Il-Maġija tal-Milied

Darba waħda kien hemm żewġt aħwa li jisimhom Toninu u Ġakkinu. Toninu u Ġakkinu kienu magħrufin mar-raħal kollu għax kienu ftit fuq ruħhom. Fil-ħin liberu tagħhom ftit li xejn kont tarahom jedhew jaqraw xi ktieb sabiħ, jilagħbu flimkien jew jagħtu daqqa t’id fix-xogħol tad-dar. Spiss kont tarahom barra jduru fit-toroq ta’ Ħal Babu. Moħħhom kien jhewden biss dwar kif se jagħmlu xi praspura ġdida.

Hekk kif kien qed joqrob il-Milied, Ħal Babu beda jieħu xejra differenti. It-toroq kienu mżejna bil-bozoz ħomor, ħodor, ċelesti u lewn id-deheb. It-triq prinċipali li tieħdok lejn il-pjazza tkun imżejna b’forom kbar ta’ anġli kkuluriti u ħafna mid-djar ukoll jidhru isbaħ matul dan iż-żmien tas-sena.

Rożina, il-ħajjata tar-raħal, ta’ kull sena kienet toħroġ presepju kbir u tarmah fil-parapett tad-dar. Salvinu l-furnar, bħas-soltu, iżejjen is-siġra li għandu fil-ġnien ta’ quddiem id-dar b’dawl u tiżjin tal-meravilja! Turu l-parrukkier ukoll kien jagħmel sforz speċjali biex iżejjen il-faċċata tal-ħanut tiegħu għalkemm ta’ kull sena kien jieħu kedda biex iniżżel it-tiżjin tal-Milied minn fuq ir-raff tal-garaxx!

Dun Ġorġ, bħala kappillan tar-raħal, ukoll kien jagħti sehmu. Fost ħafna attivitajiet, f’dan iż-żmien tas-sena Dun Ġorġ kien jieħu ħsieb li jorganizza l-fiera tal-Milied fil-maħżen tal-knisja. It-tfal ta’ Ħal Babu kienu jistennewha bil-ħerqa din il-fiera għax bi ftit flus setgħu jixtru xi rigali żgħar għall-membri tal-familja. Il-qligħ kien imur kollu għall-karità u lil Dun Ġorġ kulħadd kien jistennieh bil-ħerqa biex ixandar l-ammont ta’ flus li jkunu qalgħu fil-fiera. Dan, ġeneralment, kien isir wara l-quddies ta’ nofsillejl, sewwasew fl-istess maħżen tal-knisja.

Darba fost l-oħrajn Toninu u Ġakkinu ddeċidew li jerħulha għal din il-fiera. Ma kellhomx ħsieb li jixtru rigali imma riedu jaraw x’hemm, u għaliex Dun Ġorġ kien donnu dejjem jiftaħar daqstant b’din il-fiera. Kif daħlu fil-maħżen Toninu u Ġakkinu mmeraviljaw ruħhom b’dak li kienu qed jaraw. Kien hemm sensiela ta’ dekorazzjonijiet u numru kbir ta’ ornamenti, ta’ kull forma u daqs. Ħafna minnhom kienu jaħdmu bid-dawl. Toninu u Ġakkinu bdew jimmaġinaw li qegħdin f’xi pjaneta oħra! L-ikbar attenzjoni però kienet fuq Santa Klaws, li kien bilqiegħda f’nofs il-maħżen. Quddiemu kien hemm xi tfal li kienu qed jistennew bil-ħerqa biex jagħtuh l-ittra tal-Milied tagħhom u biex jieħdu ritratt miegħu.

Toninu u Ġakkinu ma kellhomx sabar jistennew wara t-tfal kollha u għalhekk qabżu lil kulħadd mingħajr ebda problema. In-nies tar-raħal kienu jafu xi jsarrfu dawn it-tnejn u ħadd ma kien jażżarda joħodha magħhom. Toninu u Ġakkinu ma kitbux ittra biex jagħtuha lil Santa Klaws u lanqas riedu jieħdu ritratti. Riedu biss ħaġa waħda…

“Għidilna s-sigriet tiegħek, Santa Klaws,” tenna Toninu hekk kif mexa qrib Santa Klaws. Ma’ dan il-kliem Santa Klaws infixel. Is-soltu jkun hu li jsaqsi l-mistoqsijiet u mhux bil-maqlub. “Irridu nkunu nafu s-sigriet tal-kuntentizza li tuża, Santa Klaws! X’tuża biex iġġib daqshekk ferħ u kuntentizza?”

Għal dan il-kliem Santa Klaws infaqa’ jidħak, “Ħo, ħo, ħo,” filwaqt li jżomm żaqqu.

