Skwadra Sigrieta 13: L-Arrest ta’ Pawlu

Ħafna drabi Toni kien jieħu l-ewwel aħbarijiet dwar Ħal Dratta mingħand martu Carmen, u bir-raġun. Wara l-quddiesa tas-sebgħa ta’ filgħodu, Carmen kienet tmur tixtri mill-ħanut tal-merċa ta’ Ġovanna, fejn ħafna drabi kienu jinġabru diversi korrispondenti tal-aġenziji tal-aħbarijiet!

Hekk ġara f’għodwa minnhom meta Carmen reġgħet lura d-dar nifisha maqtugħ u madwar nofs siegħa tard iktar mis-soltu.

‘Xi nqala’ dalgħodu?’ staqsa Toni ftit imħasseb.

‘Kelli mmur nixtri f’tarf ir-raħal għax ilbieraħ serqu lil Ġovanna u llum ma fetħitx,’ wieġbet Carmen.

‘Lil din il-povra mara x’setgħu ħadulha?’ qal Toni.

‘Ħamsin ewro kulma ħadulha, imma qed jgħidu li mal-ħamsa ta’ filgħaxija se tibda tagħlaq il-ħanut,’ qalet Carmen.

Dakinhar filgħodu Toni kien sar jaf xi ftit mill-fatti u l-għajdut dwar din is-serqa, u sar jaf ukoll li l-Pulizija kienet arrestat żagħżugħ għax Ġovanna qalet li għarfitu.

Skont Ġovanna, għall-ħabta tas-sitta u nofs ta’ filgħaxija, Pawlu daħal jixtri, kif kien soltu jagħmel. Imbagħad ftit wara reġa’ daħal fil-ħanut b’maktur marbut taħt għajnejh u talabha l-flus tal-kexxun. Il-mara qalet ukoll li barra l-ħanut kien hemm xi ħadd ieħor li nstema’ jgħid: ‘Ħaffef, Pawl, għax resqin in-nies!’

Pawlu kien żagħżugħ sportiv u wara li ngħaqad mat-tim tal-futbol tar-raħal kien sar l-idolu tat-tim u tar-raħal. Għalhekk l-arrest tiegħu mhux biss kien ittieħed b’sorpriża kbira, imma ħafna kienu qed jgħidu li sar xi żball. Madankollu, Ġovanna sostniet mal-Pulizija li ma kienet għamlet l-ebda żball u kompliet qalet li f’ħin minnhom il-maktur li kellu ma’ wiċċu l-ħalliel kien waqagħlu. Il-mara semmiet ukoll li l-ħalliel kellu mustaċċi rqaq, nuċċali tax-xemx u kien liebes ġins ikħal, flokk abjad, u beritta bajda; l-istess ħwejjeġ li kienet rat lil Pawlu bihom ftit qabel.

Fl-ewwel laqgħa li kellu man-neputijiet, jumejn wara s-serqa, ma setax jonqos li dan il-każ jissemma mid-ditektivs ħabrieka tagħna. In-nannu ma kienx jaf min kien Pawlu għax ftit li xejn kien jinteressah il-logħob tal-ballun. Imma John kien jafu sewwa lil Pawlu.

Sadattant Pawlu kien ġie arrestat u minkejja li sostna l-innoċenza tiegħu, l-għada tal-arrest tressaq quddiem il-Qorti u ngħata l-libertà proviżorja. Madankollu, Pawlu kien tilef iċ-ċans li jilgħab fil-logħba importanti li t-tim ta’ Ħal Dratta kellu mat-tim ta’ Ħal Imkien. Il-logħba kienet spiċċat fi dro, imma dakinhar it-tim ta’ Ħal Dratta kellu bżonn ta’ rebħa biex jaċċerta ruħu mill-promozzjoni. Ix-xhud ewlenija f’dan il-każ kienet Ġovanna, li fil-Qorti rrepetiet l-istqarrija li kienet għamlet mal-Pulizija.

‘Issa x’jiġri?’ staqsa John meta kien qed jitkellem man-nannu Toni.

‘Minħabba l-ħafna xogħol tal-Qorti, il-każ jieħu x-xhur u saħansitra s-snin sakemm ikun hemm deċiżjoni tal-Qorti,’ wieġeb Toni.

‘Nistgħu nagħmlu xi ħaġa biex ngħinu lil Pawlu?’ staqsa John.

‘Aħna dejjem ħdimna biex ngħinu l-ġustizzja,’ wieġeb in-nannu.

‘U din id-darba naħdmu biex issir ġustizzja,’ wieġeb John, b’konvinzjoni li l-akkuża kontra Pawlu ma kinitx korretta.

