Skwadra Sigrieta 6: Barxa fil-karozza tat-Tabib Zammit

Meta t-Tabib Bertu Zammit iddeċieda li jiftaħ klinika f’Ħal Dratta, kien ħa din id-deċiżjoni wara insistenza ta’ zijuh, it-Tabib Borg, li kien ilu jikkura ħafna pazjenti f’dan ir-raħal. It-Tabib Borg kien iz-ziju tar-rispett tat-Tabib Zammit u dan tal-aħħar kien fetaħ il-klinika f’Ħal Dratta fuq parir ta’ zijuh.

Bħal zijuh, it-Tabib Zammit kien raġel kariżmatiku, jiċċajta mal-pazjenti u f’emerġenza kien imur fejn mitlub. Għalhekk kien ħadha bi kbira ħafna meta darba waħda sab barxa twila fil-karozza lussuża li kellu.

Mal-ewwel daqqa t’għajn il-barxa dehret li donnha saret apposta b’xi ċavetta jew biċċa metall. Dan wassal lit-Tabib biex jagħmel rapport lill-Pulizija.

‘Dan ir-raħal qed jinqeleb ta’ taħt fuq,’ qalet Carmen lil żewġha Toni meta kmieni filgħodu kienu qed jieħdu t-te wara li ġiet mill-knisja.

‘Xi nqala’ dalgħodu? Invadew ir-raħal?’ staqsa Toni, mhux jieħu lil martu bis-serjetà.

‘Wara grazzja li ġie tabib ieħor fir-raħal, issa qed jaraw kif jagħmlu biex igerrxuh,’ qalet Carmen.

‘Mhux aħjar tgħidli x’qed jinkwetak biex forsi nifhem xi ħaġa,’ wieġeb Toni.

Carmen bdiet tirrakkontalu dwar dak li kienet għadha kif semgħet fuq iz-zuntier tal-knisja, jiġifieri l-att vandalu li kien sar fil-karozza tat-tabib il-ġdid.

Il-mara qalet lil żewġha li l-barxa fil-karozza kienet waħda twila kważi t-tul kollu tal-karozza. Issemma wkoll li t-tabib stqarr illi jekk jgħaddi minn episodju ieħor ikrah bħal dan kien se jagħlaq il-klinika u jmur f’post ieħor.

‘Ħażin, għax it-Tabib Borg ilu jgħid li kien se jirtira,’ qal Toni, juri wkoll il-preokkupazzjoni tiegħu dwar il-każ.

Dakinhar filgħodu Toni mar jagħti titwila l-karozza li saritilha l-ħsara u sab li dak li qaltlu martu kien korrett. Imbagħad baqa’ sejjer ħdejn l-għassa tal-Pulizija biex jara min kien hemm għassa dakinhar. Is-surġent li kien hemm qabel kien ġie trasferit f’post ieħor u Ħal Dratta kien għadu mingħajr surġent. Fl-għassa, Toni kien jitkellem bil-libertà kollha mal-pulizija tal-lokal u kienu jistmawh bħala wieħed li kien għadu fil-Korp tal-Pulizija.

‘Għadni kemm rajt il-ħsara li saret fil-karozza tat-Tabib,’ qal Toni lill-pulizija li nzertaw għassa dakinhar.

‘Kellimna ħafna nies joqogħdu fl-istess triq u ħadd minnhom ma qal li ra lil xi ħadd jobrox il-karozza,’ qal kuntistabbli minnhom.

‘Min ikun irid iwettaq vandaliżmu ta’ din ix-xorta joqgħod attent li ħadd ma jkun jarah, u ħafna drabi jagħżel il-ħin ta’ matul il-lejl,’ wieġeb Toni.

‘Imma f’dan il-każ mhux hekk sar għax skont it-tabib il-barxa saret nhar is-Sibt bejn is-2:00 p.m. u l-4:00 p.m.,’ kien pront iwieġeb il-kuntistabbli.

‘Ħadd mill-ġirien ma ra jew sema’ xejn?’ staqsa Toni.

‘U int ma tafx aktar minni li kultant in-nies jagħmlu bħal dawk it-tliet xadini – ma jaraw xejn, ma jisimgħu xejn, u ma jgħidu xejn!’ qal il-kuntistabbli.

Fl-ewwel laqgħa li kellu man-neputijiet, in-nannu Toni qalilhom li dan il-każ kien jinteressa lin-nies kollha tar-raħal għax kien hemm il-biża’ li t-tabib jitlaq u r-raħal jisfa mingħajr tabib. Toni qal ukoll li kienet ħasra jekk kemm-il darba n-nies kienu jafu xi ħaġa u għażlu li jibqgħu b’ħalqhom magħluq.

