Il-Ġurnata Mistennija

“Federica! Qomt?” instema’ leħen il-mamà jidwi tiela’ minn isfel. “Sar il-ħin. Qum!”

Għajnejja ma flaħtx niftaħhom. Uuu! X’inhu llum? X’ħin hu? Moħħi bħal għajnejja kien magħluq. Xejn. Vojt.

“Federica!”

Ismi ħasadni f’salt! Illum is-Sibt. Is-Sibt? F’daqqa waħda tirt mis-sodda. Ġirja għall-kamra tal-banju fejn baħbaħt wiċċi bl-ilma kiesaħ biex niġi f’tiegħi. Aħħ, hekk aħjar! Waqt li xxuttajt wiċċi fix-xugaman artab tani ferħ ta’ ġenn! X’ħin sar?

Lura lejn il-kamra tiegħi. It-tmienja neqsin kwart? Illaħwa kemm sar ħin! “Ma, ma, għamilli te, jekk jogħġbok. Ħa nilbes.”

“Qomt fl-aħħar? Għaġġel ruħi għax nofs siegħa oħra tiġi t-taksi.”

Illum ser insiefru. Jiena u l-mamà biss! Xi pjaċir! Ftaħt il-gwardarobba għax għalxejn suppost lestejt ħwejġi lbieraħ flgħaxija. Insejt, jew aħjar ma kellix aptit.

Mela nilbes din il-libsa l-blu? Le, kemxejn qasira. Tgħid dan id-dublett roża? U le, dan idejjaqni fuq l-ajruplan. Qalziet iswed u flokk abjad. Lesta. Malajr malajr ilbist il-flokk, qalziet iswed u xeddejt par kalzetti bojod bi strixxi blu. Ilbist il-papoċċ tal-ġiri li nħobb, iswed bi tħażżiża roża, inżilt kokka u qfilt il-lazz.

Mort fil-kamra, ġbidt xagħri f’toppu, qbadt il-basket li kelli mdendel mal-pum tal-bieb u b’ġirja waħda nżilt noqmos it-taraġ.

“Ħa, binti, ixrob dan it-te sakemm nagħlaq il-bibien u t-twieqi.”

Il-mamà, li kienet liebsa pulit, b’żarbun bit-takkuna, riħa tfuħ ta’ fjuri u wiċċha bil-make-up, telqet ittektek iddur il-kmamar. Smajtha ssabbat u ssakkar biċ-cavetta l-bieb tal-bitħa.

Kemm kien jaħraq it-te! Le, ta, lanqas għandi aptitu issa! Malajr malajr, qabel ma tiġi, ersaqt lejn is-sink u xħittu malajr fid-drejn. Ftaħt il-vit, laħlaħt il-magg, u poġġejtu f’postu. Ftaħt il-kabord, ħriġt flixkun ilma żgħir u ħadt żewġ belgħat. Reġa’ nstema’ t-tektik tal-passi resqin.

“Hekk aħjar, serraħt rasi! Kollox għandna? Passaporti u flus għandi, ċwievet fil-portmoni...” bdiet tgedwed il-mamà. “Federica, trid iġġib xi ktieb għal fuq l-ajruplan?”

Iva, bilħaqq! Erġa’ itla’ t-taraġ. Ġrejt ġirja lejn il-kamra u qbadt il-ktieb minn fuq il-komodina; ktieb li xbajt naqra imma kien jogħġobni wisq.

Piqq, piqq! Wasal tat-taksi. Il-mamà rranġat xagħarha quddiem il-mera tal-intrata, fetħet il-bieb, qbadna l-bagalji, waħda kull wieħed, ħriġna u l-bieb ingħalaq b’tisbita waqt li l-mamà sakkritu biċ-ċavetta. U hemm jistenna kien hemm ix-xufier tat-taksi. Raġel twil, liebes qmis bajda, qalziet iswed u nuċċali tax-xemx skur, donnu tal-films, b’idejh marbutin quddiem karozza bajda tleqq.