John kompla qal lil nannuh li ħafna nies fir-raħal kienu tal-fehma li Ġovanna żbaljat meta stqarret li kienet ċerta li Pawlu kien seraqha. John qal li kienu bosta żgħażagħ li jilbsu ġins u flokk abjad.

‘U inti taħseb li l-avukat ta’ Pawlu mhux konxju ta’ dak li qed issemmi u li dan kollu se jissemma fid-difiża?’ staqsa n-nannu.

Fil-ħin li sar dan id-diskors, Frans u Doris ma kinux preżenti u fl-ewwel laqgħa li kellu magħhom, John qalilhom biex jiġbru iktar informazzjoni dwar il-każ.

Hawn Frans irrakkonta dak li semgħet ommu, jiġifieri li Ġovanna kellha madwar mija u ħamsin ewro fil-kexxun u kienet stramba li l-ħalliel aċċetta ħamsin ewro u ħarab.

‘Din l-aħbar ma jidhirx li ssemmiet fil-ġurnali,’ qalet Doris, l-arkivista tal-iskwadra.

Kien f’dan il-ħin li ngħaqad magħhom in-nannu u meta komplew jgħidulu dwar l-istramberiji f’dan il-każ, wegħedhom li kien se jingħaqad magħhom.

Ġimgħa wara, Toni kien sar jaf mingħand in-neputijiet dwar l-inkwiet li kien hemm fil-familja ta’ Pawlu għall-akkuża li għamlet Ġovanna. Sar magħruf ukoll li Karmni, oħt Ġovanna, li toqgħod ftit bogħod mill-ħanut fejn saret is-serqa, kellha verżjoni ftit differenti minn dik ta’ oħtha.

Doris qalet li ommha kienet semgħet li Karmni kienet rat żewġ żgħażagħ fil-viċinanzi tal-ħanut u donnhom kienu għassa għal xi ħadd. Imma meta tkellmet dwar dan ma’ Ġovanna, din qaltilha li ladarba ma kinitx tkellmet qabel, issa jkun aħjar li ma titkellem xejn. Hawn it-tfal staqsew lin-nannu jekk kienx lest ikellem lil Karmni dwar dak li ntqal, imma n-nannu qal li kien jippreferi jkellem lil żewġha Patist.

Toni u Patist kienu għamlu xi żmien membri fil-kumitat tal-Azzjoni Kattolika tar-raħal, għalhekk Toni kien jaf li Patist kien bniedem tar-ruħ. F’din il-laqgħa, Toni qal lil Patist li jkun aħjar li tingħata l-evidenza kollha dwar il-każ u Patist fehem x’ried ifisser Toni.

Sadattant id-ditektivs komplew jgħarblu dak li kien irrappurtat fil-ġurnali u nstabet stramberija oħra meta ssemma li fil-waqt li l-ħalliel daħal fil-ħanut, sieħbu baqa’ fejn il-bieb u f’ħin minnhom instema’ jgħid: ‘Ħaffef, Pawl, għax resqin in-nies!’

‘Ma nafx liema baħnan jasal biex isemmi l-isem ta’ min qed jikkommetti serqa,’ qal Frans.

‘Wisq nemmen li l-ħalliel ma kellux f’moħħu li jisraq il-flus, imma jisfratta l-partita futbol li saret mat-tim ta’ Ħal Imkien,’ qal John.

Meta ntqal dan l-aħħar diskors, Toni kien għadu jingħaqad man-neputijiet u immedjatament talab lil John jirrepeti dak li kien għadu kif qal.

‘Dan il-motiv għadu ħadd ma tkellem dwaru,’ qal Toni. In-nannu kompla jgħid li filwaqt li kulħadd kien qed jitkellem dwar is-serqa, ħadd ma kien esplora l-veru motiv.

‘Imma min seta’ kellu interess li Pawlu ma jilgħabx f’dik il-logħba hekk importanti?’ staqsiet Doris.

‘Mhux min jilgħab l-imħatri!’ wieġeb in-nannu.

Filwaqt li qal dan id-diskors, Toni kien jaf tajjeb lil Anġlu, raġel li kien lest jagħmel imħatra ma’ kulħadd u fuq kwalunkwe ħaġa.

‘Ngħassu lil dan ir-raġel u jaf insibu tarf din il-kobba mħabbla,’ reġa’ qal in-nannu.

