nispiċċa għand xi ħadd li ma japprezzanix u jitfagħni fit-trabijiet jew fiż-żjut.

Ġieli xtaqt niftaħar ma’ sħabi li min kien se jixtrini żgur se jkun tat-tajjeb, u li lest li jħallas tad-ditta. U bilfors ried ikun xi ħadd rasu fuq għonqu biex jixtri beritta bħali. Jien ġejt riklamata li kapaċi nipproteġi r-ras mir-raġġi qawwija tax-xemx li taħkem fuq din il-gżira. Fuq wieħed mill-powsters fil-ħanut hemm ritratt tiegħi fuq ras tfajla tixxemmex fuq jott. Ma jistgħux ma jinnotawx it-tifsila fina u l-ħjatat puliti tiegħi, li jagħmluni ideali biex nintlibes waqt mumenti rilassanti.

Bl-esperjenza li ksibt fil-ħanut tal-kpiepel u l-brieret kont sirt nagħraf anke l-irjus. Kienu jidħlu rjus ta’ kull xorta; dawk tondi, oħrajn tawwalin u oħrajn jixxenglu mal-mużika tal-MP3 bil-wajers imdaħħlin sew fil-widnejn. Mill-ewwel kont ninduna li tkun daħlet xi ras kbira fil-ħanut. Imma l-akbar qatgħa kienet tkun meta dik ir-ras kbira kienet tixħet għajnejha fuqi u kienet tkun trid tippruvani. Jien kont nibda niġġebbed minn kull naħa u kont nitlef il-forma tiegħi. Kienu jkunu jridu jgħaddu bosta ġranet biex nerġa’ niġi f’posti u nerġa’ nieħu t-tinja tal-fabbrika.

Darba għal ftit ma nxtrajtx minn koppja li, mid-dehra, wara li ħadu xemxata ddeċidew li jgħattu rashom. Dawn, wara li kienu qallbu l-ħanut kollu, għoġobthom jien. Damu jippruvawni, daqqa wieħed u daqqa l-oħra. Kont qisni ċippitatu ndur minn fuq ras għal fuq l-oħra.

Fl-aħħar iddeċidew li għandu joħodni r-raġel. Iżda hekk kif marru fuq il-kaxxiera r-raġel induna li nesa l-kartiera. Il-mara tgħidx kemm qaltlu li hu bla ras. Kultant in-nies ma nifhimhomx. Bdiet tgħidlu bla ras meta biex daħħalni f’rasu kelli nitwessa’ xi żewġ qisien oħra?!

Kultant żmien kienet tiġi xi sinjorina li tidħol mistħija f’dal-ħanut u tibda ddurna. Subgħajha ħfief kienu jibdew iteftfu fina, xewqana li jpoġġu dawk l-għotjien ma’ rasha. Wara li tieħu l-kunfidenza kienet tibda tipprova kull xorta ta’ kappell jew beritta. Imbagħad tibda tqabbilhom ma’ ħwejjiġha kollha, min għall-kulur u min għall-istil. Dawn is-sinjorini aktar kienu jiġu biex jimmudellaw quddiem il-mera milli biex jixtru.

Bilfors li kont niġbed xi ftit l-attenzjoni aktar minn sħabi l-brieret, għax ta’ sikwit kienu jgħaddu sa ħdejja l-klijenti. Meta kont insib xi ras petita, b’xagħar lixx u nadif, tgħidx kemm kont niżżerżaq bil-qalb u kont noqgħod f’posti mill-ewwel.

Ġieli sibt xi ras kollha nokkli rotob. Kont nistħajjilni qiegħda fuq it-tajjar. Hawn min ikun irid widnejh ġewwa jew min ikun irid jgħatti għajnejh biex ma jingħarafx. Nista’ naqdi kull funzjoni minn daqshekk. Mhux ta’ b’xejn qatt ma kont xi beritta rħisa.

Kien is-Sibt filgħaxija. L-arloġġ fil-ħanut kien qed jimmarka ħin l-għeluq. Imma fil-pront daħal wieħed b’xagħru mqaxxar, b’erba’ xagħriet qed jispontaw qishom xitla tal-kaktus. Deher deċiż mill-mod kif baqa’ dieħel għal fuqi. Niżżilni minn posti filwaqt li flieni sew f’idejh. Donnu sab li ried fija. Daħħalni f’rasu, ħares fil-mera u tbissem sodisfatt. Mexa lejn il-kaxxiera, ħareġ il-flus, ħallas u reġa’ ħareġ mill-ħanut kuntent li kien akkwista beritta ta’ preġju għal rasu. Mank tani ċans insellem lil sħabi! Qed nibża’ li ma’ dax-xagħar qisu rizza ma tantx se jkun fadalli sura!