Skwadra Sigrieta 5: Serq mill-iskola

Matul il-vaganzi tas-sajf id-ditektivs tagħna gawdew il-baħar u kellhom aktar ħin għal dak li sar id-delizzju favorit tagħhom, jiġifieri li jgħinu lill-Pulizija ssolvi xi każ mill-ħafna li jkunu rrappurtati.

Meta wasal nofs Settembru, in-nannu Toni beda jħejji lin-neputijiet għal sena skolastika oħra u s-soltu twissija, dik li x-xogħol ta’ ditektivs iħalluh biss għal nhar ta’ Sibt, ma naqsitx.

‘Qed inwissikom…’ beda biex qal in-nannu.

‘Ara ma nkunx naf li tintilfu fuq dawn l-affarijiet waqt il-ġranet l-oħra,’ komplew qalu t-tlett itfal b’vuċi waħda u daħqana.

‘Kumpilazzjoni xi tfisser, nannu Ton?’ staqsiet Doris meta kienet qed terfa’ ‘Il-Ktieb tal-Każijiet’, kif bdew jirreferu għall-iscrap book.

‘Kumpilazzjoni hija l-ġbir ta’ xhieda ġuramentata li ssir kollha bil-miktub fil-Qorti,’ wieġeb in-nannu. Huwa kompla jfissrilha li l-kumpilazzjoni ssir f’reati serji biss.

Hekk kif resqu lejn tmiem il-vaganzi, id-ditektivs tagħna kienu ħerqana jerġgħu lura l-iskola biex ikomplu bl-istudji tagħhom. Ġara wkoll li fl-aħħar ġranet tal-vaganzi t-tfal ma kinux involuti f’din il-ħidma avventuruża, u fuq kollox sigrieta.

Imma ftit ġranet wara li spiċċaw il-vaganzi, feġġ każ ġdid. Għat-tieni darba, saret serqa mill-iskola fejn kien jattendi Frans. Hawn irid jingħad li, madwar tliet ġimgħat qabel bdew il-vaganzi tas-sajf, kienet saret l-ewwel serqa mill-istess skola u l-Pulizija kienet għadha sejra bl-istħarriġ.

Fit-tieni serqa kienu nsterqu żewġ laptops; wieħed mill-uffiċċju tas-surmast u l-ieħor mill-uffiċċju tal-accountant tal-iskola. Mill-uffiċċju ta’ dan tal-aħħar kienu nsterqu xi flus miġbura għall-Missjoni u xi tagħmir tal-kompjuter.

Skont it-tagħrif li ġabar Frans, il-Pulizija ma sabet ebda bieb jew tieqa żgassata u ma kien hemm l-ebda dubju li l-bieb prinċipali kien imsakkar tajjeb wara li kulħadd ħareġ mill-iskola. Aktar minn hekk, wara l-ewwel serqa minn din l-iskola, il-bieb prinċipali kien qed jissakkar b’katnazz minn barra. Dan ifisser li ħadd ma seta’ ħareġ minn dan il-bieb wara li l-iskola ngħalqet.

‘Setgħu daħlu minn fuq il-bejt?’ staqsa John.

‘Smajthom jgħidu li l-bieb tal-bejt jinżamm dejjem imsakkar b’katnazz minn ġewwa,’ wieġeb Frans.

‘Dan każ naqra diffiċli għalina,’ qalet Doris.

‘Aħna nitkellmu qegħdin wara kollox,’ wieġeb ħuha Frans.

‘Inti ara x’tagħrif ieħor tista’ tiġbor dwar dan il-każ u jekk nistgħu, nagħtu palata lill-Pulizija,’ qal in-nannu.

Ġimgħa wara, id-diskussjoni dwar dan il-każ kompliet. Sadanittant Frans kien ġibed xi ritratti tal-bieb ta’ barra tal-iskola, kif kien qallu biex jagħmel in-nannu Toni. Imma Frans għamel aktar minn dak li qallu n-nannu; infatti kien ħa ritratti tal-kanċell fil-bitħa tal-iskola. Il-kanċell kien jinżamm dejjem magħluq u msakkar permezz ta’ katina u katnazz.

