(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

L-Avventuri f'Ħal Xuxa 2: L-Isfrattu ta' Żeppi ż-Żiemel

Il-ġurnata mis-sebħ turik kif se tkun! Għal Ġanni l-bidwi, martu Nena u l-annimali tar-razzett f’Ħal Xuxa kien jidher ċar li l-ġurnata kellha tkun waħda ta’ ħidma bla heda. F’jum bi sħana mill-aktar qalila ta’ Ġunju, meta x-xemx tkun tisreġ ġmielha, l-annimali tar-razzett bakkru kmieni għax kien wasal jum il-ħsad.
Jum il-ħsad kien jiġi wara jiem twal ta’ ħidma fejjieda minn Ġanni u Nena. Wara ħafna tbatija biex ikabbru l-frott u l-ħaxix, u jħarsuhom mill-elementi, f’jum il-ħsad kienu jiġbru l-prodotti mill-għelieqi u jistivawhom f’kannestri bi preparazzjoni għall-bejgħ.
null
Paġna 1
Ix-xogħol kien jirrikjedi ħafna strapazz u kulħadd kien jagħti sehmu fir-razzett ta’ Ġanni f’Ħal Xuxa, inklużi l-annimali beżlin tar-razzett li ma kinux jonqsu milli jagħtu daqqa t’id. L-aktar annimal li kien joffri għajnuna kien Żeppi, iż-żiemel ix-xwejjaħ tar-razzett. Ħafna minn sħabu kienu jsibuh bħala x-Xiħ, għaliex kien l-aktar annimal li kien ilu fir-razzett ta’ Ġanni u Nena.
Minn kmieni filgħodu, il-bidwi kien jarma l-kannestri l-vojta fuq dahar Żeppi biex jeħodhom l-għalqa ħdejn Nena. Wara l-ħsad kont tista’ tilmaħ lil Żeppi tiela’ ċlikki ċlikki t-telgħa għar-razzett bl-istess kannestri, kollha mimlijin frott u ħaxix biex jiġu stivati fil-maħżen.
Issa dawn il-kannestri ma kinux ħfief, speċjalment meta mimlijin dulliegħ jew bettieħ minn dak il-kbir! Żeppi ż-żiemel qatt ma kien jilmenta, anki jekk l-għeja tkun qed taħkmu. Ġanni kien jinnota li l-annimal kien jagħmel xogħlu bil-galbu. Il-bidwi ġieli qal bejnu u bejn ruħu, “Kemm sibt xorti ma’ dan iż-żiemel! Ma nafx x’kont nagħmel mingħajru!”
null
Paġna 2
Nassigurakom li Żeppi kien iqis lilu nnifsu ffortunat li kien jgħix f’dan ir-razzett f’Ħal Xuxa. Aktar u aktar meta kien jaħseb li sa ftit żmien qabel ix-xorti ma tantx kienet qed titbissimlu u daq l-imrar li kienet taf toffri l-ħajja.
Mela x’kien ġara, nistħajjilkom tistaqsuni? Għandkom tkunu tafu li Żeppi mhux dejjem kien jgħix fir-razzett f’Ħal Xuxa. Meta twieled kien jgħix ma’ ommu Marjann fir-razzett ta’ Ġamri f’Ħal Firda.
Dan Ġamri kien għadda minn esperjenza kerha li ħalliet effett ħażin fuqu. Hu kien tilef lil martu ħabta u sabta minħabba marda kiefra u sab ruħu waħdu għaliex tfal ma kellhomx. Kien hawn li Ġamri kien taha għax-xorb u l-logħob biex forsi jinsa d-diqa li kellu f’qalbu.
null
Paġna 3
Ġamri kien jemmen li l-logħob jaf ikun kattiv. Filli tkun minn fuq u filli tispiċċa minn taħt. Fil-verità maż-żmien hu berbaq flusu fuq l-imħatri u r-razzett ftit li xejn kien jagħti kasu. F’tentattiv biex forsi jiġbor ftit mill-flus mitlufa, beda jagħmel l-imħatri fuq it-tlielaq taż-żwiemel.
