Skwadra Sigrieta 11: L-Għejbien ta' Wenzu

‘Kien ilu jgħid li għad jagħmel waħda minn tiegħu,’ qal Toni meta sema’ lil martu tgħid li kienu qed ifittxu lil Wenzu Pace, għażeb ta’ erbgħin sena li kien jgħix waħdu fid-dar li trabba fiha.

‘Tgħid għamlulu xi ħaġa?’ staqsiet mart Toni.

Minn ċkunitu Wenzu kien tifel żvelt u jħobb jagħmel xi praspura. Kien żagħżugħ attiv fiċ-ċentru parrokkjali u kellu sehem kbir fit-twaqqif ta’ grupp ta’ atturi teatrali li għal xi żmien kienu jorganizzaw attivitajiet teatrali fis-sala tal-istess ċentru. Imma wara l-mewt ħesrem ta’ missieru u ommu, Wenzu ma baqax l-istess raġel ferrieħi bħalma kien u qata’ ħafna mill-kumpanija li kellu.

Jum fost l-oħrajn, Tereża, il-ġara ta’ Wenzu, marret l-għassa tal-Pulizija u qalet li kienet ilha ma tara lil Wenzu xi tlett ijiem u bdiet titħasseb. Il-mara qalet li t-trakk żgħir ta’ Wenzu kien ipparkjat quddiem il-bieb u li filgħaxija ma kienet rat ebda dawl.

Is-surġent kiteb dak li qaltlu Tereża, imbagħad qalilha li kien sejjer magħha biex jagħti daqqa t’għajn. Sadattant Tereża kompliet qalet li Wenzu kien jaħdem fit-trasportar tal-għamara u dak li jitolbuh in-nies. Il-mara qalet ukoll li Wenzu ġieli stqarr li kien imdejjaq ħafna. Hija ddeskrivietlu lil Wenzu bħala raġel twil, irqiq, xagħru twil ħafna u bid-daqna.

Wara li s-surġent ċempel diversi drabi l-qanpiena tad-dar ta’ Wenzu, reġa’ lura l-għassa u qal li kien se jitlob struzzjonijiet jekk kellux jidħol ġewwa. Sadattant, il-Pulizija staqsiet diversi nies jekk kinitx rat lil dan ir-raġel, imma t-tweġiba kienet fin-negattiv. Saret ukoll verifika jekk Wenzu kienx ħalla Malta, imma rriżulta li lanqas passaport ma kellu.

L-għada, is-surġent niżel fil-bitħa ta’ Wenzu permezz ta’ sellum u kisser ħġieġa ta’ tieqa biex seta’ jidħol ġewwa. Imma Wenzu baqa’ ma nstabx.

Toni u n-neputijiet semgħu wkoll dwar l-għejbien ta’ Wenzu, imma Toni qalilhom li dan il-każ ma kienx ħobż għal snienhom.

‘Għaliex, nannu Toni?’ staqsa John.

‘Jekk ġara kif kulħadd qed jaħseb li ġara, aħna mhux se nindaħlu fl-istħarriġ tal-Pulizija,’ qal in-nannu.

‘Imma jekk qiegħed moħbi xi mkien ma nkunu qed infixklu lil ħadd,’ qalet Doris.

‘Għada wara l-quddies immur inkellem lil Tereża,’ qal Toni, filwaqt li rrakkontalhom xi ftit mill-praspar ta’ Wenzu meta kienu jirreċtaw fuq il-palk. Toni kellem ukoll lil Paċikk, ħabib kbir ta’ Wenzu, u dan tah x’jifhem li Wenzu kien qawwi u sħiħ, u din kienet xi bużullotta minn tiegħu.

L-għejbien ta’ Wenzu sar fil-ġranet tas-sajf, meta t-tfal kienu bil-vaganzi, għalhekk in-neputijiet ta’ Toni setgħu jqattgħu aktar ħin fil-kumpanija tan-nannu.

Wara li Toni rrifletta sewwa dwar dak li kien qallu Paċikk, talab lid-ditektivs tiegħu jmorru fil-ħwienet tal-merċa u jistaqsu jekk Wenzu kienx għamel xi xirjiet ikbar minn tas-soltu, imma ma rriżulta xejn. L-istħarriġ tat-tfal kompla f’Ħal Fetħa, ir-raħal biswit Ħal Dratta, imma minn hawnhekk ukoll ma kisbu l-ebda informazzjoni utli.