Frans qal ukoll li l-Pulizija kienet issuspettat fil-purtinar, imma s-surmast qal li kellu fiduċja kbira f’dan ir-raġel u li kien se jagħmel minn kollox biex jipproteġih. Dan il-purtinar kien daħal jaħdem f’din l-iskola meta missieru, li wkoll kellu l-istess xogħol, kien irtira bil-pensjoni.

‘It-tagħrif li għandna dwar il-każ mhux biżżejjed biex wieħed ikompli jinvestiga. Għandna bżonn ħafna aktar tagħrif,’ qal in-nannu, ħosbien li din id-darba ma kienx se jirnexxilhom isolvu l-każ.

‘Ma naqtgħux qalbna, nann,’ qalet Doris.

‘Nipprova nkellem lill-purtinar,’ qal Frans.

‘Ipprova kellem ukoll xi nies li joqogħdu fl-inħawi tal-iskola,’ qal in-nannu.

Is-Sibt ta’ wara, Frans kompla jagħti aktar dettalji dwar il-każ, fosthom li fil-lejl li saret is-serqa xi ħadd kien ra dawl baxx fil-bitħa tal-iskola. Informazzjoni oħra kienet li dakinhar tas-serqa, ftit qabel ma ħarġu l-istudenti mill-iskola, ċertu Rafel, dak li kien inkarigat mit-tbattil tal-iskipps tal-iskola, kien mar b’xi kontijiet u tahom lill-purtinar.

Skont dan tal-aħħar, Rafel għeb immedjatament wara li ta l-kontijiet lill-purtinar.

‘X’jiġifieri għeb?’ staqsa n-nannu.

‘Il-purtinar qal li s-soltu Rafel kien jieħu l-kontijiet fl-uffiċċju tal-accountant, imma dakinhar ħalla l-kont miegħu (mal-purtinar) u insista biex joħodhulu dak il-ħin stess, filwaqt li baqa’ fejn it-taraġ,’ wieġeb Frans.

Frans kompla qal li wara li ħareġ mill-uffiċċju tal-accountant kien fittex lil Rafel għax l-accountant ried ikellmu, imma ma sabux. Kien ta’ xejn li l-purtinar ħareġ barra jfittxu, għax Rafel għeb fi ftit sekondi.

‘Qed nara li issa għandna xi trufijiet interessanti dwar dan il-każ,’ qal John.

‘X’għandek f’rasek?’ staqsa n-nannu.

‘Seta’ Rafel staħba fl-iskola, u wara li ħareġ kulħadd wettaq is-serqa?’ staqsa John.

‘U kif seta’ joħroġ mill-bieb ta’ barra jekk kien hemm il-katnazz minn barra?’ kompliet Doris.

‘Jekk jirnexxilna nistabbilixxu dan inkunu qrib li jissolva dal-każ,’ qal Frans.

In-nannu kien attent jisma’ u jitpaxxa bl-intelliġenza tad-ditektivs tiegħu, u qal li kien wasal iż-żmien li hu wkoll iżur din l-iskola. Toni qal li kien se jsib skuża biex jagħmel dan għax l-iskola ma kinitx f’Ħal Dratta, imma f’lokalità oħra.

Fil-ġurnata tat-Tnejn, Toni xtara bezzun imħawwar u telaq bih fl-iskola li kien jattendi Frans. Kif ċempel il-qanpiena tal-iskola nstemgħet vuċi mill-purtinar u ġie mistoqsi xi jrid. Hawn Toni ivvinta skuża u qal li neputih kien nesa l-kolazzjon u għalhekk kien ġablu xi ħaġa tal-ikel. Sadattant Toni ra kif kien jissakkar il-bieb ta’ barra, imbagħad wara li ħalla l-bezzun mal-purtinar, Toni baqa’ sejjer in-naħa ta’ wara tal-iskola, jiġifieri fejn kien hemm ir-rixtellu li minnu tidħol fil-bitħa l-kbira tal-post. Kien hawn li Toni ntebaħ kemm kellu raġun John meta qal li jekk isir magħruf mnejn il-ħalliel jew ħallelin ħarġu, ikun kważi ssolva l-każ.

