(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ethan u Eileen 2: Ejja Nagħmlu x-Xirja

It-Tnejn waranofsinhar, wara li omm Ethan u Eileen ġabrithom mill-iskola qaltilhom li kienet ser teħodhom is-supermarkit biex jagħmlu x-xirja. Huma tgħidx kemm kienu eċitati għax jafu li kull darba li jmorru s-supermarkit m’ommhom ikollhom iċ-ċans li jagħżlu biċċa ċikkulata kull wieħed u kaxxa ċereali.
null
Paġna 1
Malli waslu l-omm refgħet lil Eileen biex tkun tista’ tpoġġi fit-trolley, filwaqt li Ethan kien qiegħed iżomm mat-trolley sakemm jaqsmu min-naħa tal-parkeġġ għal ħdejn l-entratura tas-supermarkit.
null
Paġna 2
Fis-supermarkit marru dritt lejn l-ewwel ringiela ta’ xkafef, li kien fiha ħafna tipi differenti ta’ għaġin. L-omm talbet lit-tfal biex jagħżlu pakkett għaġin kull wieħed. Ethan għażel pakkett spagetti, filwaqt li Eileen għażlet pakkett fusilli.
null
Paġna 3
Il-mamà kienet qiegħda tifli l-lista li kienet ippreparat il-ġurnata ta’ qabel. Fuq naħa tal-lista kitbet x’kienet ser issajjar għal ġimgħa sħiħa, u fuq in-naħa l-oħra kitbet l-ingredjenti li għandha bżonn biex issajjar dawk l-ikliet.
Ethan staqsa lil ommu, ‘Ma, xi ktibt fuq dik il-karta?’
Ommu spjegatlu li l-lista hija importanti sabiex ma jixtrux iktar affarijiet milli għandhom bżonn, u b’hekk ma jkunx hemm ħela.
null
Paġna 4
Mis-sezzjoni tal-friġġ l-omm qabdet żewġ kartuniet ħalib ta’ litru l-wieħed u kartuna żgħira krema friska, u daret lejn it-tfal u qaltilhom, ‘Agħżlu ħames yoghurts kull wieħed.’
‘Ma, jiena rrid wieħed tal-vanilla, wieħed tal-frawli, wieħed taċ-ċirasa u tnejn taċ-ċikkulata,’ qalet Eileen.
‘Hawn ħi,’ qalet l-omm hekk kif poġġiet il-yoghurts fit-trolley. ‘U int, Ethan, liema togħmiet tixtieq?’ staqsietu.
‘Jiena rrid tnejn taċ-ċikkulata u l-ġellewż, tnejn taċ-ċirasa u wieħed tal-vanilla, jekk jogħġbok, ma.’
null
Paġna 5
Huma mxew lejn is-sezzjoni tal-frott u l-ħaxix. Ommhom qaltilhom li jridu jagħżlu prodotti tal-istaġun ħalli l-prezz, kemm tal-frott u kif ukoll tal-ħaxix, ikun irħis. Eileen għażlet għanqud għeneb aħdar u ftit larinġ, filwaqt li Ethan għażel il-banana u t-tuffieħ.
L-omm poġġiet ukoll il-frott u l-ħaxix fit-trolley, fosthom ħjara, ħassa, ftit tadam, basal, kaboċċa u ftit karfus.
null
Paġna 6
Il-mamà ta’ Ethan u Eileen kompliet tfakkarhom biex jagħżlu frott u ħaxix li jkunu għall-bejgħ fiċ-ċistuni l-ħodor u mhux dawk ippakkjati. Hi spjegatilhom li huwa importanti li tixtri prodotti li għandhom l-inqas ippakkjar ħalli b’hekk jintrema inqas skart. Barra minn dan qaltilhom ukoll li huwa importanti li jagħżlu prodotti lokali billi dawn ikunu aktar friski u ġenwini.
null
Paġna 7
Hekk kif imxew lejn is-sezzjoni taċ-ċereali, it-tfal kellhom jagħżlu kaxxa ċereali waħda.
‘Tfal, tridu tagħżlu kaxxa waħda biss, għax għal ġimgħa biżżejjed. Imbagħad nixtru kaxxa ċereali oħra meta nerġgħu niġu l-ġimgħa d-dieħla,’ qalet l-omm.
‘Mela llum inġibu ċ-ċereali taċ-ċikkulata u l-ġimgħa d-dieħla nixtru tal-għasel,’ qal Ethan.
Eileen kienet kuntenta li kienet se tmur id-dar bil-kaxxa taċ-ċereali taċ-ċikkulata billi dik kienet il-favorita tagħha.
null
Paġna 8
Kien wasal il-ħin li jmorru jħallsu għax kienu xtraw dak kollu li kellhom bżonn. Ethan u Eileen kienu jafu li issa ser ikollhom iċ-ċans li jagħżlu biċċa ċikkulata kull wieħed billi kien hemm ħafna ċikkulati fejn il-kaxxiera. Ethan għażel biċċa ċikkulata bil-karawett, filwaqt li Eileen għażlet biċċa ċikkulata li kien fiha l-karamella.
null
Paġna 9
L-aħwa ħadu pjaċir ħafna u kienu eċitati immens hekk kif bdew jippakkjaw dak kollu li xtraw f’basktijiet tad-drapp li ġabet magħha l-mamà sabiex b’hekk jevitaw li jużaw il-plastik u jkunu qed jibżgħu għall-ambjent.
Fuq kollox tgħallmu ħafna affarijiet importanti:
  • Meta tmur tixtri mis-supermarkit għandek tipprepara minn qabel lista ta’ x’għandek bżonn biex ma tixtrix affarijiet żejda bla bżonn.
  • Evita li tixtri prodotti li fihom ħafna ppakkjar, b’hekk tkun qed tnaqqas l-ammont ta’ skart li tarmi.
  • Prova agħżel prodotti lokali billi jkunu iżjed friski u ġenwini.
  • Ħu miegħek basktijiet tad-drapp għax dawn tista’ tużahom kemm-il darba!
null
Paġna 10
Tmiem