(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ġanluka u Maruska 06: Iz-zija Rebekka

Għalkemm kien sar ħafna ħin, Ġanluka, Maruska u l-kuġini tagħhom Gilbert, Norbert u Roberta ma kellhomx ngħas.
Kienu qegħdin l-ajruport jistennew lil zijithom Rebekka tiġi lura mis-safar. Kienet ilha tmien ġimgħat imsiefra, imma għalihom qisu ilu tmien snin daqskemm kienu mmissjawha.

Paġna 1

Liz-zija Rebekka kulħadd iħobbha. Għadha żagħżugħa u lin-neputijiet tgħidx kemm tħobbhom u kapaċi tinżel għal-livell tagħhom. Rebekka hija t-tifla ż-żgħira tan-nannu Karm u tan-nanna Minka. Il-mamajiet tat-tfal ħbieb tagħna huma ħutha l-kbar. Rebekka hija studenta tal-università u fil-vaganzi marret ma’ xi żgħażagħ oħra tagħmel esperjenza sabiħa ta’ karità fil-Ghana.

Paġna 2

Kemm ferħu u għannquha l-qraba xħin waslet lura. Kienet tidher għajjiena ħafna, imma ferħana. It-tfal xtaqu ħafna joqogħdu jisimgħuha tirrakkontalhom minn xiex għaddiet, imma z-zija kellha bżonn tistrieħ. Wegħdithom li l-għada tirrakkontalhom kollox u turihom ir-ritratti li ġabet magħha. U tassew kellha x’tirrakkonta!

Paġna 3

$null$

Bdiet turihom ir-ritratti, ritratti ta’ ħafna tfal foqra, uħud iltiema, morda u abbandunati. Iz-zija Rebekka qaltilhom li dawk it-tfal qatt ma raqdu ġo sodda jew imqar kellhom saqaf fuq rashom fejn jistkennu mix-xita u mix-xemx. Ilma nadif m’għandhomx u skola lanqas biss jafu x’inhi. Imħabba ta’ familja ma jafux x’inhi, imma grazzi għas-sorijiet u missjunarji oħra li jmorru jżuruhom bdew jgħixu ħajja xi ftit aħjar.

Paġna 4

Ritratt li qabbeż demgħa f’għajnejn il-kuġini kien juri t-tfal missjunarji ferħanin imdawrin maz-zija Rebekka hija u tagħtihom xi ħelu li ħaditilhom. Ftit ħelu li għalina ma jiswa xejn, imma għalihom hu ħafna meta tqis li ġieli lanqas ikel ma jkollhom.

Paġna 5

Bis-saħħa ta’ dawn iż-żgħażagħ Maltin, dawn it-tfal foqra bdew jitgħallmu jiktbu u jaqraw. Rebekka qaltilhom li xi Maltin taw donazzjoni ta’ flus biex tinbnielhom skola u dar fejn jgħixu.

Paġna 6

$null$

Bħal kull missjunarju, iz-zija tħoss li qalgħet aktar milli tat f’din l-esperjenza. Rebekka tixtieq li jerġa’ jkollha opportunità tmur tgħin lil dawn it-tfal tal-missjoni. Il-kuġini jixtiequ li la jikbru huma wkoll jgħixu din l-esperjenza sabiħa.

Paġna 7

Tmiem