Xi jiem wara, Doris kienet semgħet lil missierha jilmenta li ma kienx sab jixtri tabakk għall-pipa mill-ħanut li kien soltu jixtri mingħandu fil-pjazza tar-raħal. Għall-ewwel it-tifla ma qalet xejn dwar it-tgergir ta’ missierha, imma meta n-nannu reġa’ semma li Wenzu kien iħobb ipejjep il-pipa, Doris qalet dak li kienet semgħet. Imma meta t-tfal marru jistaqsu jekk kienx Wenzu dak li xtara kwantità kbira ta’ tabakk, tal-ħanut wieġeb li r-raġel kien libes pulit, u kellu xagħru mqaxxra bħal wieħed fartas.

Sadattant il-Pulizija kienet ivverifikat fl-isptarijiet ta’ Malta u Għawdex biex tara jekk Wenzu kienx iddaħħal għall-kura. Wara li ma rriżulta xejn, saret ukoll tfittxija fix-xagħri ta’ Ħal Dratta u diversi nies mil-lokal kienu ngħaqdu mal-Pulizija, imma ma kien irriżulta xejn. Il-Pulizija rċeviet ukoll informazzjoni li Wenzu ġieli deher ħdejn ir-razzett ta’ Neriku f’Ħal Ferħa, imma xi żmien qabel l-għejbien ta’ Wenzu, Neriku kien mar iqatta’ tliet xhur għand ibnu l-Awstralja. Dan it-tagħrif ingħata mingħand Saver, il-kuġin ta’ Neriku li, fin-nuqqas ta’ Neriku, kien qed jieħu ħsieb l-għasafar u l-annimali li kien hemm fir-razzett.

Toni u d-ditektivs tiegħu kienu semgħu b’dan l-arranġament li kien għamel Neriku qabel ħalla Malta. Madankollu, Toni qal li Neriku ġieli stqarr miegħu li f’Malta ma kellux qraba għax kulħadd kien emigra lejn l-Awstralja.

Wara li għaddew tliet ġimgħat, l-għejbien ta’ Wenzu beda jintesa u l-għajdut tan-nies kien li dan kien intefa’ l-baħar minn fuq xi rdum.

‘Min jaf kieku mmorru nagħtu titwila fir-razzett ta’ Neriku u naraw min hu dan Saver?’ qal John.

‘Immorru ħdejn ir-razzett, imma niħduha bħala passiġġata,’ qal in-nannu.

‘Mhux biħsiebek tkellem lil Saver?’ staqsiet Doris.

‘Għalissa mmorru naraw il-post permezz tat-trombi u nieħdu xi ritratti,’ wieġeb in-nannu.

Il-mawra lejn ir-razzett tħalliet għal ġurnata tard waranofsinhar u mill-għolja ta’ faċċata tar-razzett id-ditektivs qagħdu josservaw il-post u f’ħin minnhom deher raġel bil-beritta f’rasu ħiereġ fil-bitħa jġorr barmil. Hawn John kien pront ġibed ftit ritratti sakemm Saver ma deherx aktar. Wara ftit tal-ħin deher l-istess raġel, imma jżomm il-beritta f’idu. Hawn John kompla ġibed aktar ritratti.

Lura għand in-nannu, John tefa’ r-ritratti fil-kompjuter u l-erba’ ditektivs bdew jarawhom fuq il-moniter.

‘Tafu lil dan tar-ritratt?’ staqsa John lil nannuh.

‘Le, m’għandix idea tiegħu u aħjar tagħmilli kopja ta’ dan ir-ritratt,’ qal in-nannu.

L-għada, Toni wera r-ritratt ta’ Saver lil diversi nies, imma kollha qalu li ma kinux jafuh. Dakinhar ukoll, bl-iskuża li ried jixtri xi ħaġa għall-kompjuter, John mar f’Ħal Fetħa biex ikellem lill-bejjiegħ tat-tabakk. John ħa lil Frans u ’l Doris miegħu biex jgħidulu mnejn soltu kien jixtri t-tabakk missierhom.

Il-bejjiegħ tat-tabakk għaraf tajjeb lil Doris u qalilha biex tgħid lil missierha li kien ġab konsenja oħra ta’ tabakk. Hawn it-tifla wrietu r-ritratt ta’ Saver u staqsietu jekk kienx ir-raġel li kien xtara ħafna tabakk.

‘Iva, hu kollu kemm hu, imma ma kienx liebes daqshekk żdingat,’ qal tal-ħanut.

