Il-Ħajja ta' Qattus

Meta tlissen ismi tqabbadni l-bard. Min jaf kemm ilek tqalleb u tfittex ismijiet ta’ qtates biex imbagħad toħroġ b’isem redikolu bħal dan, Fessudinu.

Ma tlabtx jien biex niġi hawn ħalli toqgħod tfissed fija u togħrokli mustaċċija ma’ wiċċek bla pil. Meta rrid nitfissed niġi jien u mhux bil-kontra. Aħjar tmur tfissed lil dik il-kelba mferfxa tferfer denbha għal kull min jidħol hawn ġew. Hekk kif tersaq lejja biex ixxammem, jien għat-taparsi norqod ħalli ma ddumx ma titlaq ’l hemm. Ma tarax li se nitħallat ma’ dik, tnitten kull fejn tkun bir-riħa ta’ klieb.

Ma rridx niġri aktar wara dik il-kobba suf li meta jfettillek tixħitli mal-art. Jien wara oġġetti ħajjin inħobb niġri. Mhux tort tiegħi li n-natura żejnitni b’dan id-don. Tippretendi li noqgħod fl-art u int fuq il-pultruna? Jien ma noqgħodx fl-art imma jekk trid tista’ tpoġġi int fl-art. Naħseb li ssibha friska bħal daż-żmien tas-sena.

Meta niġi fuq soddtok billejl inġebbed saqajja ta’ quddiem ikun ifisser li rrid ftit attenzjoni u mhux tkeċċini ’l hemm. Jiddispjaċini li nkun telliftek mir-raqda imma trid tibda taddatta ruħek għalija.

Kultant ikolli niġi nnewwaħ ħdejk. Tibqax tiggustani u tmellisni. Qatt ma ndunajt li nkun irrid niekol? Ara li l-platt tiegħi jkun mimli sa fuq u mhux tħalli ċentimetru ’l isfel mix-xifer vojt. Tibżax mhux se nwaqqa’. Anzi nlaqqtu kollu, l-aktar meta mmexmex xi ħuta u wara nitnaddaf u ninħasel. Mhux bħal dik li tinbaħ għal kull ħaġa ta’ xejn, twaqqa’ l-ikel u tħammeġ l-art meta tiekol jew tixrob. Ġieli tmur tħaffer fil-ġnien biex taħbi l-għadma li ttiha tiekol. Lanqas niftakar ma rrid.

U iva, meta tarani nigref il-bieb tal-gallarija iftaħli ħa noħroġ. Għandi bżonn noħroġ nixxemmex u nippretendi li nidħol xħin irrid. Ma jidhirlix li qed nitlob wisq. Kulma qed ngħidlek huwa kif irrid ngħix ħajti, ħajja ta’ qattus.