(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ġanluka u Maruska 09: Antonella

Fil-klassi ta’ Maruska ġiet tifla ġdida. Din it-tifla hija mill-Italja u jisimha Antonella. Ftit tax-xhur ilu Antonella sfat orfni. Il-ġenituri tagħha mietu f’inċident ikrah tat-traffiku. Hija la għandha ħutha u lanqas familjari oħra l-Italja. L-unika familja li għandha hija z-zija Stella, li tgħix hawn Malta.

Paġna 1

B’hekk, kontra qalbha, Antonella kellha tiġi tgħix maz-zija u tħalli lil sħabha li trabbiet magħhom warajha. Maz-zija żgur li mhu ser ikun jonqosha xejn, imma l-iskola ma tistax tidra. La taf lil ħadd u lanqas tifhem il-lingwa Maltija. L-għalliema tal-klassi tfehemha xi jkun qed isir fil-klassi bit-Taljan, imma mat-tfal ma tistax tikkomunika.

Paġna 2

Bħalissa Antonella tinsab imdejqa ħafna. Għadha kemm tilfet il-ġenituri tagħha, infirdet minn ma’ sħabha u telqet minn art twelidha. Tixtieq kieku tibqa’ d-dar ma’ zijitha. Il-bniet tal-klassi kollha ppruvaw jagħmlu ħbieb magħha; min tbissmilha, min qabdilha idha u min poġġa bilqiegħda ħdejha. Imma Antonella baqgħet rasha baxxuta u bid-dmugħ f’għajnejha.

Paġna 3

Maruska qiegħda titħassar wisq lil Antonella u tixtieq tgħinha, imma ma tafx kif. Meta marret id-dar, Maruska tkellmet mal-mamà dwar Antonella. Is-Sinjura Veronika ftakret li meta kienet għadha żgħira, fil-klassi magħha kien hemm tifla li ma kinitx tisma’ sew. Dak iż-żmien ma tantx kien hawn nies jafu l-lingwa tas-sinjali, u b’hekk l-għalliema, biex tikkomunika ma’ din it-tifla, kienet tuża t-tpinġija. Il-mamà ħajret lil Maruska biex hi wkoll tuża t-tpinġija jew xi stampi biex tikkomunika ma’ Antonella.

Paġna 4

L-għada Maruska marret l-iskola preparata bi ftit karti bl-istampi. Fil-ħin tal-brejk, Maruska resqet lejn Antonella u wrietha stampa ta’ żewġt ibniet jilagħbu bil-ballun. Taħt kull tifla kitbet l-ismijiet tagħhom it-tnejn, u b’hekk Antonella fehmet li Maruska xtaqitha tmur tilgħab magħha. Antonella għamlet sinjal ta’ iva b’rasha u marret tilgħab ma’ Maruska.

Paġna 5

Antonella qiegħda dejjem tidher aktar ferħana, speċjalment li t-tfal l-oħra tal-klassi bdew jagħmlu bħal Maruska biex ikellmuha. Ftit ftit Antonella bdiet titgħallem il-lingwa Maltija u b’hekk m’għadhiex tħossha aktar waħedha.

Paġna 6

Tmiem