Mistoqsi kienx mar jixtri aktar tabakk, tal-ħanut wieġeb fin-negattiv.

‘Għadni ma fhimtx x’għandek f’moħħok,’ qal Frans lil kuġinuh.

‘Qed nissuspetta li dak tar-razzett huwa xi impustur,’ wieġeb John.

‘Imissna mmorru nkellmuh,’ qalet Doris.

‘Mingħajr ma ngħidu lin-nannu?’ staqsa Frans.

‘Immorru ngħidulu li Neriku kien wegħedna kanarin,’ qalet Doris.

Fi triqithom lejn ir-razzett ta’ Neriku, it-tfal ftiehmu li jibqgħu kalmi u ma jagħmlu xejn li juri li kellhom xi suspetti ħżiena. Mat-taħbita fuq il-bieb tar-razzett, ir-raġel misterjuż staqsa minn kien hemm wara l-bieb u wara li qalulu li kienu marru jfittxu lil Neriku, bexxaq ftit il-bieb u qalilhom li Neriku kien imsiefer u kien mistenni lura Malta ftit aktar minn xahrejn oħra. Imbagħad Saver kompla fetaħ il-bieb biex jara sewwa lit-tfal.

Għalkemm ma rawx wiċċ Saver sewwa, ma kellhom l-ebda dubju li kienu qed jitkellmu ma’ raġel ipejjep il-pipa għax ir-riħa tat-tabakk dwiet ma’ kullimkien.

Lura għand in-nannu, John qal x’kienu għamlu dakinhar. Madankollu, in-nannu wissiehom biex ma jerġgħux jagħmlu affarijiet bħal dawn biex ma jidħlux f’xi saram. Imbagħad id-ditektivs reġgħu taw daqqa t’għajn ir-ritratti li kienu ħadu qabel.

‘Taf x’mhux jidher f’dawn ir-ritratti?’ qal Frans.

‘Tkellem,’ qalu l-oħrajn.

‘Saver għandu sinjal ta’ farrett fuq in-naħa tal-lemin ta’ ngħasu,’ qal Frans.

‘Minn dak li smajt dalgħodu u minn dak li għadek kemm semmejt issa jidher li resqin lejn is-soluzzjoni tal-għejbien ta’ Wenzu,’ qal in-nannu, jindirizza lil Frans.

Hawn Toni qal li skont Tereża, dak ir-raġel b’xagħru qasir mhu ħadd ħlief Wenzu. In-nannu fakkar lit-tfal li Wenzu kien attur u kapaċi jippersonifika karattru ieħor, imma din id-darba fallielu.

‘U kif wasalt għal din il-konklużjoni?’ staqsew it-tfal.

‘Xi għaxar snin ilu Wenzu kellu inċident ikrah bil-mutur u għal ftit ma mietx,’ wieġeb in-nannu. Toni kompla qal li Wenzu kien għamel xi tliet ġimgħat f’koma u kellu farrett f’rasu.

‘Issa x’se nagħmlu?’ qal John.

‘L-aħjar ħaġa hi li nieħdu lil Tereża sar-razzett,’ qal in-nannu.

Imma meta Toni qal b’kollox lil Tereża, din qalet li jkun aħjar għaliha li ma tidħolx f’din il-kwistjoni għax beżgħet li meta Wenzu jerġa’ lura d-dar, ir-relazzjoni ta’ bejniethom ma tibqax l-istess. Dwar din id-deċiżjoni kien tal-istess fehma Lippu, ir-raġel ta’ Tereża.

Wara ġurnata jaħseb, Toni ddeċieda li jikteb ittra lir-raġel li kien qed jippoża ta’ Saver. Fl-ittra, Toni wissa lil ‘Saver’ li jkun aħjar li jġib fi tmiemha din iċ-ċajta jew avventura għax seta’ jiġi fi gwaj mal-Pulizija. Saver, jew aħjar Wenzu, qagħad għall-parir ta’ Toni u jumejn wara reġa’ lura lejn id-dar. Sadanittant, Wenzu beda jirrifletti dwar l-ittra li kien irċieva filwaqt li kompla jmur kuljum fir-razzett ta’ Neriku għax dan kien ftehim ta’ bejniethom. Jumejn wara, mar l-għassa tal-Pulizija u nzerta lis-surġent b’burdata tajba. Wenzu ġie mwissi serjament li praspar ta’ din ix-xorta ma kellux xi jridhom.