Ir-rixtellu kien imsakkar b’katina u katnazz. Imma l-katnazz seta’ jinfetaħ kemm minn barra kif ukoll minn ġewwa għax il-katina kienet twila u setgħet iddur.

Imma kien għad fadal il-mistoqsija importanti li kellha bżonn tkun imwieġba, jiġifieri min kellu ċ-ċavetta tal-katnazz mar-rixtellu. It-tweġiba taha Frans.

‘Rafel jiġi jbattal l-iskipps darbtejn jew tliet darbiet fil-ġimgħa u kien idaħħal it-trakk fil-bitħa,’ qal Frans.

‘Jiġifieri għandu ċ-ċavetta tal-katnazz,’ qal John.

‘Hekk hu,’ wieġeb Frans.

‘Nistgħu nikkonfermaw dan?’ staqsa n-nannu, filwaqt li staqsa jekk kienx possibbli jsiru magħrufa l-ġranet u l-ħin li jitbattlu l-iskipps.

Din l-informazzjoni waslet mingħand wieħed mill-ġirien li qal li kemm-il darba ra lil Rafel jiftaħ u jagħlaq il-kanċell tal-bitħa.

‘Ġewwa x-xilep!’ qal in-nannu.

‘X’jiġifieri, nann?’ staqsiet Doris.

‘Jiġifieri l-ġurdien daħal fin-nassa,’ wieġeb in-nannu, konvint li Rafel kien il-ħalliel.

‘Issa x’fadal nagħmlu?’ staqsa Frans.

‘Nieqfu hawn għax minn hawn ’il quddiem inħallu l-Pulizija tagħmel xogħolha u llum stess inkellem lis-Surġent Fred,’ qal in-nannu.

Is-Surġent Fred ma kien jaf xejn dwar is-serq mill-iskola għax il-każ kien qed jiġi investigat minn ħaddieħor. Madankollu huwa wiegħed lil Toni li kien se jgħaddi t-tagħrif kollu lill-persuna kkonċernata, u hekk sar.

Rafel kien interrogat mill-Pulizija u wara li nġieb mandat, saret tfittxija f’żewġ garaxxijiet li kellu.

F’wieħed minnhom instabu ż-żewġ laptops misruqa u eventwalment Rafel ammetta s-serqa. Fl-istqarrija tiegħu Rafel qal li wara li kien ta l-kontijiet lill-purtinar, kien tela’ jiġri fis-sular ta’ fuq tal-iskola u daħal f’wieħed mit-tojlits. Huwa qal li baqa’ hemm għal aktar minn siegħa, imbagħad wettaq is-serqa. Rafel qal li kien daħal fiż-żewġ uffiċini għax ġab iċ-ċwievet mill-kamra tal-purtinar. Din il-kamra ma kinitx imsakkra u Rafel mhux biss kien jaf li l-purtinar kellu ċ-ċwievet ta’ kullimkien, imma kien jaf fejn jinżammu.

Wara li seraq dak li kellu jisraq, Rafel baqa’ jistenna sad-dlam, imbagħad ħareġ mill-kanċell tal-bitħa. Dan naturalment seta’ jsir għax Rafel kellu ċ-ċavetta ta’ dan il-kanċell.

‘Imma d-dnub ma jorqodx!’ qal in-nannu waqt li għadda dan it-tagħrif lid-ditektivs bravi li kellu. In-nannu qalilhom ukoll li Rafel kien qed jiġi investigat dwar l-ewwel serqa tal-iskola għax il-Pulizija kienet sabet evidenza biex takkużah ukoll b’dan ir-reat.