(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ġanluka u Maruska 08: Bieb tal-Ħġieġ

Jum fost l-oħrajn, in-nanna Minka qamet xi ftit storduta, għalhekk iddeċidiet li ċċempel liż-żewġ neputijiet bniet biex imorru jagħtuha daqqa t’id fix-xogħol tad-dar u fit-tisjir. Il-bniet kienu fl-aħħar jiem tal-vaganzi tas-sajf, u kemm Maruska kif ukoll Roberta ħatfuha fil-kelma, għax lin-nanna Minka jħobbuha wisq.

Paġna 1

Maruska, li tħobb tmidd idha għax-xogħol bla ma toqgħod tistenna lil min iqabbadha, ħarġet minnufih bil-qoffa tiġbor il-bajd. Roberta xtaqet tgħin ukoll, imma ma kinitx taf x’ser taqbad tagħmel. Għalhekk in-nanna qabbditha tmur tifrex is-sodda u wara tmur tonxor il-ħwejjeġ. Maruska malajr lestiet xogħolha u kienet pronta ħarġet tonxor il-ħwejjeġ hi, bla ma basret li dak kien xogħol Roberta.

Paġna 2

Meta Roberta telgħet fuq il-bejt biex tonxor, sabet li Maruska diġà kellha nofshom minxurin u ħadet għaliha għax ħasbet li kuġinitha ħaditilha xogħolha biex tidher sabiħa man-nanna. Il-bniet bdew jitlewmu bejniethom, għax it-tnejn dehrilhom li kellhom raġun. B’rispett lejn in-nanna, il-kuġini ma baqgħux jargumentaw biex ma jinkwetawhiex.

Paġna 3

$null$

In-nanna sejħitilhom fil-kċina biex jibdew jippreparaw għall-ikla ta’ nofsinhar. Kien kollu ta’ xejn li għamlu sforz biex jidhru li ma kien ġralhom xejn, għax in-nanna mill-ewwel indunat li l-bniet kienu tlewmu. Bħas-soltu n-nanna Minka għamlet tabirruħha li ma indunat b’xejn, imma fl-istess ħin bdiet taħseb kif setgħet terġa’ tagħmilhom paċi.

Paġna 4

Wara li l-borma tal-brodu kienet lesta u qiegħda fuq in-nar, in-nanna qabbdet lill-bniet inaddfulha l-bieb tal-ħġieġ li mill-kċina jagħti għal ġol-bitħa. Lil Roberta talbitha tnaddaf il-ħġieġ minn barra, filwaqt li lil Maruska talbitha tnaddfu minn ġewwa. Bla ma kellhom għażla oħra, il-kuġini sabu ruħhom faċċata ta’ xulxin.

Paġna 5

Għall-bidu kull tifla bdiet tagħmel sforz biex in-naħa tagħha tkun aktar nadifa u tleqq minn tal-oħra. It-tnejn li huma ppruvaw kemm felħu ma jħarsux f’għajnejn xulxin, imma ma tantx setgħu meta kienu qed inaddfu l-istess ħġieġa. Kultant bdiet taħarbilhom xi tbissima, sakemm fl-aħħar infaqgħu jidħku bla ma jafu għalfejn u bla ma setgħu jieqfu. Imnalla kienet in-nanna Minka għax bis-saħħa tagħha ż-żewġ kuġini għamlu paċi.

Paġna 6

Tmiem