Is-Siġra tal-Ġamm

Katja minn dejjem kienet tqis lil Renzo xxurtjat. Kienu fl-istess klassi l-iskola u meta darba l-għalliema staqsiethom jiddeskrivu d-dar tagħhom Katja baqgħet b’ħalqha miftuħ tisimgħu jitkellem fuq ir-razzett tal-familja tiegħu.

“Aħna għandna bitħa bil-qsari d-dar u post fejn nilgħab bil-kamp, int għandek bitħa?” staqsietu darba, ta’ tifla kurjuża li kienet.

“Jien nilgħab fl-għalqa tas-siġar tal-frott,” weġibha jitbissem Renzo.

“U jien għandi qattus u fekruna. Int għandek xi pet?” reġgħet Katja b’għajnejha mberrqin.

“Għandna żewġ mogħżiet u ġiebja bil-ħut tal-ilma ħelu. Trid tiġi tarahom xi darba?”

Katja qatt ma kienet marret f’razzett qabel, għalhekk laqgħet l-istedina ta’ Renzo mill-ewwel. Renzo kien jgħaddi ħafna żmien man-nanniet, li kienu għadhom jgħixu magħhom. Ma kien fadal kważi xejn minn kif kien qabel. L-art kienet ilha żmien ma tinħadem. Omm u missier Renzo kienu bdew jaħdmu f’supermarkit fil-qrib. U l-bhejjem li kien jieħu ħsieb nannuh kienu ilhom li telqu. Kien baqa’ biss iż-żewġ mogħżiet li bil-ħalib tagħhom in-nannu kien jagħmel ġbejniet li kienu mfittxija ħafna min-nies tal-qrib.

Madankollu, iż-żewġt itfal ma damux ma sabu r-rokna favorita tagħhom. Kienu ta’ spiss jintasbu taħt is-siġra tal-berquq. Maż-żmien in-nannu ħadmilhom bandla fejn kienu jqattgħu sigħat jitkellmu u joħolmu. In-nanna ta’ Renzo kienet tmur minn post għall-ieħor bis-siġġu tar-roti u mhux l-ewwel darba li ġiet ħdejhom.

“Erġajt ħrabtlu lin-nannu!” kienet tgħidilhom biex iddaħħakhom. “Qbadt ir-rampa u bqajt nieżla niġri qisni karozza tat-tlielaq!”

Ma kinitx taqta’ qalbha, anzi kienet tieħu gost tara lit-tfal jilagħbu u mhux l-ewwel darba li ġabitilhom xi biċċa ħobż bil-ġamm tal-berquq. U erħilhom idellku wiċċhom u jlaqqtu subgħajhom sal-aħħar nitfa. Katja kienet tiftaħ aptit kważi daqs Renzo u bdiet trabbi par wardiet ħomor f’dik l-arja kollha.

Darba waħda, filwaqt li Katja kienet qed titbandal u tħares ’il fuq lejn is-siġra, staqsiet lil ħabibha, “Renzo, fejn hi s-siġra tal-ġamm?”

“Is-siġra ta’ xiex?” reġa’ Renzo skantat.

“Is-siġra tal-ġamm. Minn dak li ġabitilna n-nanna l-aħħar darba. Mhux hi qaltli li dak kollu naturali? Kemm kien tajjeb, ħej!”

Renzo ma felaħx iżomm bid-daħk. “Mela l-ġamm jikber fuq is-siġar, min jisimgħek!”

Katja għal ftit ma ħaditx għaliha imma Renzo mill-ewwel beda jispjegalha. “Dak tagħmlu n-nanna. Taf tagħmel l-aqwa ġammijiet tad-dinja. Qaltlek li huwa naturali għax magħmul kollu mill-frott tas-siġar. Anzi n-nannu jgħidlu organiku. Ma nafx xi tfisser eżatt. Naħseb għandu x’jaqsam mal-frott li nkabbru aħna fl-għalqa. Tgħidx kemm inħobb ngħinha! Hi taħdem minn fuq is-siġġu tar-roti u jien innewlilha l-affarijiet. Imxi ħa nurik il-kabord mimli bil-vażetti tal-ġamm. Kollha jien u n-nanna għamilniehom.”