“Neħodlok il-bagalji, Sinjura?” waqt li resaq bil-kalma u ħa l-bagalji mingħandna.

Fetaħ il-bagoll, għabba ż-żewġ bagalji u… bumm! Tisbita oħra biex għalaq il-bagoll. Il-mamà u jien dħalna ġol-karozza friska, fuq is-sits tal-ġilda.

“Ilbsu ċ-ċintorini tas-sigurtà, jekk jogħġobkom,” qal ix-xufier, “għax malajr naqla’ xi ċitazzjoni u m’għandix aptitha dalgħodu! Għall-ajruport, hux hekk?” staqsa waqt li ħares lejn ommi minn ġol-mera żgħira ta’ quddiemu u startja l-karozza.

“Iva, jekk jogħġbok,” irrispondietu l-mamà.

Jien, waqt li fattart imnieħri mal-ħġieġa, bdejt inħares minn fejn konna għaddejjin. Il-ferħ ġo qalbi beda jiżdied. Xi pjaċir! Sejrin fl-aħħar!

Il-mamà, tista’ tgħid, rabbietni waħidha. Insomma, bl-għajnuna tan-nannu u n-nanna. Kbirt f’ħafna fsied u mħabba, imma ħej, ġieli batejt ukoll. Flus ma tantx kellna. Ħwejjeġ ġodda ftit li xejn kont inżanżan. Dejjem niret mingħand il-kuġini, jew mingħand il-ħbieb tal-qalb tal-mamà.

L-iskola kont ferħana. Ħbieb kemm trid. Jiena kont tifla pjuttost kwieta u nippreferi l-ktieb milli noħroġ nilgħab ma’ sħabi. Bejn il-mużew, skola, xogħol tal-iskola u faċendi, ma tantx gawdejt. Però, l-għaxqa tiegħi meta nhar ta’ Sibt konna mmorru sal-librerija ta’ Belt is-Sebħ, fejn nogħxa ndur qalb il-fillieri u xkafef mgħobbija bil-kotba. U hekk il-ktieb sar l-akbar ħabib tiegħi. Fejn immur inġorr il-ktieb miegħi. Qabel norqod min jaf kemm-il siegħa kont indum naqra! Bil-lampa ta’ fuq il-komodina mixgħula u leħen il-mamà jgħajjatli mill-kamra tagħha, “Itfi, Federica, ħalli torqod.”

Għaddejna minn fuq ħofra u l-iskoss ħariġni mill-ħsibijiet tal-passat li kont intlift fihom. Ix-xufier beda jsuq mhux ħażin. Filli Ħal Balzan, filli l-Marsa. Tlajna t-telgħa tal-Addolorata b’ommi trodd is-salib u wara dorna għat-triq ta’ Santa Luċija, li twasslek għall-ajruport. Fi ftit minuti wasalna quddiem wieħed mill-bibien tal-ajruport.

Ix-xufier waqqaf il-karozza, fetaħ il-bieba, ħareġ u mar iġib il-bagalji minn wara. Jien u l-mamà ħriġna minn got-taksi. X’arja friska! Xi pjaċir! Waqt li geżwirt sew miegħi l-ġersi, li kont ġibt għal li jista’ jkun, il-mamà ħallset lix-xufier. Sellmitlu u rringrazzjatu. B’bagalja f’idejna kull wieħed, bdejna mexjin lejn il-binja l-kbira. Jien u l-mamà ħarisna lejn xulxin u tbissimna.

Fl-aħħar konna ser naqtgħu xewqitna. Konna sejrin l-Amerka fejn kien emigra l-papà u li tul dawn l-aħħar għaxar snin qatt ma kont rajtu. Fl-aħħar, ommi u missieri kienu għamlu ħbieb u kont ser narah għall-ewwel darba!

Xi pjaċir! Xi tferfir għandi f’qalbi! Min jaf hux qed jistenniena! Min jaf hux ferħan huwa wkoll! Grazzi, Bambin, fl-aħħar waslet din il-ġurnata tant mistennija!