Fis-satra tal-lejl kien jaqbad lil Marjann u jiltaqa’ ma’ sħabu l-lagħaba bħalu fi triq abbandunata ftit ’il bogħod mir-raħal. Hemmhekk kienu jerħulha jtajru flushom fuq ta’ min kien l-aqwa żiemel u min kien se jirbaħ it-tlielaq.
Dawn it-tlielaq minn taħt ħassru saħħet Marjann, tant li wara ftit ħalliet din id-dinja. In-namra tal-logħob kienet ħakmet bil-kbir lil Ġamri u malli Marjann mietet, qabad liċ-ċkejken Żeppi u beda jdaħħlu għat-tlielaq.
null
Paġna 4
Għall-bidu Ġamri kien kuntent b’Żeppi għaliex kien irebbħu ħafna tlielaq waqt li sħabu jitilfuhom. Iżda l-folja malajr inqalbet! Żeppi beda jtellaq kontra żwiemel ferm aħjar minnu u Ġamri beda jitlef il-flus.
Malli kien jara dan, Ġamri kien jiżvoga r-rabja kollha tiegħu f’Żeppi billi jagħtih bil-frosta u jħallih bla ikel. Iż-żiemel ma kienx jifhem għaliex sidu kien jagħmel hekk. Fuq kollox hu kien jagħmel l-almu tiegħu biex jirbaħ it-tlielaq!
Darba minnhom is-saħna tal-logħob tant telgħet għal ras Ġamri li fettillu lagħab id-deheb kollu li kellu fuq tellieqa minnhom. Żeppi tgħidx kemm stinka biex jirbaħ it-tellieqa iżda ma spiċċax fl-ewwel post. Malli nduna li tilef ġidu, Ġamri inkorla sew u fis-saħna tal-mument beda jagħti liż-żiemel bil-frosta u n-niggieża bla ebda rażan.
null
Paġna 5
Żeppi ġarrab feriti tant kbar li lanqas felaħ jimxi u għotor f’nofs ta’ triq. Malli ra li ż-żiemel kien spiċċa bla saħħa, Ġamri qallu, “Hawn inħallik ħalli nagħtik tagħlima talli telliftni ġidi. Jien issa m’għandix bżonnok aktar.” Il-lagħabi ma ħasibhiex darbtejn u ħalla liż-żiemel midrub u mdemmi waħdu f’nofs ta’ triq waqt li hu telaq lejn ir-razzett bil-mixi.
Wara lejl għall-kesħa, il-kundizzjonijiet tas-saħħa tal-annimal ma tantx kienu tajbin, anzi pjuttost marru għall-agħar. Żeppi ħaseb li kien se jħalli din id-dinja abbandunat waħdu fl-imwarrab, fit-tarf tar-raħal, iżda dan ma kellux ikun.
Inzerta li mill-inħawi għadda raġel twajjeb li ħenn għalih. Dan ma kien ħadd ħlief Ġanni l-bidwi li malli rah ferut ħadu fir-razzett tiegħu u dewwieh b’tant għożża bl-għajnuna ta’ martu Nena.
null
Paġna 6
Il-kliem bħaċ-ċirasa u għadda minn għala widnejn Ġamri li ż-żiemel tiegħu kien fir-razzett ta’ Ġanni, għalhekk mar biex jieħdu lura. Ġanni u Nena kienu rabtu qalbhom ma’ Żeppi u ma ridux li jerġa’ jinħaqar, allura xtrawh mingħand sidu u żammewh fir-razzett tagħhom.
null
Paġna 7
Żeppi integra sew fil-ħajja tar-razzett f’Ħal Xuxa, l-aktar għaliex Ġanni kien jittrattah tajjeb u qatt ma refa’ jdejh fuqu. Illum kont tista’ tilmħu mill-bogħod iġorr il-bettieħ u d-dulliegħ mill-għalqa għall-maħżen. L-għeja bdiet tagħmel tagħha u l-passi tiegħu ma baqgħux ħfief bħal qabel.
null
Paġna 8
Eżatt kif Żeppi wasal nofs triq, lemaħ bħal oġġett ileqq fl-art. Għall-bidu ħaseb li beda jimmaġina iżda malli resaq aktar qrib innota li dan l-oġġett stramb aktar beda jleqq. Aktar ma ż-żiemel beda jħares lejh, aktar beda jħoss għajnejh juġgħuh.
