Banana Nejja

“Tfal, illum irridkom tpinġu l-frotta favorita tagħkom,” beda jgħid is-Sur Sant lill-klassi li kellu quddiemu. “Tinsewx li d-disinn bil-lapes tridu tagħmluh ċar kemm jista’ jkun u meta tiġu biex tpinġu biż-żebgħa oqogħdu attenti li ma żżellġux jew toħorġu mil-linja,” kompla jispjega l-għalliem. “Ser nagħti l-marki fuq it-tpinġija u l-isbaħ tlieta ser jiġu esebiti fuq il-bord tan-notifiki.”

Is-Sur Sant kien għalliem tal-arti. Kellu diversi klassijiet ta’ etajiet differenti; minn tfal sa anzjani. Però l-aktar klassi għal qalbu kienet dik li kellu quddiemu dak il-ħin; l-iżgħar klassi, mhux mid-daqs imma mill-età. Kienu bniet u subien ta’ madwar tmien snin. Ilkoll kienu jiġu għal-lezzjoni ħerqanin, u kienu joqogħdu b’seba’ għajnejn għal kulma jgħidilhom l-għalliem.

Siegħa u nofs lezzjoni lanqas biss kien jaf kif kienet tgħaddi; u ta’ kull ġimgħa s-Sur Sant kien ikun anzjuż biex jara biex kienu ħerġin l-istudenti. Fosthom kien hemm xi tnejn imqarqċin, imma l-ideat tagħhom u x-xebh tad-disinji li joħolqu kienu xi kultant iġibulu għajnejh wara widnejh.

“Ser, Ser!” instema’ xi ħadd jgħajjat. Is-Sur Sant inħasad. Kien intilef jaħseb u lanqas intebaħ li Pedro kien qam minn postu biex jistaqsih xi ħaġa. Ta daqqa t’għajn ħafifa lejn il-klassi u wara li aċċerta ruħu li kulħadd kien medhi fuq xogħlu, dar lejn Pedro biex jgħinu jifforma għanqud għeneb.

L-għalliem kien xi kultant iqum minn postu u jagħmel passejn madwar il-klassi u fejn ikun meħtieġ jagħti xi parir jew daqqa t’id ħafifa. Tbissem f’qalbu bl-immaġinazzjoni fertili tat-tfal. Kien hemm min pinġa frott komuni bħal tuffieħ, ħawħ u frawli, imma kien hemm min ittanta jesperimenta bil-frott tropikali fosthom il-mango, l-ananas u l-ġewż tal-Indi.

Lura f’postu s-Sur Sant qabad iħejji għall-klassi li kellu wara; grupp żgħir ta’ adolexxenti li aktar kien ikun moħħhom biex ipaċpċu u jidħku milli x’kien ikun qed jgħid hu. Imma wara xi żewġ għajtiet, malajr jisserjaw u jintefgħu b’ruħhom u b’ġisimhom fuq xogħolhom. Hekk kif l-istudenti daħlu fil-klassi u ssetiljaw, is-Sur Sant qalilhom biex ukoll ipinġu l-frotta favorita tagħhom. Wara ftit, minn taħt il-għajn, l-għalliem innota li Adel kienet qamet minn postha u resqet lejn is-sink tlaħlaħ il-pniezel.

“Possibbli, diġà lesta?” ħaseb bejnu u bejn ruħu s-Sur Sant.

Adel ma tantx kellha xi tpinġi dakinhar, għax il-frotta favorita tagħha hi l-banana u lestietha f’kemm trodd salib. Kemm pinġiet speċi ta’ nofs qamar bil-lapes u wara żebgħetu bl-isfar.

Kellha f’moħħha li la tinxef ftit iż-żebgħa tagħmel xi linji għat-tul biex tagħti aktar xeħta naturali lill-banana. Imma lanqas laħqet marret lura f’postha li Adel ma ħaditx qatgħa li ġagħlitha twerżaq twerżiqa li tarrxet lil kull min kien hemm fil-klassi.