‘Taħseb li dan l-att vandalu sar minn xi wieħed mill-ġirien?’ staqsa John.

‘Mhux qed ngħid hekk, imma wisq nemmen li kien hemm min ra xi ħaġa u qed jibża’ jitkellem,’ wieġeb in-nannu.

Imbagħad kompliet id-diskussjoni dwar x’seta’ wassal għal dan l-att vandalu. Saru wkoll ħafna mistoqsijiet li Toni ma kellux tweġiba għalihom. Waħda minnhom kienet jekk it-tabib kellux xi kwistjoni ma’ xi ħadd li ma kienx jgħix f’Ħal Dratta.

Meta kien sar il-ħin biex tnejn mit-tfal jirritornaw lejn id-dar, in-nannu fakkarhom f’dak li kienu ftiehmu, jiġifieri li joqogħdu attenti għal xi diskors li jista’ jingħad dwar il-każ, kemm fl-iskola kif ukoll f’postijiet oħra. F’Ħal Dratta lil Toni kien jafu kulħadd, għalhekk ftit kien hemm ċans li min kien qed jostor xi informazzjoni kien se jgħid xi ħaġa quddiemu.

Sadattant, Toni sab skuża biex imur ikellem it-Tabib Borg, iz-ziju tat-Tabib Zammit. Toni kien mar jiċċekkja l-pressjoni, kif kien soltu jagħmel għand dan it-tabib. Kif mistenni, waqt din il-laqgħa qasira Toni semma l-każ tal-brix tal-karozza u t-Tabib Borg wera l-preokkupazzjoni tiegħu.

Għad-ditektivs tagħna dan il-każ kien differenti mill-oħrajn li kellhom qabel, u tħassbu meta raw in-nannu tant inkwetat dwaru. Għalhekk it-tlieta li huma tkellmu ma’ diversi tfal li kienu joqogħdu fl-istess triq tat-Tabib Zammit biex jaraw isibux informazzjoni relevanti mal-każ.

Wara diversi tentattivi, kienet Doris li akkwistat informazzjoni li eventwalment komplew jibnu fuqha. Doris qalet li skont Anna, bint Mananni, dik li kellha ħanut tal-merċa ftit bogħod mill-klinika tat-Tabib, ma kien hemm ebda att vandalu u l-ħsara fil-karozza tat-tabib ma saritx apposta. Minkejja dan id-diskors, skont Doris, Anna dehret beżgħana li tkompli titkellem dwar il-każ.

‘Mhu qed nifhem xejn,’ qal Frans meta sema’ lil oħtu tgħid dak li kienet semgħet.

L-istess opinjoni kellu John, madankollu n-nannu qal li din kienet informazzjoni tajba u għalhekk kien meħtieġ li jkunu jafu aktar dwarha. Hawn in-nannu talab lil Doris biex tkompli titkellem ma’ bint Mananni.

‘Fil-ħwienet tal-merċa jsir ħafna diskors,’ qal in-nannu, jitkellem b’ton ta’ wieħed li kellu esperjenza f’dan il-qasam, minkejja li ftit li xejn kien jidħol f’dawn il-ħwienet.

Anna u Doris ma kinux jiltaqgħu biss fl-iskola, imma kienu jattendu d-duttrina fiċ-ċentru parrokkjali għax kienu se jagħmlu l-Griżma tal-Isqof flimkien.

Għalhekk Doris rat kif għamlet biex toħdilha minn rasha għax kienet qalet dak id-diskors. Għalkemm mill-ewwel kien jidher ċar li Anna kienet imwissija minn ommha biex ma titkellem xejn, Doris kompliet tidħlilha fin fin, u fl-aħħar Anna żvelat li xi ħadd kien ħakk bir-rota mal-karozza tat-Tabib għax kien għoddu tilef il-bilanċ u kien se jaqa’ minn fuq ir-rota.

‘Mhux li kien hekk!’ qal in-nannu meta Doris tat din l-informazzjoni waqt laqgħa oħra tad-ditektivs.

‘Imma f’Ħal Dratta hawn diversi nies li jużaw ir-rota,’ qal John.

