(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ir-Raġel Bilwieqfa

Kien żmien il-Milied. Il-mamà kienet ġejja lura mill-Belt fuq tal-linja wara li għamlet żewġ qadjiet hemmhekk. Binha Sheldon kien riekeb maġenbha, in-naħa ta’ ġewwa tas-sit, jittawwal mill-ħġieġa. Minn fuq stejġ minnhom tela’ raġel anzjan, bid-daqna bajda. Dan baqa’ bilwieqfa għax ma sabx post bilqiegħda. Kien qed iġorr basket kbir iswed.

Paġna 1

Il-mamà ħajret lil Sheldon biex iċedilu postu, imma t-tifel ma riedx. “Ara min hu, Sheldon!” qaltlu mbagħad minn taħt l-ilsien biex tħajru jqum. “M’intix tagħrfu?”

“Iva, qed nagħrfu!” stagħġeb Sheldon bla ma ta kas li l-anzjan seta’ jisimgħu. “Dak ir-raġel li jilbes ta’ Father Christmas. Ilbieraħ rajnieh fuq it-televixin. Naħseb li f’dak il-basket kbir għandu ħafna rigali biex iqassamhom f’xi party… Jaqbilli nċedilu posti forsi jagħtini xi rigal.”

Paġna 2

Qam minn postu u l-mamà daħlet fuq ġewwa minfloku. Hekk ix-xwejjaħ seta’ jpoġġi ħdejha. “Grazzi, tfajjel,” tbissimlu l-anzjan waqt li serraħ il-basket f’ħoġru. Sheldon baqa’ wieqaf maġenbu jitbissimlu huwa wkoll, u jixxennaq għal xi rigal milli ħaseb li kellu fil-basket. Ix-xwejjaħ daħħal idu fil-basket bla ma deher x’kien qiegħed jagħmel fih.

Paġna 3

Sheldon ħaseb li kien qiegħed jagħżel xi rigal għalih. Ftit wara x-xwejjaħ ċempel il-qanpiena għax kien wasal biex jinżel. Malli l-karozza waqfet ħareġ mill-basket kaxxa ċelesti marbuta b’żigarella ħamra u telaqha f’idejn Sheldon. Imbagħad niżel mill-karozza u ma deherx iktar.

Paġna 4

Sheldon reġa’ poġġa bilqiegħda ħdejn ommu, ferħan bir-rigal li kien għadu kif qala’. Imma dik il-kaxxa kien qiegħed iħossha ħafifa wisq. B’subgħajh jirtogħdu ħall iż-żigarella u fetaħ il-kaxxa. Kienet vojta!

“Dak ir-raġel ried jagħtik lezzjoni,” qaltlu ommu. “Int ċedejtlu postok għax stennejt rigal mingħandu, mhux għax ħennejt għalih. Allura ma kien ħaqqek ebda rigal.”

Sheldon ma qal xejn. Ħaseb li x-xwejjaħ kien semgħu jitkellem m’ommu u fehem x’kellu f’moħħu. ‘Kellu raġun jagħtini kaxxa vojta,’ qal f’qalbu. ‘Jien ħsibt biss fija nnifsi… Kont egoist.’

Paġna 5

$null$

Meta qorbu lejn l-istejġ fejn jieqfu s-soltu, il-mamà ċemplet il-qanpiena u niżlu mill-karozza. Huma u mexjin lejn id-dar Sheldon lemaħ mara anzjana quddiemhom, miexja ċlikki ċlikki bil-bastun f’id waħda u b’qoffa mimlija xiri f’idha l-oħra. Kienet ġejja mis-suq.

“Ara, mamà, dik Saverja ta’ ħdejna!” qal Sheldon lil ommu. “Kemm hi mgħobbija! Dik il-qoffa tqila għaliha. Qiegħda tbati, miskina. Aħjar immur neħdilha l-qoffa u nwassalhielha sad-dar.”

Paġna 6

Ommu ħadet gost bil-ħsieb ġeneruż tiegħu u ħallietu jmur. Sheldon mar laħaq lill-anzjana, ħadilha l-qoffa minn idha u mexa magħha sad-dar. Saverja ħarġet iċ-ċavetta, fetħet u talbet lil Sheldon jidħol ftit magħha. Daħlet fis-salott u ġabet kaxxa mkebba f’karta sabiħa u marbuta b’żigarella lewn id-deheb.

Paġna 7

Ix-xwejħa offriet il-kaxxa lil Sheldon imma dan ma xtaqx jeħodha.

“Dan ir-rigal li xtrajt għan-neputi tiegħi,” insistiet hi, “imma għad nilħaq nixtrilu xi ħaġa oħra. Dan ir-rigal nixtieq nagħtih lilek għax tassew jistħoqqlok. Int offrejtli l-għajnuna tiegħek minn qalbek. Ħennejt għalija u ġejt iġġorli l-qoffa bla ma stennejt xejn mingħandi.”

Paġna 8

Meta ra li x-xwejħa Saverja baqgħet tinsisti Sheldon ħa l-kaxxa minn idejha, irringrazzjaha u rħielha lejn id-dar. B’kurżità kbira fuqu ħall iċ-ċoff taż-żigarella u fetaħ il-kaxxa. Fiha sab radju sabiħ li jaħdem bil-batteriji u juri wkoll il-ħin. Tgħidx kemm feraħ b’dak ir-rigal mhux mistenni!

Paġna 9

Tmiem