(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Il-Kelb u s-Serduk

Darba kien sajf ħażin ħafna għall-bidwi u l-uċuħ tar-raba’ fallewlu. Għalhekk ma kellux x’jitma’ lis-serduk u l-kelb li kien irabbi. Allura l-kelb qal lis-serduk, “Għażiż serduk, jiena naħseb li nistgħu nsibu aktar ikel jekk immorru ngħixu fil-foresta, milli hawnhekk ma’ sidna. Ma taqbilx?”
“Dak fatt,” wieġbu s-serduk. “Tlaqna. M’hemm xejn aktar x’nistgħu nagħmlu.”
null
Paġna 1
Il-kelb u s-serduk sellmu lil sidhom għall-aħħar darba u telqu għal għonq it-triq biex jaraw x’jistgħu jsibu. U damu mexjin mhux ħażin għax ma setgħux isibu post sabiħ biex jieqfu. Meta beda jidlam, is-serduk qal, “Ejja nqattgħu l-lejl fuq siġra. Jiena ntir u nitla’ fuq fergħa minnhom, filwaqt li int tista’ tistaħba f’dik it-toqba isfel fiz-zokk. B’xi mod ngħadduh il-lejl.”
null
Paġna 2
U hekk għamlu. Is-serduk tela’ fuq il-fergħa, daħħal saqajh taħt ir-rix u raqad. Il-kelb daħal jorqod għall-kenn fit-toqba fiz-zokk tas-siġra. U raqdu raqda l-lejl kollu, u hekk kif beda jisbaħ, is-serduk stenbaħ u bħalma kien imdorri beda jidden, “Quqqu quu quu! Qumu mir-raqda! Qumu! Ix-xemx tiela’ u l-ġurnata dalwaqt tibda!”
null
Paġna 3
U tant beda jidden jgħajjat li lupu, li inzerta f’toqba fil-viċin, qam u beda jaħseb, “Stramba li serduk ikun qed jidden fil-foresta! Nimmaġina li ntilef u ma jistax isib it-triq lura!”
U għalhekk beda jfittex is-serduk, u wara ftit rah fuq il-fergħa tas-siġra. “Hawn hu!” ħaseb il-lupu. “Fih ikla tajba dan! Imma kif se nħajru jinżel minn hemm fuq?”
null
Paġna 4
Għalhekk il-lupu tela’ ftit mas-siġra u qallu, “X’serduk sabiħ fik! F’ħajti qatt ma rajt serduk sabiħ daqsek! Rixek tal-ġenn, qisu indurat bid-deheb! U ara dak denbek il-ġmiel tiegħu! Kieku nista’, noqgħod nisimgħek tidden kuljum, lejl u nhar. Għax ma tinżilx daqsxejn ħa nsiru nafu ’l xulxin aħjar? U qed niftakar, għandi party d-dar tiegħi llejla, u se jkun hemm ħafna ikel u xorb jekk għandek pjaċir tiġi.”
null
Paġna 5
“Sewwa qed tgħid,” wieġbu s-serduk. “Niġi żgur, imma l-ewwel trid tistaqsi ’l sieħbi wkoll. Aħna kullimkien flimkien immorru.”
“U fejn hu sieħbek?” staqsa l-lupu.
“Hawn taħt, fit-toqba fiz-zokk tas-siġra,” wieġbu s-serduk.
null
Paġna 6
U l-lupu daħħal imnieħru fit-toqba, mingħalih li hemm xi serduk ieħor, iżda fil-pront il-kelb ħareġ rasu u ħataf lis-Sur Lupu minn imnieħru! Il-lupu tgħidx kemm għajjat bl-uġigħ. It-tagħlima kien ħadha u minn dakinhar ’il quddiem qatt aktar ma reġa’ prova jqarraq b’xi ħadd.
null
Paġna 7
Tmiem