Għalkemm il-każ ġibed fit-tul, it-Tabib xorta baqa’ ddispjaċut b’dak li għamlulu għax kien għadu jemmen li l-ħsara fil-karozza kienet saret apposta. Dan wassal biex it-Tabib kien naqqas xi ħinijiet tal-visti tal-pazjenti, minkejja li dawn kienu baqgħu jmorru u żdiedu fin-numru. Id-ditektivs ħabrieka tagħna kienu bdew jaqtgħu qalbhom li jsolvu dan il-misteru, minkejja l-isforzi kbar li għamlu. Imma meta saru jafu b’inċident ieħor fir-raħal, sabu li seta’ kien hemm konnessjoni mal-barxa tal-karozza.

L-ewwel tagħrif dwar din l-istorja wasal minn Carmen, meta qalet lil żewġha li Mananni kienet għamlet xenata kbira fil-pjazza tar-raħal. Dan id-diskors sar waqt li n-neputijiet kienu miġbura madwar il-mejda, lesti biex jieklu dik il-pizza meraviljuża li kienet tagħmel in-nanna.

‘Mela x’għamlet?’ staqsa Toni.

‘Tat xebgħa kbira lil wieħed minn uliedha għax baqa’ dieħel bir-rota u kisser xi qsari bl-ortensji, li Duminku kien joħroġ quddiem il-ħanut,’ wieġbet Carmen.

Mananni kienet armla u kellha sitt itfal. Anthony, it-tifel il-kbir, kien tifel bil-għaqal u minkejja li kellu biss 15-il sena, kien jipprova jaqla’ xi ħaġa biex jgħin lil ommu. Imma Victor, ta’ warajh, kien naqra mqareb u aktar frustrat għax kien tilef lil missieru.

Mananni kienet tmur tnaddaf għand in-nies biex tgħajjex lil uliedha u minkejja li kienet tieħu xi benefiċċji soċjali, ma kellhiex biżżejjed biex titma’ u tlibbes lil dawk it-tfal kollha. Għalhekk kienet ħaditha bi kbira meta Duminku talabha għoxrin ewro għall-ħsara li saret.

‘Il-qsari tkissru apposta?’ staqsa John meta kien qed jisma’ lil nanntu tirrakkonta.

‘Baqa’ dieħel fil-qsari bil-biċċa rota mingħajr brejkijiet li għandu t-tifel,’ wieġbet in-nanna.

Sakemm intqal dan id-diskors min-nanna ħadd mit-tfal ma induna bil-konnessjoni mal-każ tat-Tabib, imma meta ssemma x’ġara wara, bdew iħarsu lejn xulxin. Kompla jingħad li Mananni bdiet tgħid lil binha: “Sa mnalla ħlisnieha mill-oħra, erġajt għamiltha! La naslu d-dar inqiegħdek għax dik ir-rota nitfagħha fil-bir.”

Dakinhar, waqt li Doris kienet fiċ-Ċentru Parrokkjali, kienet marret tfittex lil Anna u pronta qaltilha li Victor kien reġa’ għamilha.

‘Għalkemm m’għedtlix li kien Victor li ħakk mal-karozza tat-Tabib, xorta waħda sirt naf,’ qalet Doris lil Anna.

‘Ommi qalet li kien inċident u għax konxja li omm Victor m’għandhiex mnejn tħallas, riedet tibqa’ b’fommha magħluq,’ qalet Anna.

B’din l-istqarrija, Doris reġgħet lura ferħana lejn id-dar u qalet b’kollox lil ħuha. Ftit wara, in-nannu Toni rċieva telefonata mingħand in-neputijiet u qalulu b’dak li qalet Anna. Imbagħad l-għada filgħodu, Toni reġa’ mar għand it-Tabib Borg u qallu b’kollox. Sadattant sar magħruf li t-Tabib Zammit kien irranġa l-karozza, bl-ispejjeż jitħallsu mill-kumpanija tal-assigurazzjoni.

‘Nixtieqek tgħid b’kollox lit-Tabib Borg, imma serraħli rasi li lil dik l-armla ma ddaħħluhiex fi spejjeż,’ qal Toni lit-tabib.

‘Serraħ rasek għax in-neputi ma kienx inkwetat għal xi flus li seta’ jħallas, imma ssuspetta li xi ħadd ried jagħmillu vendikazzjoni,’ wieġeb it-Tabib Borg.

Il-każ tal-barxa fil-karozza spiċċa għas-sodisfazzjon ta’ kulħadd, u lil Mannani ħadd ma talabha xejn tal-ispejjeż. Madankollu, il-mara kienet żammet il-wegħda li għamlet u ħelset mir-rota li kienet se ddaħħalhom f’biċċa inkwiet bla bżonn.