L-għalliem qam sparat minn fejn kien u ġera għal ħdejn it-tifla. L-ewwel ħsieb li ġieh kien li t-tifla setgħet lemħet xi insett u beżgħet minnu. Ma seta’ jara l-ebda insett u lanqas x’seta’ ġiegħel lil Adel twerżaq. L-imsejken għalliem ipprova jifhem x’seta’ ġara, imma t-tifla kienet qed tibki u tolfoq kemm tiflaħ.

Bejn tilfiqa u oħra Adel instemgħet tgħid, “Jiena ma nħobbhiex il-banana nejja. Lili safra togħġobni.”

L-għalliem aktar tħawwad xħin ħares lejn it-tpinġija tat-tifla u lemaħ banana ħadra. “Imma din mhux hi pinġietha hekk, mela għaliex issa mhix togħġobha?” ħaseb ikkonfondut.

It-tfal issa kienu lkoll qamu minn posthom u daru qaqoċċa mal-mejda ta’ Adel; min jgħid ħaġa u min jgħid oħra. L-għalliem ordnalhom imorru lura posthom u jkomplu xogħolhom. Adel, li kienet naqset mill-biki, spjegatlu li hi safra kienet pinġietha l-banana, imma sakemm marret taħsel il-pinzell u jdejha, il-banana kienet saritilha nejja!

Is-Sur Sant ħabat se jinfixel, quddiem għajnejh seta’ jara li l-banana kienet tassew ħadra, imma mill-banda l-oħra kien ċert li Adel iż-żebgħa safra kienet użat għax fuq il-mejda u mal-fardal li kienet liebsa kien hemm tiċpis isfar.

“Din żgur xi ċajta ta’ xi ħadd mit-tfal!” ħaseb bejnu u bejn ruħu l-għalliem hekk kif ta daqqa t’għajn lejn it-tpinġijiet tat-tfal fil-qrib.

Il-mejda ta’ wara Adel kienet vojta. Fuq ix-xellug tal-mejda ta’ Adel kien hemm Tom rasu mgħaddsa fil-karta, li ddeċieda li jpinġi xi għanbaqar ta’ lewn kaħlani. Fir-ringiela ta’ quddiem kien hemm Melissa bilqiegħda medhija tpinġi żewġ frawliet sbieħ, kbar u ħomor. “Mela din mhux lanqas,” kompla jaħseb l-għalliem. Ħarset is-Sur Sant marret fuq Samwel, li kien qed ipinġi l-kiwi. Kien kollu minnu li hu kien l-uniku tifel li kien qed juża ż-żebgħa ħadra, imma biex dan seta’ qam minn postu u mess it-tpinġija ta’ Adel kien impossibbli. Il-mejda ta’ Samwel kienet eżatt quddiem il-mejda tal-għalliem, u li kieku dan qam minn postu żgur li kien jilmħu. Fuq il-lemin ta’ Samwel kien hemm Emma, li kienet għadha kemm lestiet larinġa tonda tonda ta’ lewn oranġjo. L-għalliem ħaseb li ż-żewġt ibniet żgur li ma kinux messew it-tpinġija ta’ Adel.

“Min mess it-tpinġija ta’ Adel?” staqsa kemxejn ikkonfondut l-għalliem, hu u jħokk rasu.

Ħadd mit-tfal ma tkellem, imma Adel kienet taf min kien messilha t-tpinġija u żebgħalha l-banana ħadra! Mhux għax kienet ratu, imma għax ħaddmet moħħha.

It-tifla xxuttat għajnejha mid-dmugħ u b’leħen imnikket daret lejn l-għalliem u qaltlu, “Ser, Tom kien.”

L-għalliem kien ser iċanfarha talli kienet qed twaħħal fit-tifel, meta fil-pront ta daqqa fuq moħħu, resaq lejn Tom u ċanfru bil-kbir.

Adel kienet irrealizzat li jekk tpinġi bil-blu fuq l-isfar dan isir aħdar, u Tom kien l-uniku tifel li kien qed juża ż-żebgħa blu. Sakemm hi qamet minn postha, Tom kien dar lura u bil-pinzell tiegħu pinġa fuq il-banana safra.