U ż-żewġt itfal dlonk telqu jiġru sal-kċina tan-nanna. Renzo kien qisu qed juriha t-teżor tal-familja filwaqt li Katja ma waqfitx tiskanta tara dawk il-vażetti stivati puliti kollha mimlijin tjubija mis-siġar tar-razzett.

Jum minnhom, Katja nnutat lil Renzo kwiet kemxejn iżżejjed. Lanqas huma u mexjin lura mill-iskola ma kellu aptit itaqtaq bħas-soltu. Katja qatgħetha li wara li tlesti x-xogħol tal-iskola tmur sar-razzett ta’ Renzo.

Renzo kien qiegħed kwiet jitbandal taħt is-siġra tagħhom u bilkemm induna b’Katja xħin sejħitlu. Issa Katja kienet dratu u ma setax jaħbilha iżjed.

“Iridu jixtru l-art tagħna,” beda jgħidilha t-tfajjel.

“Min irid jixtriha?” staqsietu Katja mistagħġba.

“Tas-supermarkit. Iridu jkabbru għax qed iġibu ħafna prodotti minn barra. In-nannu ma jixtieqx jitlaq minn hawn, imma bin-nanna ma tistax timxi u bil-papà tiegħi ma jistax jgħinu qed jaħsibha. Ħadd ma baqa’ jixtri l-prodotti tagħna għax in-nies iridu l-affarijiet malajr u n-nannu ma jistax ikabbar il-ħxejjex malajr.”

Katja għamlet qalbha sewda. Jekk ibigħu l-art, il-familja ta’ Renzo jridu jsibu xi mkien ieħor fejn joqogħdu. It-tfal ma kinux jistgħu jibqgħu jilagħbu fuq il-bandla u jieklu l-ħobż bil-ġamm... Imma f’daqqa waħda t-tifla qabżet minn postha.

“Naf, Renzo! Min jaf li kieku nħajru lin-nanna tagħmel il-ġamm? Tant hu tajjeb il-ġamm li tagħmel hi li n-nies jibdew jiġu jixtru l-ġamm minn hawnhekk u n-nannu jista’ jkompli joqgħod hawn.”

Renzo baqa’ jħares lejha. “Mela n-nanna se tlaħħaq!”

“U int kemm taqta’ qalbek malajr. M’hawnx jien ukoll. Jien u int nistgħu ngħinuha tagħmel il-ġamm. Imxi naqtgħu ftit frott, naħsbu għall-vażetti u mmorru niġru għand in-nanna. Issa tara kif tant jiġi tajjeb li jibdew joħdulna l-ordnijiet,” kompliet Katja kollha ħeġġa.

“Bil-mod Katja!” qalilha Renzo li kien għadu maħsud. “U x’se nsemmuh il-prodott tagħna?”

“Nistgħu nagħmlulu t-tikketta tagħna u nsemmuh Is-Siġra tal-Ġamm!” qabdet tidħak Katja.

Għaddew is-snin u r-razzett ta’ Renzo għadu hemm. Bilkemm issib post fejn tipparkja jekk trid tmur tixtri l-ġamm. Renzo laħaq direttur tal-kumpanija li waqqaf flimkien ma’ Katja bl-isem Is-Siġra tal-Ġamm. In-nanniet mietu, iżda fil-kamra ta’ barra hemm ritratt tan-nannu ħdejn in-nanna daħkana fuq is-siġġu tar-roti b’vażett tal-ġamm f’idejha. Il-ġenituri ta’ Renzo telqu mis-supermarkit u bdew jieħdu ħsieb is-siġar tal-frott li kien ħawwel in-nannu. U Katja x’kien sar minnha? Dik iżżewġet lil Renzo u kellhom ħafna tfal bil-wardiet ta’ wiċċhom ħomor!