(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Mary Quant

Mary Quant se tibqa’ mit fid-dinja tal-moda. Irrevoluzzjonat il-mod kif jilbsu ż-żgħażagħ tal-ġenerazzjoni tagħha. Kienet temmen li l-moda għandha tkun milħuqa minn kulħadd bi prezzijiet raġonevoli.
Twieldet l-Ingilterra fil-11 ta’ Frar, 1934 fi Blackheath, f’Londra. Bint Jack u Mary Quant, it-tnejn għalliema iżda li kienu ġejjin minn familji ta’ ħaddiema fil-minjieri. Binthom Mary studjat Blackheath High School u kompliet tistudja l-arti u l-illustrazzjoni f’Goldsmith College.
null
Paġna 1
Mary ma damitx ma bdiet tiddisinja u tħit il-ħwejjeġ. Bla dubju l-lawrja fl-arti u l-kreattività għenuha mhux ftit fil-qasam tagħha ta’ disinjatriċi tal-moda. Mary Quant kienet tiddisinja għal nies tal-ġenerazzjoni tagħha u ż-żgħażagħ li għexu dak iż-żmien ta’ tibdil. Dan kien ta’ vantaġġ għaliha u s-suċċess kien immedjat. Fl-1955, ta’ 21 sena fetħet il-ħanut tagħha tal-ħwejjeġ, Bazaar, f’Kings Road, li aktar ’il quddiem mexxiet ma’ żewġha Alexander Plunkett-Greene. L-aktar li nbiegħu f’dik l-epoka kienu l-għenuq tal-plastik li kienu jintlibsu fuq ilbiesi u flokkijiet skuri.
L-imprenditriċi żagħżugħa ma kinitx kuntenta biss bl-istokk ta’ ħwejjeġ li kienet tbigħ mill-ħanut Bazaar. Kienet baqgħet tiddisinja u toħloq il-moda. Ta’ min isemmi l-bwiez twal sal-irkoppa bil-lazzijiet. Il-moda tagħha saret popolari u nfirxet mal-Ingilterra. Il-prodotti tagħha kienu milħuqin mill-bwiet taż-żgħażagħ ta’ dik l-era.
Bis-saħħa ta’ dan is-suċċess fetħet it-tieni ħanut bl-isem ta’ Bazaar, f’Knightsbridge fl-1961. Fl-1963, Quant kienet qed tesporta l-prodotti tagħha lejn l-Istati Uniti biex tlaħħaq mad-domanda u twieldet il-marka famuża tagħha, Mary Quant.
Paġna 2
F’nofs is-snin sittin, Mary Quant laħqet il-quċċata tal-karriera tagħha. Kien żmien il-mini skirt, ir-raincoats tal-plastik u aċċessorji oħra.
Quant kienet stqarret li ma kinitx hi li ivvintat il-mini skirt, iżda kienu t-tfajliet li xtaqu d-dbielet iqsar. Jingħad li tat l-isem lil dan id-dublett żgħir minħabba l-karozza favorita tagħha, li kienet il-Mini.
null
Paġna 3
Fl-1966 ingħatat l-Order of the British Empire minn Buckingham Palace għall-kontribut tagħha lid-dinja tal-moda bid-disinn tal-mini skirt u l-ingwanti, li daqstant ieħor kienu saru popolari.
Matul is-snin sebgħin u tmenin, Mary Quant ikkonċentrat fuq id-disinn tat-tapezzerija tal-karozza Mini, fejn bdew jidhru s-seats irrigati. Irriżenjat minn direttriċi ta’ Mary Quant Ltd fis-sena 2000, wara li l-kumpanija nxtrat minn ditta Ġappuniża.
Isem Mary Quant jibqa’ mmarkat fl-istorja tal-moda u huwa sinonimu mal-ħajja libera taż-żgħażagħ li segwewha, l-aktar dawk tas-snin sittin u sebgħin.
Paġna 4
Tmiem