(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Il-Praspar ta' Sika 1: Sika u t-Tiġieġa l-Bajda

Sika kienet toqgħod f’dar b’razzett żgħir magħha fit-tarf tar-raħal. Ir-razzett kien qiegħed fuq wara tad-dar u kien imqassam fi kmamar li fihom kienu jżommu xi annimali.

Kien hemm kmamar għall-ħamiem, għall-fniek, u għall-mogħoż u n-nagħaġ. Kamra minnhom kien fiha t-tiġieġ.

Kuljum, Sika kienet tmur tagħlef lit-tiġieġ u tiġbor il-bajd.

Mat-tiġieġ kien hemm serduk daqsiex li kien moħħu biex jiġġieled.

Paġna 1

Malli jara lil xi ħadd jiftaħ il-bieb tal-kamra, arah ġej biex jattakkah għax kien jibża’ li se jeħodlu xi tiġieġa. Biex tagħtihom l-ikel u tiġbor il-bajd, Sika kienet dejjem tispiċċa fi ġlieda mas-serduk. Kien ikollha ddaħħal zokk magħha u toqgħod tgerrxu bih sakemm tlesti, inkella ma kien iħalliha tagħmel xejn.

Imma ħej, x’battikata kull darba! Ma kienx iħalliha bi kwietha! Qisha se toħodlu xi tiġieġa! Tgħidx x’bokka kellu bihom!

Paġna 2

Ġieli xi waħda minnhom kienet toqgħod qroqqa. Wara li tbid xi għoxrin bajda kienet toqgħod fuqhom biex iżżommhom sħan il-ħin kollu u wara xi għoxrin ġurnata kienu jfaqqsu l-flieles.

Fix-xitwa, omm Sika kienet taqbad il-qroqqa bil-flieles b’kollox u tqegħedhom f’kaxxa kbira ġo kamra oħra u tagħmlilhom bozza mixgħula ħalli jkollhom id-dawl u s-sħana.

Paġna 3

Sika tgħidx kemm kienet tieħu pjaċir toqgħod tara l-flieles żgħar qishom ballun tas-suf ipespsu u jnaqqru l-ikel li tagħtihom.

Paġna 4

Ġurnata waħda, Sika marret bħas-soltu titma’ lit-tiġieġ u tiġbor il-bajd. Malli fetħet il-bieb, dak is-selvaġġ ta’ serduk għamel għaliha. Bil-qatgħa li ħadet, telqet il-bieb minn idejha u dan infetaħ beraħ. Kif it-tiġieġa l-bajda ratu miftuħ, ħarġet tiġri sparata ’l barra.

Paġna 5

Xħin Sika rat it-tiġieġa l-bajda taħrab, sabbtet il-bieb u għalqitu imma kien tard wisq għax it-tiġieġa laħqet ħarbet.

“Mur aqbadha issa! Min jaf kemm se tgħajjat miegħi ommi!” bdiet tgerger Sika. “Jekk ma naqbadhiex, ħoll xagħrek u ġib iż-żejt!”

It-tiġieġa l-bajda kienet tbid ħafna bajd kbir u kienet il-favorita t’ommha. Sika bdiet tħares ’l hawn u ’l hemm ħalli tara fejn marret, forsi jirnexxilha taqbadha.

Paġna 6

F’daqqa waħda ratha tippassiġġa kalma kalma fuq il-bejt tal-kamra tal-fniek. Ġabet sellum li kien fil-qrib u bdiet tielgħa nkiss inkiss ħalli ma tgerrixhiex.

Paġna 7

Kienet kważi waslet ħdejha imma, ta’ makakka li kienet, it-tiġieġa semgħetha u telqet tiġri għal fuq bejt ieħor. Dan il-bejt ma kellux ċint mad-dawra. Kien perikoluż għax jekk taqa’ kien hemm m’ogħla sular għoli u tweġġa’ żgur.

Paġna 8

Imma ma kienx hemm x’tagħmel. Riedet taqbadha qabel ittir għax inkella ma ssibhiex żgur. Din id-darba iżjed qagħdet attenta biex ma tagħmilx ħoss, ħalli t-tiġieġa ma tindunax biha.

Paġna 9

Xħin waslet ħdejha, b’xorti tajba t-tiġieġa kienet daharha lejha. Tatha s-salt u ħatfitha mill-ġwienaħ. Tgħidx kemm bdiet tgħajjat u titħabat, imma Sika żammitha sew u ħaditha lura lejn il-kamra tat-tiġieġ.

Paġna 10

“Għall-erwieħ, x’battikata dalgħodu!” qalet bejnha u bejn ruħha.

“Imma l-aqwa li qbadtha. Darba oħra noqgħod iżjed attenta għal dak is-serduk!”

Paġna 11

Tmiem