(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Kwiekeb Indjani

“Nov. 2006: Three girls aged 6 to 13 were rescued from Faribadad in the state of Haryana. Badly beaten and bruised the girls all worked as domestic helps just a few miles away from India’s capital Delhi.”
Sors: All News
Għadni niftakar sew meta jien u oħti Shanta ma konniex inkunu nistgħu norqdu fl-iljieli sħan li jafu jagħmlu hawn, l-Indja. Konna mmorru nkiss inkiss nittawlu mit-tieqa u nibdew ngħoddu l-kwiekeb fis-sema iswed sakemm jerġa’ jaqbadna n-ngħas u norqdu ħdejn xulxin.
Noqogħdu f’dar żgħira ħafna f’Faribadad, l-Indja, ma’ ommi, missieri u ħutna Kaamil u Haami. Kaamil dejjem jibki u Haami għad għandu biss ftit xhur u dejjem fuq ommi. Jien u Shanta ftit morna skola għax biex tmur l-iskola trid tixtri l-affarijiet. Ħafna drabi nkunu qed ngħinu ’l ommi. Jien nieħu ħsieb is-subien u Shanta, li hija ftit akbar minni tgħinha tipprepara l-ftit ikel li jkollna. Imma konna nqattgħu ħin twil nilagħbu barra mat-tfal l-oħra.
Niftakar meta kien jaqbadni l-ġuħ, Shanta kienet tgħidli, “Ejja nibqgħu ftit ieħor, Bandhura. Mhux aħjar hawn nilagħbu fit-tajn?” Shanta kienet dejjem tkun taf x’għandna nagħmlu. Imbagħad kont ninsa li għandi l-ġuħ u kont nibqa’ nilgħab.
null
Paġna 1
Darba minnhom minn ħdejn id-dar tagħna għaddiet waħda mara. Jien u oħti bqajna nħarsu lejha. Kienet liebsa lbies sabiħ u jleqq, mhux bħal t’ommi u n-nisa l-oħrajn li joqogħdu ħdejna.
“Shanta, rajtha ’l dik il-mara?” niftakar li kont staqsejtha, “Għandha l-ħġieġ imwaħħlin mal-libsa u xħin tiċċaqlaq jibdew jixegħlu qishom stilel!”
Shanta li kienet taf aktar minni weġbitni, “Dak mhux ħġieġ, Bandhura, dawk antaċċoli u żibeġ irqaq li jgħidulu lewlu meħjutin mad-drapp.” Bilfors li kienet sinjura biex tixtri dawk l-affarijiet u toqgħod twaħħalhom mal-ħwejjeġ, kont ħsibt.
Il-mara li tilbes sabiħ bdejna narawha ta’ sikwit fl-inħawi fejn noqogħdu. Darba lmaħnieha titkellem m’ommi. Imbagħad resqet lejna u qabdet id Shanta. Jien ħbejthom wara dahri jdejja għax ma tantx kienu nodfa. Il-mara fliet is-swaba’ ta’ Shanta, l-ewwel t’id waħda imbagħad tal-id l-oħra qisha kienet qed tkejjilhom. Għall-ewwel bżajt ftit, imma mbagħad rajt ’il Shanta tidħak u bdejt nidħak jien ukoll.
null
Paġna 2
Ftit żmien wara, il-mara ġiet għal Shanta biex toħodha magħha. Shanta kienet tmur tħit l-antaċċoli, iż-żibeġ u kull xorta ta’ ħaġar fuq il-ħwejjeġ ġo fabbrika. Anke xi tfal minn ħdejna kienu marru, niftakar. L-ewwel darba li marret kienet ġiet lura tard u qaltli, “Taf kemm waħħalt minnhom? Irrid inħithom waħda waħda. Jgħammxulek għajnejk il-kuluri u bdejt niftakar f’għajnejk ileqqu, Bandhura, jien u nwaħħalhom!”
Oħti kienet iddum ħafna taħdem u meta tiġi lura kienet tagħti l-flus ’il ommi. Imma jien kont niddejjaq mingħajrha. Ridt inlaħħaq max-xogħol tad-dar waħdi. Ridt nistennieha sa tard biex nismagħha tgħidli fuq in-nisa li jilbsu lbies ileqq daqs il-kwiekeb. Imma meta kienet tiġi lura kienet tkun għajjiena wisq u ftit li xejn kienet tkellimni. Subgħajha bdew juġgħuha u kienet tgħid li qed tistordi. Ġieli kont naralha jdejha mbenġlin u hi kienet tinduna u tgħattihom.
null
Paġna 3
Lejl minnhom ma stajtx norqod bis-sħana. Mort ħdejn Shanta li wkoll kienet għadha lanqas raqdet. “Shanta, ejja nittawlu lejn is-sema trid? Ilna ma ngħoddu l-kwiekeb.”
Shanta qamet bil-mod fuq minkbejha u ttawlet ’il barra mit-tieqa. Imbagħad daret lejja u qaltli, “Bandhura, arahom int il-kwiekeb, għoddhom u għidli kemm hemm. Jien ma nistax narahom aktar il-kwiekeb ileqqu!”
Daż-żmien qed nagħmel ħafna xogħol. Kaamil baqa’ jibki, Haami telaq jimxi u Shanta dejjem ġo rokna, għax m’għadhiex tara. Xi drabi billejl inqum nittawwal fis-sema, ngħodd il-kwiekeb u nfakkar ’il Shanta kemm kienu jleqqu fis-sema skur.
Paġna 4
Tmiem