Santa Klaws qam minn fuq is-siġġu u fetaħ barżakka kbira li kellu merfugħa fil-qrib. Mill-barżakka huwa ħareġ flixkun żgħir u newlu lit-tfal. Il-flixkun kien trasparenti u ġo fih kien hemm likwidu trasparenti wkoll. Santa Klaws resaq qrib it-tfal u minn taħt l-ilsien qalilhom, “Hawn għandkom il-maġija tal-Milied. Ħalltu nofs flixkun ma’ tazza ilma u biha għandkom garanzija għal kuntentizza u ferħ għal dejjem.”

Toninu u Ġakkinu telqu jiġru ’l barra mingħajr lanqas biss irringrazzjaw lil Santa Klaws. Marru dritt id-dar, ħarġu l-flixkun tal-ilma flimkien ma’ żewġ tazzi u għamlu eżatt kif qalilhom Santa Klaws. Ħadu ħsieb li jixorbu sal-aħħar qatra ilma u rħewlha sal-pjazza tar-raħal, filwaqt li taw ċans biex taħdem din il-maġija speċjali tal-Milied.

Stennew siegħa wara l-oħra, għaddiet ġurnata u saħansitra tnejn, iżda l-maġija donnha ma ħadmitx! Toninu u Ġakkinu ma ħassew l-ebda forma ta’ kuntentizza, anzi ħassew rabja kbira għax indunaw li Santa Klaws kien daħaq bihom. Iddeċidew li jerħulha sal-maħżen sabiex jesprimu d-diżappunt tagħhom lil Santa Klaws. Id-diżappunt kiber hekk kif indunaw li l-bieb tal-fiera kien magħluq u ma kien jidher ħadd fil-viċinanzi.

“Soluzzjoni waħda għandna,” qal Ġakkinu li deher eċitat li rnexxielu jsib soluzzjoni f’temp daqshekk qasir. “Immorru għall-quddies ta’ nofsillejl u nistennew il-waqt li Santa Klaws jippreżenta l-flus tad-donazzjoni,” kompla Ġakkinu. Toninu u Ġakkinu qatt ma stennew lejlet il-Milied b’daqstant ħerqa f’ħajjithom!

Hekk kif spiċċat il-quddies kienu pronti niżlu fil-maħżen u qagħdu fil-filliera ta’ quddiem biex ikunu qrib il-mikrofonu ħalli żgur ikunu ċerti li jarahom Santa Klaws. Il-maħżen ma damx ma kien mimli daqs bajda bin-nies.

Hekk kif ħareġ Santa Klaws fuq il-palk Toninu u Ġakkinu kienu pronti qabżu fuq il-palk u mingħajr ma tawh ċans jitkellem qalulu, “Dħakt bina! Dħakt bina, Santa Klaws! Il-maġija tal-Milied ma ħadmitx! Għamilna dak kollu li għidtilna inti, iżda ma ħassejna l-ebda forma ta’ kuntentizza!”

“Dħakt bina! Dħakt bina!” irrepeta Ġakkinu li sadanittant induna li kien hemm sala sħiħa nies iħarsu lejhom. Santa Klaws deher imħawwad u mħasseb. Sewwasew kien nesa min kienu dawk iż-żewġ subien sakemm bħal donnu xegħlet bozza u ftakar f’dak li kien għamel il-ġimgħa ta’ qabel.

“Ħo, ħo, ħo,” daħaq hekk kif qabad il-mikrofonu biex żgur kulħadd isegwi t-tagħlima li kien se jagħti lil dawn iż-żewġ subien imqarqċin. “Meta intom tlabtuni s-sigriet tal-kuntentizza ħsibt sabiex nagħmlilkom ftit ta’ ċajta ħelwa.”

“Ċajta ħelwa?” stagħġeb Toninu. “Inti gdibt u dħakt bina!” kompla.

Santa Klaws kompla billi spjegalhom, “Tajjeb li tkunu tafu li l-kuntentizza u l-ferħ ma tistax tixtrihom! Dawn għandhom jiġu mill-qalb u l-ebda rigal jew forma ta’ maġija ma tista’ twettaqhom!”

“Allura għaliex it-tfal li jkunu ħdejk dejjem ikunu jidhru ferħanin?” staqsa Ġakkinu xi ftit imħasseb.

“It-tfal ikunu dejjem ferħanin għax inkun għadni kif tajthom xi rigal sabiħ, imma tajjeb li tkunu tafu li r-rigali jġibu ferħ għal ftit tal-ħin biss. Il-ferħ u l-kuntentizza vera jinħassu l-iktar meta ngħinu lil xi ħadd, jew saħansitra nkunu ġenerużi, onesti u sinċiera bejnietna!”

Toninu u Ġakkinu ma tantx ħadu gost b’dan il-kliem u wisq inqas għaċ-ċapċip tan-nies! Baxxew rashom u niżlu minn fuq il-palk bla kliem u bla sliem u rħewlha lura lejn id-dar. Tgħid Toninu u Ġakkinu ħaduha t-tagħlima?