(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ir-Raħal tan-Nani 03: Ħarruba u l-Magħżel Imsaħħar

Dawl inemnem kien jidher ħiereġ minn daħla ta’ gorboġ imdaqqas mhux ħażin. Saħħara nana xiħa, wiċċha qisu mappa bit-tikmix, b’xagħarha twil abjad qoton maħlul fuq spallejha, kienet qiegħda tgedwed weħidha waqt li tħawwad borma fuq kenur kbir.
In-nar tal-kenur kien qiegħed jarmi s-sħana u jdawwal parti minn dak il-gorboġ. Riħa tfuħ ta’ minestra kienet ħierġa minn dik il-borma tbaqbaq.
null
Paġna 1
F’rokna oħra tal-gorboġ kien hemm saqqu tat-tiben. Maġenbu kien hemm mejda u siġġu magħmulin minn injam goff. Xi erbat iqfief kienu mimlijin bl-affarijiet li kellha x-xiħa: ħwejjeġ, affarijiet tal-ikel, borom u imbarazz ieħor.
null
Paġna 2
F’rokna oħra tal-gorboġ kien hemm qfief oħra mimlijin bis-suf u l-qoton, parti maħdum u parti għadu jrid jinħadem.
null
Paġna 3
Ix-xiħa Ħarruba kienet mara bieżla. Għalkemm idejha u subgħajha kienu mgħawġin bix-xjuħija, kienet magħrufa għall-ġmiel ta’ drappijiet li kienet tagħmel. Kellha magħżel, raddiena u newl li kienu jafu lin-nanniet tagħha, imma kienet tieħu ħsiebhom qishom uliedha!
Wara li lestiet il-borma xegħlet xemgħa ħoxna li kienet ġo toqba fil-ħajt, intasbet fuq banketta, qabdet ftit suf mill-qoffa u bdiet taħdem. Hi u taħdem bdiet tgħanni:
Dur, magħżel, dur.
Dur u erġa’ dur,
ħalli nagħżel dan is-suf.
Bih nagħmel kapott sabiħ
u lil Rożetta jien nagħtih.
null
Page 4
U l-magħżel qisu ħa l-ħajja! Beda jdur idur bla waqfien! Ix-xiħa tiġbed is-suf mill-qoffa u s-suf isir ħabel u jitkebbeb mal-magħżel. Xi ġmiel ta’ ħabel beda jitkebbeb mal-magħżel!
null
Paġna 5
Xħin lestiet kemm kellha bżonn għall-kapott, qamet u marret tittawwal il-borma. L-ikel kien sar. Qalbet il-minestra f’borma oħra biex tibred ftit u poġġiet il-ħajt fin-newl biex jinħadem fi drapp. Kienet se tagħmlilha kapott b’erba’ faxxi ta’ kuluri. Xħin lestiet il-ħajt bdiet tgħanni:
Aħmar bħan-nar,
isfar bħax-xemx,
aħdar ħaxix
u blu bħall-baħar tax-xtajta.
Faxx wara faxx,
kulur wara kulur.
Xi ġmiel ta’ kapott
se nagħtiha żgur!
null
Paġna 6
In-newl beda jaħdem u l-ħajt beda jsir drapp. Trid tara xi ġmiel ta’ drapp beda jinħadem! Xħin rat li kollox kien miexi sew marret intasbet fuq is-siġġu u bdiet tiekol il-minestra. Kemm kienet tajba! Bdiet tinżlilha għasel!
Imma ma laħqitx kielet wisq, għax f’daqqa waħda semgħet ħoss stramb u xħin ħarset lejn in-newl rat li l-ħajt tgeżwer kollu ma’ xulxin!
Qamet tiġri u bil-fixla laqtet il-platt u l-minestra spiċċat ċaflisa mal-art! Tgerger kemm tiflaħ marret tara x’ġara. Imma baqgħet skantata tħares lejn is-sbuħija ta’ drapp li kien ħiereġ! Faxx aħmar, faxx isfar, faxx aħdar, faxx blu. Imbagħad faxx bil-kuluri kollha mħalltin flimkien u jkompli jirrepeti l-kuluri. Kemm kien sabiħ! U x’kapott se jkollha Rożetta!
null
Paġna 7
Ħallietu għaddej jaħdem id-drapp u marret mesħet il-minestra mill-art u qalbet platt ieħor sħun. Qagħdet tieklu bil-kwiet u bdiet taħseb kemm Rożetta kienet se tifraħ bih dak il-kapott!
null
Paġna 8
Tmiem