Anġlu kien magħruf mar-raħal kollu u ftit li xejn kienu jfittxu l-kumpanija tiegħu sakemm ma jkunx hemm xi ħadd li jrid jilgħab xi mħatra. Mill-istħarriġ li għamlu d-ditektivs kien irriżulta li filwaqt li faħħar lit-tim ta’ Ħal Dratta, Anġlu kien lest jilgħab il-flus li t-tim ma jirbaħx il-logħba. Imbagħad, wara l-logħba, Anġlu kellu argument li kulħadd ħaseb li kellu x’jaqsam mal-imħatri.

Ċertu Stiefnu kien deher ta’ sikwit jargumenta ma’ Anġlu u darba minnhom heddu li jew jingħata dak li kien imwiegħed, jew jikxef kollox. Dawk li semgħu dan id-diskors kienu interpretawh li l-argument kien dwar imħatra, imma ma kienx. Sadattant, Stiefnu kompla b’dawn il-laqgħat ma’ Anġlu u waqt waħda minnhom John kien ġibed xi ritratti li għalkemm miġbuda mill-bogħod servew biex ingħatat żvolta oħra lill-każ.

‘X’taħseb, nann?’ staqsiet Doris, turi r-ritratt ta’ Stiefnu.

‘Jidher irrabjat,’ wieġeb Toni.

‘U x’iktar?’ reġa’ staqsa John. Imma Toni ma kellux tweġiba għal din il-mistoqsija. Għalhekk kienu pronti rrispondew iż-żewġ ditektivs l-oħra, Frans u Doris.

‘M’intix tosserva xebh bejn Pawlu u Stiefnu?’ staqsew it-tfal, juruh ritratt ta’ Pawlu kif kien deher f’waħda mill-gazzetti.

‘Dan ir-ritratt nurih lir-raġel ta’ Karmni u ngħidlu jistaqsi lil Karmni jekk Stiefnu kienx wieħed minn dawk iż-żewġ żgħażagħ li kienet rat dakinhar tas-serqa,’ qal in-nannu. Sadattant, John kien ħejja żewġ ritratti ta’ Stiefnu u f’wieħed minnhom żied il-mustaċċi rqaq bħal dawk ta’ Pawlu. Skont John, dawn il-mustaċċi setgħu kienu finta.

Din id-darba, minħabba kriżi ta’ kuxjenza, Karmni mhux biss ikkoperat, imma marret turi r-ritratt lil oħtha Ġovanna.

‘Issa qed iddaħħalli d-dubju,’ wieġbet Ġovanna meta rat ir-ritratti.

Sadattant id-ditektivs sabu min x’aktarx kien ma’ Stiefnu dakinhar tas-serqa u meta dan it-tagħrif kollu għadda għand il-Pulizija, il-każ ħa żvolta oħra.

Toni kien qal b’kollox lis-Surġent Fred u ssuġġerielu li l-Pulizija tkellem lil ċertu Bertu dwar il-każ. Bertu kien dak iż-żagħżugħ li qagħad barra l-ħanut dakinhar tas-serqa. Bertu ċeda mill-ewwel meta s-surġent ta’ Ħal Dratta kien bagħat għalih, imma qal li ma kienx jaf li Stiefnu kien se jwettaq serqa. Huwa ammetta li Stiefnu wiegħdu għaxar ewro talli jgħid il-kliem: ‘Ħaffef, Pawl, għax resqin in-nies.’ Bertu qal ukoll li dan il-kliem kellu jingħad anke jekk ma jkun ġej ħadd u jingħad b’mod li tisimgħu Ġovanna. Iż-żagħżugħ stqarr ukoll li jumejn wara l-każ kien irrealizza li kollox sar biex jarrestaw lil Pawlu u b’hekk ma jkunx jista’ jilgħab.

Il-perċimes f’dan il-każ kien Anġlu, li wiegħed elfejn ewro lil Stiefnu talli jippersonifika lil Pawlu u jidħol jisraq minn ħanut. Wara xi żmien ifittex il-passi ta’ Pawlu, Stiefnu ddeċieda li ssir serqa żgħira mill-ħanut ta’ Ġovanna, mnejn soltu kien jidħol jixtri Pawlu. Imma ġara li Anġlu kien tilef il-flus fl-imħatri għax bassar telfa għat-tim ta’ Ħal Dratta. Dan wassal biex jagħti biss mitt ewro lil Stiefnu, u mhux l-elfejn li wiegħdu. Kien għalhekk li dawn it-tnejn tlewmu kemm-il darba.

‘Issa x’jiġri?’ staqsiet Doris lil Toni.

‘Issa jieħu ħsieb l-avukat ta’ Pawlu, imma m’hemmx dubju li tkun irtirata l-akkuża kontra Pawlu u jakkużaw lill-oħrajn,’ wieġeb in-nannu.