Il-Kikkra

Kulħadd b’xortih f’din id-dinja! Sħabi tas-sink tal-kċina jgħiduli, “Xi trid aktar milli tkun kikkra fl-uffiċċju tal-Madam?”

Mur għidilhom ma’ xiex ikolli nħabbat wiċċi filgħodu! L-ewwel jitfgħuli l-misħun jagħli, imbagħad iġġorrni dik il-purtinara nofs ras u żewġ widnejn. Imma l-kbira tiġi meta nara dawk il-par xufftejn resqin bil-mod il-mod lejn wiċċi. Nistħajjilhom qishom mollusk aħmar; jitwaħħal miegħi u jerġa’ jitlaq. U biex tagħqad, iħalluli l-forma stampata bl-aħmar idellek biex żgur ma ninsiex malajr minn liema passjoni kelli ngħaddi!

Dan kif kelli nintgħażel jien? Mhux bħall-oħrajn fl-armarju li għandhom fjura roża quddiem u oħra wara? Għall-ewwel tkabbart xi ftit mal-oħrajn u ħsibt f’kemm kien se jkolli x’nirrakkonta meta nerġa’ lura ħdejhom fil-vaganzi. Kemm kont se nara nies importanti u kemm kienu se jġorruni waqt xi diskussjoni taħraq. Biex issa kważi qed ngħir għall-bqija tas-sett. Jaħasra, ma kellix xi ngerger minnhom. Kemm kienu kwieti!

Hawn dejjem rutina. Sakemm ma jiġix is-sindku jagħti xi kotba għall-iskola! Dak il-ħin sidti terfagħni b’delikatezza kbira bi tliet swaba’, filwaqt li t-tnejn l-oħra ġġebbidhom ’il barra. Tielgħa u nieżla fuq il-plattina, erħili nisma’ kemm ġejja ’l quddiem l-iskola. Kemm studenti jirnexxu fl-eżamijiet u kultant nagħqad u ndur biex jinħall il-ftit zokkor li jkun baqa’ fil-qiegħ. Mid-dehra, dan tal-aħħar jintiegħem tajjeb ħafna għax kollu jitlaqqat!

Diskorsi smajt bosta. B’din il-widna waħda nixba’ nisma’ fuq l-ambjent, ir-riċiklaġġ, użu minn oġġetti użati... Mur għidilhom l-istudenti fejn jispiċċaw l-oġġetti użati ta’ dan l-uffiċċju! Kemm nisma’ skart jintefa’ fil-landa taż-żibel u kemm gzuz ta’ karti jiżżarrtu bla ħniena!

Hawn ġew daħlu pari fuq pari ta’ widnejn imwaqqfin lesti biex jisimgħu. Nista’ ngħid li bdejt nifhem l-importanza ta’ żewġ widnejn fil-bnedmin. Li jidħol minn waħda jrid jibqa’ għaddej dritt mill-oħra, biex żgur ma tinġabarx pressa! Raġuni oħra hija li meta jimxu jridu jżommu ftit tal-bilanċ. M’għandniex xi ngħidu, dawk ta’ widnejhom kbar ikollhom aktar bilanċ mill-oħrajn!

Dalgħodu, wara r-ritwal tal-bidu tal-jum, smajt taħbita mal-bieb tal-uffiċċju. Minn bejn il-karti tal-iskrivanija dehret tifla tistenna fil-bieb, b’par għajnejn imberrqin taħsibha terġax tħabbat. Iżejnu dawk il-par widnejn kellha żewġ ċrieki tad-deheb imdendlin.

Mas-sinjal biex tidħol, resqet lejna. F’idejha jirtogħdu kellha kikkra mxellfa u bla widna. Kienet kikkra sinjura fi żmienha, bajda b’ċirku tad-deheb max-xifer. Min jaf fejn kienet toqgħod u kemm inħarġet minn postha f’okkażjonijiet! Imwaħħlin magħha bil-kolla mżellġa kien hemm qxur ta’ bebbux mejjet ta’ kull daqs u għamla. Din il-povra kikkra spiċċat ornament riċiklat fl-uffiċċju tal-Madam. Hekk kif rajtha tħassartha, u malajr intbaħt kemm ma kellix għalfejn ingerger!