Żeppi nħakem minn paniku kbir għaliex ħaġa bħal din qatt ma kien iltaqa’ magħha qabel. Hu beda jirraġuna li dan l-oġġett ileqq kien parti mix-xemx li waqgħet mis-sema u niżlet fir-razzett ta’ Ġanni!
Minkejja li saqajh bdew jirtogħdu sew bil-biża’, f’salt wieħed iż-żiemel beda jiġri b’kemm kellu saħħa ’l barra mix-xatba tar-razzett. Warajh ħalla ringiela ta’ bettieħ u dulliegħ mifqugħ mal-art.
Il-fekruna Ċettina flimkien mal-annimali l-oħra kienu fil-maħżen xħin raw iż-żiemel jisfratta ħabta u sabta. Ċettina staqsiet lil sħabha l-annimali, “Żeppi xi ġralu? Mhux soltu tiegħu li jisfratta b’dan il-mod. Dawn l-affarijiet rari jagħmilhom. Naħseb aħjar immorru nfittxuh.”
null
Paġna 9
B’leħen sod Ċettina tat ordni, “Fniek u żrameġ, morru sibu lil Żeppi u araw li ġġibuh lura lejn ir-razzett.” Dawn ma ħasbuhiex darbtejn u obdew mill-ewwel. Il-fekruna, minkejja li kienet ħlejqa kemxejn ċkejkna, kienet irrispettata sew mill-annimali kollha tar-razzett. Ordni minn fommha kienet tiġi obduta minnufih.
Wara tfittxija twila, il-fniek u ż-żrameġ irnexxielhom isibu lil Żeppi jolfoq b’kemm kellu saħħa ħdejn il-kappella l-antika tar-raħal. “Ara xi ġralna,” qalilhom hekk kif lemaħhom resqin qrib. “Ix-xemx se taqa’ u parti minnha diġà niżlet fir-razzett.”
Żużu l-fenek il-kbir beda jmerih, “Ma tarax li se taqa’ x-xemx! Hemm, ħares ’il fuq. Mhux fis-sema tinsab?”
“Jiena ċert li rajt parti minnha fir-razzett u meta kont qed inħares lejha tgħidx kemm bdiet tleqq,” insista ż-żiemel kollu maħsud.
null
Paġna 10
“Dak li rajt żgur li ma kinitx ix-xemx. Issa ejja mmorru lura għaliex inkella kulħadd jibda jinkwieta,” qallu Żużu. Għall-bidu ż-żiemel ma riedx jitħarrek, iżda wara għamel il-kuraġġ u pass wara pass flimkien mal-fniek u ż-żrameġ qabdu t-triq lura.
Hekk kif bdew resqin lejn ir-razzett, l-annimali raw lil Ġanni jistenna ħdejn ix-xatba. Żeppi ħaseb li kien se jagħmel għalih wara l-frattarija tal-bettieħ u d-dulliegħ. Ġanni, però, mhux talli ma kienx irrabjat iżda feraħ malli ra li ż-żiemel reġa’ ġie lura qawwi u sħiħ.
null
Paġna 11
Malli Żeppi resaq qribu, il-bidwi mellsu tnejn fuq rasu waqt li bil-ħlewwa qallu, “Jidher li bżajt minn xi ħaġa, hux? Naħseb li issa m’għandekx għalfejn tibża’ aktar.”
Kif qal hekk, Ġanni ħareġ oġġett mill-but li malli beda jċaqalqu beda jleqq. “Din hi mera. Xħin tagħmilha fix-xemx tibda tleqq iżda m’għandekx għalfejn tibża’ minnha għax mhi se tagħmillek xejn,” spjegalu l-bidwi.
null
Paġna 12
Iż-żiemel fehem x’ried jgħidlu Ġanni. Induna li l-ħsibijiet koroh kienu kollha fantażija ta’ moħħu! Ix-xemx ma kinitx se taqa’ biċċiet u hu seta’ jkompli b’ħajtu b’mod normali fir-razzett ta’ Ħal Xuxa. Dakinhar qabel ma raqad, iż-żiemel kiel qatta silla speċjali li ppreparalu l-bidwi biex ipattilu għall-qatgħa l-kbira li ħa matul il-jum!
null
Paġna 13
Tmiem